" နှစ်ခြိုက်မိပါသည် The Lady "

ပြီးခဲ့သည့် မတ်လ ၁၀ ရက်နေ့ညက ကျွန်တော့်ဇနီးသည်နှင့်အတူ စင်ကာပူမှာ ရုံတင်နေသော "The Lady" ရုပ်ရှင်ကို သွားကြည့်ဖြစ်ခဲ့သည်။ ကျွန်တော်သည် အလုပ်ကို စနေရော၊ တနင်္ဂနွေပါ ဆင်းနေရ၍ ညဘက်ကို အပြေးအလွှား သွားကြည့်ဖြစ်ခဲ့ခြင်းပင်။

ထိုဇာတ်ကား စင်ကာပူလာမည် ဆိုကတည်းက ကျွန်တော် စိတ်ဝင်စားမိသည်။ ကျွန်တော်တို့ လင်မယား နှစ်ယောက်စလုံး ထိုရုပ်ရှင်ကို ကြည့်ချင်မိ၏။ အဓိကက ဒေါ်အောင်ဆန်းစုကြည်၏ ဘ၀ဇာတ်ကြောင်း၊ ကျွန်တော်တို့ မြန်မာနိုင်ငံ၏ နိုင်ငံရေး အကြောင်း။ ဘာတွေကို ဘယ်လို ရိုက်ပြမည်နည်း။ မြန်မာပြည် ပြင်ပက လူများက ရိုက်ပြမှာ ဖြစ်၍ ပိုပြီးစိတ်ဝင်စားမိသည်။

ရုပ်ရှင်ရုံထဲရောက်တော့ လာကြည့်သူတွေကို ကျွန်တော်အကဲခတ်မိသည်။ နဂိုကတည်းက လက်မှတ်က ကုန်သွားတတ်သည်ဟု ကြားထား၍ အတတ်နိုင်ဆုံးကြိုတင်၍ ကြိုးစားထားတာကိုပင် ထိုင်ခုံက ဒုတိယတန်းသာ ရလိုက်သည်။ ရှိစေတော့။ မြန်မာပြည်၏ နိုင်ငံရေး ဇာတ်လမ်းမို့ မြန်မာများ တော်တော် ကြည့်ကြမည်ဟု တွေးထားလိုက်မိသည်။ တကယ် ရုံထဲရောက်တော့ အဖြူကောင်များ၊ စလုံးများပါ အုံနှင့်ကျင်းနှင့် လာကြည့်ကြသည်ကို တွေ့ရသည်။ ဪ-ကျွန်တော်တို့ နိုင်ငံ၏ နိုင်ငံရေးကို သူတို့လည်း စိတ်ဝင်စားကြသည်ပေါ့။

စပါပြီ။ ဗိုလ်ချုပ်အောင်ဆန်း အစည်းအဝေး မသွားခင် သူ့သမီးနှင့် အိမ်မှာ စကားပြော၊ ပြီးတော့ အစည်းအဝေးသွား။ နောက်တော့ ဗိုလ်ချုပ်အောင်ဆန်း လုပ်ကြံခံရသည်။ သူတို့ကတော့ ဘယ်ကအကိုးအကားနှင့် ရိုက်သည်မသိ။ လာလုပ်ကြံသည့်သူကို ဗိုလ်ချုပ်က မျက်စိပိတ်၍ သေနတ်ပစ်ခံသည်။ ပစ်သူက နဖူးကို ပစ်ချသည်။ တကယ်တော့ ကျွန်တော်ဖတ်ဖူးထားသည်က သည်လိုမဟုတ်။ ဗိုလ်ချုပ်က လက်နှင့်ကာ၍ တားသေးသည်။ ထိုသို့တားသည့်ကြားက ပစ်သွားတာဖြစ်သည်။ ကျွန်တော့်အထင် လွတ်လပ်ရေးအတွက် ကြိုးစားနေသော ဗိုလ်ချုပ်သည် သူ့ကို လုပ်ကြံမည့်သူမရှိဟု ယုံထားတာဖြစ်သည်။ ပြီးတော့ အသားလွတ်ကြီးတော့ အပစ်ခံမှာမဟုတ်။ ဗိုလ်ချုပ်မှာ ရှင်းပြစရာတွေ ရှိနေလိမ့်မည်။ မေးစရာတွေ ရှိနေမှာဖြစ်သည်။ ထားတော့။ ထိုရုပ်ရှင်ကို ပြချင်သူက The Lady ကိုသာ တည်ထားတာဖြစ်သည်။

သူတို့ဇာတ်လမ်းက ဒေါ်အောင်ဆန်းစုကြည်၏ ယောကျာ်းဘက်ကနေ ပြသွားသည်။ သူတို့မိသားစု၏ လူနေမှုဘ၀ကနေ မိခင်နေမကောင်း၍ မြန်မာပြည်ပြန်ရာကနေ ပြန်မလာနိုင်တော့သည့်အကြောင်း။ ဒါကိုတော့ အားလုံးသိပြီးသား ဖြစ်စဉ်များကို ပြန်ရိုက်ထားတာဖြစ်၍ ကျွန်တော်အကျယ်ချဲ့ မပြောလို။ ကျွန်တော်က ရုပ်ရှင်ကြည့်သူ ဖြစ်၍ ရုပ်ရှင်အတိုင်းသာ ခံစားလိုသည်။

ကျွန်တော် မှတ်သားမိသလောက် သမိုင်းနောက်ခံရိုက်လျှင် တော်တော် သတိထားရသည်။ အဘယ့်ကြောင့် ဆိုသော် အပြမှားလျှင် အမှတ်မှားတတ်သည်။ သို့သော် ယခုဇာတ်လမ်းမှာတော့ အတတ်နိုင်ဆုံး ကြိုးစားထားသည်ဟု ကျွန်တော်မြင်မိသည်။ ဇာတ်လမ်း၏ လိုခြင်း ပိုခြင်းများကိုတော့ တကယ့်ဖြစ်ရပ်မှန်ကို အသေးစိတ် အတိအကျ သိသူတစ်ယောက် မဟုတ်၍ မဝေဖန်လို။ ရုပ်ရှင်အရတော့ ကောင်းသည်ဟု ကျွန်တော်မြင်မိသည်။

ဥပမာ-ဒေါ်အောင်ဆန်းစုကြည်၏ ခြံထဲမှာ ရဲဘော်လေးများ စောင့်ကြသည်။ ကျွန်တော်တို့မြန်မာများကား အားလျှင် ကျားထိုးတတ်သည်။ ထိုအချက်ကို ပီပြင်အောင်ပြထားသည်။ တစ်ယောက်က တစ်ယောက်ကို ပြောသည်။ "မင်းတော့ ငါစားရင် သေတော့မှာပဲ " တဲ့။ စကားလုံးတော့ အတိအကျ ဖြစ်ချင် မှဖြစ်ပါမည်။ ကျွန်တော်မှတ်မိသလို ပြန်ပြောခြင်းပင်။ သို့သော် ထိုအကွက်လေးကိုတော့ နိုင်ငံခြားသား ဒါရိုက်တာ ရိုက်ထားသော မြန်မာဇာတ်လမ်းအတွက် အမှတ်ပေးချင်သည်။

ပြီးတော့ အပြ။ ဒေါ်အောင်ဆန်းစုကြည် အဖြစ် သရုပ်ဆောင်ထားသော မင်းသမီး မီရှဲယို၏ မျက်လုံးများ။ ကောင်းလွန်းသည်။ ကြေကွဲနေသည်။ အားတင်းထားသည်။ ငိုသည်။ ပြန်အားတင်းသည်။ လက်ပြသည်က လက်ခုပ်ကလေးနှင့်။ လက်ဝါးနှင့် မဟုတ်။ ပြင်ပက လူနှင့် တူသည်မတူသည်တော့ ကျွန်တော်မပြောလို။ သို့သော် အားတင်း၍ လက်ပြနေသည်ဟု နားလည်ပေး၍ ရသည်။

ကျွန်တော်တို့ ငယ်ငယ်က မြင်ခဲ့ဖူးသော In The Line of Duty ထဲက ဂျက်မ မဟုတ်။ Crouching Tiger Hidden Dragon ထဲက ဂျက်မ မဟုတ်။ အိမ်ထောင်ဝန်၊ နိုင်ငံရေး နယ်ပယ်ထဲက တာဝန်များနှင့် The Lady အဖြစ် မီရှဲယို၏ ဇာတ်ရုပ်က ပီပြင်လွန်းသည်။

အပြ မှားတာလေးတွေလည်း ရှိသည်။ ဗိုလ်ချုပ်နေခဲ့သည့် အိမ်နှင့် ဒေါ်အောင်ဆန်းစုကြည်နေသောအိမ်တို့ တစ်အိမ်တည်း ဖြစ်နေခြင်းပင်။

ပြီးတော့ ရုပ်ရှင်အရ ပြသွားသော အနုပညာပြကွက်လေးတစ်ခု ရှိသည်။ ဒေါ်အောင်ဆန်းစုကြည်က အိမ်ထဲမှာ စန္ဒယားတီးသည်။ သူ့ယောကျာ်းက မြန်မာပြည်ရောက်နေတုန်း သတင်းစာကို ခြံထဲမှာ ဖတ်နေသည်။ ရဲဘော်လေးများက ခြံထဲမှာ စောင့်နေသည်။ အားလုံးတိတ်ဆိတ်နေချိန်မှာ စန္ဒယားတီးသံက ရုတ်တရက် ထွက်လာ၍ ရဲဘော်လေးများ လှုပ်လှုပ်ရှားရှားဖြစ်သွားသည်။ ထိုအခါ ဒေါ်အောင်ဆန်းစုကြည်၏ ယောကျာ်းက ရဲဘော်များကို ကြည့်၍ တစ်ခွန်းတည်း ပြောသည်။ "This is called music" တဲ့။ ရုပ်ရှင်အရ အနုပညာပြကွက် ကောင်းလွန်းသည်ဟု ကျွန်တော်ထင်သည်။

ထိုအပြမျိုးကို နောက်တစ်ကြိမ်မှာ ဒေါ်အောင်ဆန်းစုကြည် စန္ဒယားတီးသောအခါ ရဲဘော်လေးတစ်ယောက်က ငြိမ်သက်နေရာမှ ရုတ်တရက်ထလာပြီး နားထောင်၍ "Music" ဟုဆိုကာ သူ့ဘာသာ သဘောပေါက်သွား ပုံမျိုး ပြထားပြန်သည်။ ရုပ်ရှင်ကြည့် ပရိသတ် အင်မတန် သဘောကျသော ပြကွက်များ ဖြစ်၏။

အားလုံး ခြုံကြည့်လျှင်တော့ ကြည့်ရှုမိသူ ပရိသတ်သဘောကျမိလိမ့်မည်ဟု ကျွန်တော်ထင်သည်။ Action မဟုတ်။ Fighting မဟုတ်။ တကယ့်ဖြစ်ရပ်မှန်ကို အခြေခံ၍ ရိုက်ထားသော နိုင်ငံရေး ဇာတ်လမ်းဖြစ်သည်။ ကျွန်တော်တို့ မြန်မာများကတော့ ယနေ့အထိ အားပေးနေဆဲ The Lady ဖြစ်သည်။

ကျွန်တော်တစ်ဦးတည်း၏ သဘောထားကို မေးလျှင်တော့ သမိုင်းနောက်ခံ ဇာတ်လမ်းဖြစ်၍ ဖြစ်စဉ်ကို ဘာမျှ မပြောလို။ ကျွန်တော်ဆိုလိုချင်သည်က မှန်သည်၊ မှားသည်ကို မဝေဖန်လို။ ကျွန်တော်နှင့် အလှမ်းဝေးလွန်းသည်။ အနုပညာ ၀ါသနာပါသူ တစ်ဦးအနေနှင့်တော့ အမှန်အတိုင်း ၀န်ခံရလျှင် " The Lady " ကို ကျွန်တော် နှစ်ခြိုက်မိသည်ဟု ဆိုချင်သည်။ ။

ဆူးသစ်
၁၉:၂၁ နာရီ
၂၅.၃.၂၀၁၂

" အရွယ် "

လူ့ဘ၀ကြီးထဲကို ဖြတ်သန်းရင်း ကိုယ့်ဘာသာ ဘာသိဘာသာ နေရင်းက မှတ်မှတ်ထင်ထင် ဖြစ်လာခဲ့ရတဲ့ အကြောင်းလေးတစ်ခုက ကျွန်တော့်ဘ၀ထဲကို ၀င်လာခဲ့တယ်။ အကြောင်းက ဒီလိုပါ။

စင်ကာပူရောက်ပြီး နည်းနည်းကြာတော့ ကျွန်တော့်ဆံပင်တွေ ရှည်လာခဲ့တဲ့ အချိန်မှာ City Hall လို့ပြောနေကြတဲ့ ကျွန်တော်တို့မြန်မာများရဲ့ စုရပ်၊ Peninsula Plaza မှာ ဆံပင်သွားညှပ်ခဲ့ပါတယ်။ တစ်ခါညှပ် စင်ကာပူ ဒေါ်လာ ငါးကျပ်ပါ။ ဒီနေ့အထိ ငါးကျပ်ပါပဲ။ တခြားဆိုင်တစ်ဆိုင်က သုံးကျပ်လို့ အော်နေပေမယ့် ကျွန်တော်ညှပ်နေကျ ဆိုင်က ငါးကျပ်ဆိုတာ မပြောင်းလဲသလို နောက်တစ်ဆိုင်ရဲ့ သုံးကျပ်ကလည်း ငါးကျပ်ဖြစ်လိုက် သုံးကျပ်ဖြစ်လိုက်နဲ့ ငါးကျပ်ထက်တော့ မပိုခဲ့ပါဘူး။

ဆံပင်ညှပ်ခ မပြောင်းလဲပေမယ့် ပြောင်းလဲခဲ့တာက ကျွန်တော့်ဆံပင်ပါ။ ၂၀၁၂ ခုနှစ်ထဲမှာ ကျွန်တော့်ရဲ့ ဆံပင်တွေက ပိုဖြူလာခဲ့ပါပြီ။ တကယ်တော့ ကျွန်တော် ရန်ကုန်စက်မှုတက္ကသိုလ် ကျောင်းသားဘ၀ ပထမနှစ်လောက်မှာ ကတည်းက ဆံပင်ဖြူက တစ်ချောင်းစ၊ နှစ်ချောင်းစ ထွက်နေပါပြီ။ ကျွန်တော့်အခင်ဆုံး သူငယ်ချင်းတချို့ကတောင် မြင်တာနဲ့ ဆွဲနုတ်ပစ်ခဲ့ကြတာ။ အခုတော့ စင်ကာပူရောက်ခဲ့ပြီးမှ နားထင်တွေမှာ အဖြူတွေများလာခဲ့ပါတယ်။

ဒါကလည်း ပထမတော့ ကိုယ့်ဘာသာသတိမထားမိပါဘူး။ ဆံပင်ညှပ်ဆိုင် သွားတော့ ဒီဘက်နောက်ပိုင်းမှာ ဆံပင်တစ်ခါညှပ်တိုင်း ကျွန်တော့်ကို ညှပ်မယ့်သူက ဆံပင်ဆေးဆိုးဦးမလားလို့ မေးတာကို တော်တော်လေး ခံလာရမှ သတိထားမိလာတာပါ။ ပထမတော့ ငါ့ဆံပင် အဲဒီလောက် ဖြူနေလို့လားလို့ မာနတွေးလေး တွေးမိ ပါသေးတယ်။ ငါငယ်ပါသေးတယ်ပေါ့။

ဒါပေမဲ့ ကြာလာတော့ ဘယ်လိုမှ ညာလို့မရတော့ပါဘူး။ ဆံပင်ညှပ်ပြီး ခေါင်းလျှော်၊ ဂျယ်လေးဘာလေးလိမ်းရင် အံမယ်-ရံဖန်ရံခါ ဆံပင်ဖြူက ထောင်ထနေတာ ထင်းခနဲ။ ဆံပင်ညှပ်လို့ နားထင်တွေဆံပင် ပါးသွားပြီဆို ဖြူနက်ကျားက ထင်းထင်းကြီး။

တစ်ခါများဆို ဆံပင်ညှပ်ဆိုင်မှာ ညှပ်မယ့် အမျိုးသမီးက မညှပ်ခင် မောင်လေး ခေါင်းလျှော်မလား၊ ဘာလားနဲ့။ ညှပ်ရင်း ညှပ်ရင်း ဆံပင်ဖြူတွေများနေတာလည်း တွေ့ရော အစ်ကို၊ ဆေးဆိုးဖို့သင့်ပြီတဲ့။ သေရော။ ဆံပင်ဖြူက လူကို ဆက်ဆံရေးပါ ချက်ချင်းပြောင်းပစ်လိုက်တာများလေ။ မောင်လေးလို့ခေါ်ရာကနေ အစ်ကိုလို့ကို ပြောင်းခေါ်တော့တာ။

ဒါပေမဲ့ အခုနောက်ဆုံး တစ်ခေါက် သွားညှပ်တော့ နည်းနည်းတော့ ကျေနပ်မိသေးတယ်။ ညှပ်တဲ့ အမျိုးသမီးက မောင်လေး၊ နင့်ခေါင်းမှာ ကြာဆံတွေရော၊ မီးချောင်းတွေရော အများကြီးပဲနော်တဲ့။ တစ်ခုခုတော့ လုပ်သင့်ပြီတဲ့။ သူပြောတာက ပညာပါတယ်။ ကျွန်တော့်ကို ဆံပင်ဆိုးမလား မေးတဲ့လူတွေလို တိုက်ရိုက်မမေးဘူး။ ဒါနဲ့ ကျွန်တော်က သူ့ကို အမှန်အတိုင်းပြောပါတယ်။ ရပါတယ်။ အသက်လည်း ကြီးပြီဆိုတော့ ဇရာက ညာလို့မှမရတာလို့ဆိုတော့ သူက ကျွန်တော့်ကို ပြောပါတယ်။ အမယ်၊ မောင်လေး၊ လွန်ရော၊ ကျွံရောမှ နင့်အသက်က ဘာရှိမလဲ။ သုံးဆယ်ပေါ့တဲ့။ ကျွန်တော်နည်းနည်းတော့ သဘောကျသွားတယ်။ မကျခံနိုင်ရိုးလား။ သူပြောတဲ့အသက်ကို ကျွန်တော်ဖြတ်သန်းခဲ့တာ ကြာပေါ့။

ဒါနဲ့ ဆံပင်ညှပ်ပြီး အထွက်မှာ ဇနီးသည်ကို ပြောပြပြီး ကျွန်တော်တို့ရယ်မိသေးတယ်။ ကျွန်တော်ကတော့ ဒီအစ်မကြီးကို မုန့်ဝယ်ကျွေးရဦးမယ်လို့တောင် ပြောဖြစ်သေးတယ်။ တကယ်တော့ ကျွန်တော်က ဆံပင်သာဖြူတာ။ ဘယ်တုန်းကမှ ဆေးလိပ်၊ အရက်သောက်ခဲ့တာ မဟုတ်တော့ အဲဒီအကျိုးလေးခံစားရတယ် ထင်တာပါပဲ။ ဒါပေမဲ့ ဆံပင်ဖြူတွေ ခုတလော ရုပ်ပျက်ဆင်းပျက် ထွက်နေတာတော့ ဘယ်ကြိုက်ချင်ပါ့မလဲလေ။

ကျွန်တော့်အလုပ်က ကောင်လေးတွေကတောင် အစ်ကို ဆံပင် ဆေးဆိုးသင့်ပြီတဲ့။ ကျွန်တော်က သဘာဝအတိုင်း ပိုကောင်းပါတယ်ကွာလို့။

ကျွန်တော်နဲ့ခင်တဲ့ ကျွန်တော်တို့အရွယ် သူငယ်ချင်းတွေကို လိုက်ပြီးတီးခေါက်ကြည့်တော့ တော်တော် များများက ဆေးဆိုးနေပြီ။ ကျွန်တော့် ငယ်သူငယ်ချင်းတွေထဲမှာတောင် ဆေးဆိုးတဲ့လူကဆိုး၊ မဖြူသေးဘူးလို့ ကြွေးကြော်တဲ့သူက ကြွေးကြော်နဲ့။ စက်မှုတက္ကသိုလ်က သူငယ်ချင်းတွေလည်း ဒီလိုပဲ။

တလောကတောင် ဖေ့စ်ဘွတ်ခ်ထဲမှာ သူငယ်ချင်းတစ်ယောက်က ကြောင်ပုံလေးနဲ့ ငါမအိုဘူး၊ ကြွပ်ဆဲ၊ ရွဆဲ လုပ်နေလို့ ကျွန်တော်ကတော့ ဆံပင်ဖြူရင်တော့ အိုပြီပေါ့ဆိုလို့ ဆံပင်မဖြူဘူး။ ဆေးဆိုးထားတယ်တဲ့။ ပြီးတော့ အိုတာမဟုတ်ဘူးတဲ့။ အတွေးတွေ များလာလို့ပါတဲ့။

ကျွန်တော်လက်ခံပါတယ်။ ကျွန်တော်ဆို စင်ကာပူရောက်ပြီးတော့မှပဲ ပိုဖြူလာခဲ့တာ အလုပ်ကြောင့်လား၊ အရွယ်ကြောင့်လားဆိုတာကို စဉ်းစားနေတုန်းပဲ။ ကျွန်တော်လုပ်ရတဲ့ ဓာတုဗေဒလုပ်ငန်းခွင်ဟာ အချိန်ကြာလာရင် ကြာသလောက်ကို ဆိုးကျိုးတွေ ရှိတယ်တဲ့။ တချို့ဆို နှစ်ပေါင်းများစွာ လုပ်ပြီး ကလေးမရနိုင်တော့တာတွေပါ ဖြစ်တယ်ဆိုလို့ နှစ်အနည်းငယ်သာ လုပ်ရသေးတဲ့ ကျွန်တော့်အတွက် ဆံပင်ဖြူတာကတော့ လုပ်ငန်းခွင်က ဓာတုဗေဒကြောင့် ဆိုတာထက် လုပ်ငန်းခွင်မှာ သောကတွေများ၊ ပူရပန်ရ၊ စဉ်းစားရတာတွေ များတာကြောင့်ပဲ နေမှာလို့ ဖြေတွေးမိသေးတယ်။

တကယ်တော့ အရွယ်ဆိုတာ ညာလို့ရကောင်းတဲ့ အရာမှ မဟုတ်တာ။ အခုဆို ကျွန်တော့်အသက်က တဖြည်းဖြည်းနဲ့ သုံးဆယ့်ငါးနဲ့ လေးဆယ်ကြားရောက်လို့ လေးဆယ်ဆီကို ကပ်ဖို့ သွားနေပြီ။ ဆေးလိပ်၊ အရက် မသောက်လို့ ရုပ်အခံက နုနိုင်ပါတယ်ဆိုရင်တောင် ဘယ်လောက်နုနိုင်ဦးမှာမို့လို့လဲ။

စင်ကာပူရောက်စက အိပ်ရေး ကြိုက်သလောက်ပျက်၊ နေကြိုက်သလောက်ပူ၊ အချိန်ပို ကြိုက်သလောက်လုပ် မဖြုံရေးချ မဖြုံ။ တစ်လမှာ တစ်ရက်လောက်ပဲ နားခဲ့တာတွေတောင် ရှိတာ။ အဲဒီအချိန်တွေ တုန်းကဆို ခေါင်းမူးတာတောင် မရှိ။ အခုလည်းကျရော ထိုင်ရာကနေ ရုတ်တရက်ထလိုက်ရင်ကို မူးခနဲ၊ မိုက်ခနဲ ဖြစ်သွားတာမျိုး၊ တစ်ခါတလေ တစ်ယောက်တည်း ငြမ်းရဲ့ အလယ်မှာ လမ်းလျှောက်နေရင်း ဘယ်လိုကနေဘယ်လို ငြမ်းရဲ့ ဘေးက လက်တန်းနားကို အလိုလိုရောက်သွားတာလဲ မသိသလို မျိုးတွေ ဖြစ်လာတယ်။

ဇနီးကတော့ ကျန်းမာရေးဂရုစိုက်ပါတဲ့။ ကျွန်တော်ကတော့ ကိုယ့်ကိုယ်ကို အိုကေတယ်ပဲ ထင်နေတုန်း။ တစ်ခုပဲ။ အရွယ်ဆိုတာက သူပေးတဲ့အချိန်မှာ ရတဲ့အခွင့်အရေးကို အရယူရတာမျိုးမဟုတ်လား။ ကျွန်တော်က လုံးချင်းဝတ္ထုတွေ ရေးချင်နေသေးတာ။ ကျွန်တော့်နှလုံးသားက အဲဒီလိုလုပ်ဖို့ လတ်ဆတ်နေဖို့တော့ လိုသေးတာပေါ့။ ဒါမျိုးကလည်း ငယ်တုန်းရေးတာပိုကောင်းမယ်ထင်တာပဲ။

နောက်တစ်ခု တွေးမိတာက အသက်ကလေး ရလာပြီဆိုတော့ ဘာတွေလုပ်ခဲ့ပြီးပြီလဲ ဆိုတာမျိုးကို တွေးကြည့် တာပါ။ ကျွန်တော် လူငယ်ဆောင်းပါးတွေ ရေးတော့ " ရွှေရောင်လူငယ် " ဆိုတဲ့ ဆောင်းပါးရေးခဲ့ ဖူးတယ်။ လူငယ်တွေ ဆံပင်ဆေးဆိုးတာ တွေ့ပြီး ခေါင်းက ဆံပင်ကို ရွှေရောင် ဆေးဆိုးတာထက် ကိုယ့်ဦးနှောက်ထဲက အတွေး အခေါ်တွေကို ရွှေရောင် တောက်လာအောင် လုပ်သင့်တယ် ဆိုတာမျိုး ရေးခဲ့ဖူးတယ်။ ခုလည်း ကိုယ့်အရွယ်မှာ ရလာတဲ့ အသက်နဲ့ ကိုယ့်ရဲ့ ဆံပင်အောက်က အတွေးအခေါ်၊ အကျင့်အကြံတွေ တကယ် ရင့်ကျက်လာခဲ့ပြီလားလို့ ပြန်စဉ်းစားမိပါတယ်။

လူငယ်တွေ ဖတ်ဖို့ လူငယ်ဆောင်းပါးတွေ အများကြီးရေးခဲ့တယ်။ ကိုယ်သိထားတာတွေ မျှဝေတာပါ။ ကိုယ့်မိဘ၊ ညီအစ်ကို တစ်တွေ၊ ကိုယ်နဲ့ပတ်သက်ရာ ပတ်သက်ကြောင်းတွေ အတွက် တတ်နိုင်သမျှ လုပ်ပေးခဲ့တယ်။ ဒါတွေက အရွယ်နဲ့ အတူ ဖြတ်သန်းရင်း ကျွန်တော်လုပ်ပေးနိုင်ခဲ့တာတွေ။ နောက်မှာ ကျန်နေတာတွေလည်း ရှိသေးရဲ့။

ခေါင်းဖြူလာပြီ ဆိုတာရဲ့နောက်မှာ ကိုယ့်အရွယ်ကို လေးစားအပ်တယ်လို့ ခံယူလာမယ့် လူတချို့ ရှိလာနိုင်တယ်။ ဒီထက်ပိုပြီး အသက်ကြီးလာရင်တော့ ပိုပြီးတော့ အားလုံးက အရေးတယူ ဖြစ်လာနိုင်တယ်။ ဆံပင်ဖြူတယ် ဆိုတာရဲ့ နောက်မှာ အဲဒီလူကြီးတွေ အတွက် သူတို့ရဲ့ အသိဥာဏ်၊ အတွေ့အကြုံတွေက ငါတို့ထက် ပိုတယ်ဆိုတာမျိုး ငယ်ရွယ်သူတွေက ထင်မြင်လာနိုင်တယ်။ အဲဒီအခါမျိုးမှာ ကျွန်တော်ကိုယ်တိုင်က တကယ်ကို လေးစားအပ်တဲ့လူ ဖြစ်နေမလား၊ တကယ်ကို ရင့်ကျက်တဲ့လူ ဖြစ်နေမလား ဆိုတာကို ကျွန်တော် မသိနိုင်ပေမယ့် ရှိသင့်ရှိထိုက်တဲ့ ဆံဖြူတစ်ယောက်ရဲ့ အရည်အချင်း မျိုးတွေ ရှိနေစေဖို့တော့ ခုကတည်းက ဆံပင်ဖြူတွေ ကြည့်ရင်း အတွေးဝင်နေမိတယ်။

ဘာပဲဖြစ်ဖြစ် အရွယ်ဆိုတာက ညာလို့မှ မရတာ။ အဲဒီညာလို့မရတဲ့ အရွယ်ကို ဖြတ်သန်းရင်း တန်ဖိုးရှိရှိနဲ့ ဘ၀ကို ကုန်လွန်ချင်တယ်ဆိုတာကတော့ ကျွန်တော်မျှော်မှန်းထားတဲ့ အနာဂတ်တစ်ခုပါပဲ။ ခုချိန်မှာ ဆံပင်တွေ နက်နေသေးပေမယ့် အားလုံးဖြူလာတဲ့အခါ ကျရင်တော့ အရွယ်ရဲ့ တန်ဖိုးနဲ့ အရွယ်နဲ့ ထိုက်တန်တဲ့ ဂုဏ်ဒြပ်တွေကို ကျွန်တော် ပိုင်ဆိုင်နိုင်လိမ့်မယ်လို့ ဆံပင်ဖြူတွေကို မြင်တိုင်း အတွေးပွားနေမိတာပါပဲ။ ။

ဆူးသစ်
၂၀:၅၁ နာရီ
၎.၃.၂၀၁၂

" ကျွန်တော်အကြိုက်ဆုံး စာရေးဆရာ "

တစ်ပင်တည်း

ရင်ထဲကနွယ်။
ခက်ညွန့်သန် နုသစ်လို့
ရစ်ပတ်နှောင်တွယ်။
သံယောဇဉ် ဆိုတာရယ်
နွယ်ကလေး တစ်မျှင်ပေါ့။
ရာသီတွေ ဘယ်လိုပြောင်းပေမယ့်
ခေါင်းထောင်လို့ကြော့။ ။

ဒီကဗျာလေးကို တော်တော်များများတော့ ကြားဖူးကြမယ်ထင်ပါတယ်။ ဆရာနွမ်ဂျာသိုင်း ရဲ့' တစ်ပင်တည်း ရင်ထဲကနွယ်' ဆိုတဲ့ လုံးချင်း ၀တ္ထုမှာ ပါခဲ့တာပါ။ ရေးသူကတော့ မောင်စိန်ဝင်း( ပုတီးကုန်း) ပါ။ ' နွယ်' လို့ သူ့ကဗျာကို နာမည်ပေးထားပါတယ်။

တစ်သက်တစ်ခါ
တစ်လွှာတစ်ရွက်
တစ်ခက်တစ်ပွင့်
ငုံအဆင့်မို့
ရင့်လို့ပဲ ၀ါဝါ
ညှာတံပဲ ပြုတ်ပြုတ်
ဖြုတ်ခနဲပဲ ကြွေကြွေ
မြေမှာပဲ ရောက်ရောက်
ဖွဖွလေးကောက်လို့
ပန်းခြောက်ကလေးပဲ မြတ်နိုးမယ်။

ဒါကလည်း မောင်စိန်ဝင်း(ပုတီးကုန်း) ဆိုတဲ့ ကဗျာဆရာ တစ်ယောက်ရဲ့ 'အချစ်ဦး' ဆိုတဲ့ ကဗျာလေးပါ။ လူတော်တော်များများ ကြားဖူးနေမယ်လို့ ထင်ပါတယ်။

ကျွန်တော်လူပျိုပေါက် အရွယ်တုန်းက အချစ်လုံးချင်း ၀တ္ထုတွေ စဖတ်ခဲ့ပါတယ်။ ပထမဆုံး ဖတ်ဖြစ်တာ မောင်သာပြည့် ပါ။ ဒီဘက်ခေတ် လူငယ်တွေ ကြားတောင် ကြားဖူးပါတော့မလား မသိပါဘူး။ ကျွန်တော်တို့ ငယ်ငယ်က နေခဲ့တဲ့ စမ်းချောင်းမြို့နယ်မှာ သူနေပါတယ်။ ကျွန်တော်တို့နဲ့ တစ်မြို့နယ်ထဲမှာ ဆိုတော့ စာရေးဆရာတစ်ပိုင်း၊ စာပေစာနယ်ဇင်း အဖွဲ့ဝင်တစ်ပိုင်း ဖြစ်တဲ့အဖေနဲ့ ဆရာ မောင်သာပြည့် တို့ ရင်းနှီးခဲ့တော့ စာအုပ်တွေ အကုန်ရခဲ့ပါတယ်။ ဒီတော့ အိမ်မှာရှိတဲ့ ကျွန်တော်တို့က အချစ်ဝတ္ထုတွေ တော်တော် ဖတ်ဖြစ်ပါတယ်။

အဲဒီအချိန်က ဆရာမောင်သာပြည့်ရဲ့ အောင်မြင်မှုဟာလည်း ကြောက်ခမန်းလိလိပါ။ သူ့ရဲ့ ဇာတ်ကောင်တွေမှာ အမြဲပါနေကျ နာမည်တွေဖြစ်တဲ့ ရဲတို့၊ အောင်တို့ကနေ သူ့ဇာတ်ကောင်နာမည်ကို သဘောကျလို့ ပေးထားတယ် ဆိုတဲ့ မင်းသားတစ်လက်တောင် မြန်မာ့ရုပ်ရှင်လောကမှာ ပေါ်ထွက်လာခဲ့ ပါတယ်။ သူကတော့' ကျော်ရဲအောင် 'ပါ။

နောက်တော့ ကျွန်တော်တို့အိမ်ကို မောင်စိန်ဝင်း(ပုတီးကုန်း) နာမည်နဲ့ အချစ်လုံးချင်း ၀တ္ထုတွေ စရောက်လာပါတယ်။ အဲဒီတုန်းက ကျွန်တော့်အဖေက ကြို့ပင်ကောက်မှာ အထက်တန်းကျောင်း အတူတက်ခဲ့တဲ့ သူ့သူငယ်ချင်း ရေးတာလို့ပြောတယ်။ ဒီလိုနဲ့ မောင်စိန်ဝင်း(ပုတီးကုန်း) ဆိုတဲ့ စာရေးဆရာတစ်ယောက် ဆီက စာအုပ်တွေ လက်ဆောင် ရလာတယ်။ ရန်ကုန်မှာ သူတို့နှစ်ယောက် အဆက်အသွယ်ရှိတယ်တဲ့။ အခု စာပေလောကမှာ အောင်မြင် လာပြီတဲ့။ ဒါနဲ့ မောင်စိန်ဝင်း(ပုတီးကုန်း) ဆိုတဲ့ စာရေးဆရာ တစ်ယောက်ကို ကျွန်တော်လူပျိုပေါက် အရွယ်မှာ စသိခွင့်ရပါတယ်။ အမှန်အတိုင်းပြောရရင် အဲဒီအချိန်တုန်းက သူ့ကလောင်နာမည်ကို ကြည့်ပြီး သိပ်စိတ်ဝင်တစား မဖြစ်ခဲ့ပါဘူး။ ဘာဖြစ်လို့လဲဆိုတော့ သူ့ကလောင်နာမည်က တည့်တည့်ပြောရရင် လူငယ်တွေအတွက် နည်းနည်းရိုးလွန်းနေလို့ပါ။

ဒါပေမဲ့ သူ့စာအုပ်တွေ စဖတ်တော့မှ သူ့အရေးအသားတွေကို စိတ်ဝင်စားလာမိပါတယ်။ ပထမဆုံး သတိထားမိတာ သူ့ရဲ့ကဗျာပါ။ သူက ကဗျာအရေးကောင်းတယ်လို့ ကျွန်တော်ထင်မိတယ်။ နောက်တော့ သူ့စကားပြေ အရေးအသားတွေကို ကျွန်တော်ကြိုက်လာတယ်။ အရေးအသားပြေပြစ်တယ်။ ဆွဲဆောင်မှု ရှိတယ်။ ဖြစ်ချင်တော့ ကျွန်တော်က အဲဒီအချိန်မှာ ကဗျာရူး၊ စာရူး ဘ၀ကို စနေပါပြီ။ ဒီအချိန်မှာ သူ့ကဗျာတွေကို ဖတ်ခွင့်ရတာ ကျွန်တော့်အတွက်တော့ ရေငတ်တုန်း ရေတွင်း ထဲကျတာပါပဲ။ ကျွန်တော်က ကဗျာရေးနည်းတွေကို စပြီးလေ့လာနေတဲ့အချိန်မို့လို့ပါ။

နောက်တော့ 'သောကခြေရာ ရတနာ' ဆိုတဲ့ သူ့ကဗျာစာအုပ်ကို ဖတ်ရပါတယ်။ တော်ရုံပါရမီရှင် မဟုတ်ဘူးဆိုတာ ကျွန်တော်သိလိုက်ပါတယ်။ သူ့ကဗျာနဲ့ပတ်သက်ပြီး ဆောင်းပါးရေးထားတဲ့ ဆရာ အောင်သင်းက ' တပေါင်းနေ ချောင်းရေကို ငုံ့အသောက် ' ဆိုတဲ့စာသားကို ဖတ်ပြီး ဒီလိုစာသားမျိုးတွေက ပါရမီရှိတဲ့ မောင်စိန်ဝင်း(ပုတီးကုန်း) လိုလူမျိုး ဆီကိုပဲ လာတတ်ကြောင်း မှတ်ချက်ပေးထားပါတယ်။ ကျွန်တော့်ဆီကို အဲဒီလို စာသားတွေ လာမလား လို့တောင် ကျွန်တော်တွေးခဲ့မိပါသေးတယ်။ ကျွန်တော်က စာပေနဲ့ပတ်သက်ပြီး တော်တော်ရူးသွပ်နေတာကိုး။

နောက်တော့ သူ့ ၀တ္ထုစာအုပ်တွေဖတ်ရင်း ကျွန်တော် သူ့ကဗျာတွေထဲက တချို့ကို အလွတ်ရလာပါတယ်။

မြင်ကတည်းက
ရင်ထဲက စွဲခဲ့တယ် မဏိစန္ဒာ။
ဘုရင့်ဘဏ္ဍာ မတော်မတရားနဲ့
အရှင့်အာဏာ စော်ကားခဲ့မိသူမို့
ဪ-ဓားထိကာ အသေသတ်ရင်လည်း
ကျေနပ်မှာပါ။
မလျော်တာ အခက်ကြံဆခဲ့မိသူမို့
အနော်ရထာ မျက်မာန်ရှမှာလည်း
ခံရမယ် အသေအချာသိပေမယ့်
ဝေဒနာရှိသူ ရင်မှာ မအေးလေတော့
သေဘေးကိုတဲ့ မမြင်သာ
အကြင်နာက နှစ်ဆင့်ပိုကဲ။
မသင့်လျော်တာ ချစ်လာခဲ့မိသူမို့
အရှင့်အပေါ်မှာ သစ္စာမဲ့သူလို့
ကဲ့ရဲ့ကာ ဆိုချင်ဆို
ငြိုငြင်လိုက ငြိုငြင်လိုက်
ကိုယ့်ထိုက်နဲ့ ကိုယ့်ကြမ္မာပေါ့
လက်လွှဲကာ ရှေ့တော်ဆက်ရပေမယ့်
မွေ့ပျော်ရက်တယ် သခင်ထင်သလား
ရင်ခွင်မှာ ဆယ်နေကဲသလို
အမြဲ ပူလောင်လှချည်ရဲ့
ကြိုးနှောင်ကာ အရှင်တည်းပါလို့
ရင်ထဲကို လှံမထိခင်က
ချစ်မိသူ အသည်းကြွေပြုန်းကာ
(မဏိစန္ဒာရယ်.........)ကိုယ်ကတော့
အမြဲသေဆုံးခဲ့ပြီပဲ။ ။

' အရိန္ဒမာ သိပါသည် ' ဆိုတဲ့ လုံးချင်းဝတ္ထုထဲကပါ။ ကျွန်တော်တို့ကြားဖူးတဲ့ အနော်ရထာ၊ ကျန်စစ်သား နဲ့မဏိစန္ဒာတို့ရဲ့ နောက်ခံဇာတ်ကြောင်းကို ဖွဲ့ထားတဲ့ကဗျာပါ။ ကျွန်တော့်အစ်ကိုကြီးလည်း တော်တော် ကြိုက်ခဲ့တဲ့ ကဗျာပါ။

သူ့ဝတ္ထုတွေထဲမှာ ကျွန်တော်တော်တော်ကြိုက်ခဲ့တဲ့ လုံးချင်းတွေက တော်တော်များပါတယ်။ မှတ်မှတ် ရရ ပြောရမယ်ဆိုရင် "ပြန်ပြောချင်တဲ့ သံယောဇဉ်ဖွဲ့ စကားလေးတွေ" ဆိုတဲ့လုံးချင်းပါ။ ယောကျာ်းတွေကို အထင်မကြီးတဲ့ အမျိုးသမီးတစ်ယောက်က လုပ်ငန်းခွင်ထဲက အင်ဂျင်နီယာတစ်ယောက်ရဲ့ လေးစားအပ်တဲ့ စိတ်ဓာတ်ကို တွေ့ပြီး သူတို့နှစ်ယောက် ချစ်သူတွေဖြစ်သွားတဲ့ ဇာတ်လမ်းပါ။ ဇာတ်ရဲ့ အလှည့်အပြောင်းတွေ ကတော့ အများကြီးပါ။ ဖတ်ရင်းနဲ့ကို တော်တော်သဘောကျမိတဲ့ ၀တ္ထုပါ။

နောက်တစ်အုပ်ကတော့ " ပန်းရိပ်မှာ လွမ်းလိပ်ပြာဝဲ " ဆိုတဲ့ လုံးချင်းပါ။ အလုပ်ထဲမှာ လူ့အသက်ကယ် အနစ်နာခံ ကူညီရင်း မျက်လုံးကန်းသွားလို့ ချစ်သူကို အထင်လွဲအောင် လုပ်ပြီး တမင်လမ်းခွဲခဲ့တဲ့ လူတစ်ယောက်အကြောင်းပါ။ ဖတ်ပြီးတဲ့ အချိန်မှာ ရင်ထဲမှာ နင့်နေအောင်ကျန်ခဲ့တဲ့ ၀တ္ထုပါ။ အဲဒီ လုံးချင်းရဲ့ အဓိက ကဗျာကိုတော့ ကျွန်တော် မှတ်မိနေပါသေးတယ်။

ပန်းရိပ်မှာ
လွမ်းလိပ်ပြာဝဲ။
အနုသယလမ်းမှာ
သမုဒယပန်း မခြွေသာတော့
ဝေဒနာ ၀တ်ရည်ဖြစ်ပါလို့
သံယောဇဉ် အမျှင်သစ်တွေနဲ့
ယစ်မူးတွယ်တာ နမ်းရှိုက်နေဆဲမှာပဲ
( အချစ်ရယ်....ရင်ထဲမှာတော့)
ကျွမ်းမြိုက်ကြေကွဲ။ ။

မောင်စိန်ဝင်း(ပုတီးကုန်း) လို့ သေသေချာချာ သိလာခဲ့ရပြီး နောက်မှာတော့ သူ့ရဲ့စကားလုံး တချို့ကို ကျွန်တော် သတိထားမိလာပါတယ်။ သူသုံးလေ့ရှိတဲ့ စကားလုံးတချို့ပါ။ အနုသယ၊ သမုဒယ၊ သစ်တန်း၊ ဘာသာ၊ ....လေ စတဲ့ စကားလုံးတွေဟာ ဆရာမောင်စိန်ဝင်း(ပုတီးကုန်း) သုံးလေ့ရှိတဲ့ စကားလုံးတွေပါ။ သူ့ရဲ့ ဇာတ်ကောင်တချို့က ကိုယ့်ဘာသာ ပြောရင် ဘာသာ လို့ သုံးပါတယ်။ မှတ်မိမယ်ဆိုရင် "ခပ်စိမ်းစိမ်းပဲ နေပါ့မယ်" ဆိုတဲ့ ၀တ္ထုထဲက ဇာတ်ကောင်အဖြစ် သရုပ်ဆောင်ခဲ့တဲ့ မို့မို့မြင့်အောင်ဟာ ဘာသာ ဆိုတဲ့ စကားကို အဲဒီရုပ်ရှင်မှာ တွင်တွင် သုံးခဲ့ပါတယ်။

သစ်တန်းဆိုတာကတော့ ဆရာ့ရဲ့ သစ်ပင်၊ သစ်ရိပ်တွေကို သုံးတဲ့အသုံးပါ။ အနုသယတို့၊ သမုဒယတို့ ဆိုတာကတော့ ငယ်ငယ်ကတည်းက တရားနဲ့မစိမ်းတဲ့ ဆရာက ပိုပြီး အသုံးများခဲ့တဲ့စကားတွေပါ။ ကဗျာဆရာ ဖြစ်တဲ့ သူ့အတွက် အဲဒီစကားလုံးတွေက တော်တော်လည်း လှပခဲ့ပါတယ်။ ကာရန်က ညီနေတာကိုး။ .......လေ ဆိုတာကတော့ ဆရာမောင်စိန်ဝင်း(ပုတီးကုန်း)ရဲ့ ကိုယ်ပိုင်စတိုင် ဘာသာ ဆိုတဲ့စကားလို စာကြောင်းအချမှာ သုံးတဲ့ စကားလုံးပါ။ ဥပမာ-တွယ်ငြိတတ်လျှင် ရင်မောရ ပါသည်လေ......ဆိုတာမျိုးပါ။

ဆရာ မောင်စိန်ဝင်း(ပုတီးကုန်း)ရဲ့ ၀တ္ထုတွေထဲမှာ ကျွန်တော့်အတွက် နောက်ထပ်မှတ်မှတ်ရရ ဖြစ်စေတဲ့ ၀တ္ထုတွေ ရှိပါသေးတယ်။

လျှောက်ရဲသလား
နှစ်ယောက်တည်း သွားမယ်မေ။
လမ်းမပြေ ကြမ်းနေခဲ့ရင်လည်း
အနမ်းဝေ အပန်းဖြေလှည့်ပါကွယ့်
(လျှောက်ရမှာကတော့... )
ပန်းခြွေတဲ့နွေ။
ဘ၀ရာသီအလှည့်မှာ
အလှယာယီ ဖွဲ့လေသလား
ပြာရီလဲ့ ဆင်းပြေပြေ
ဪ-နှင်းဝေလို့ မှုန်ရီလောင်း။
သောကနှင်းတွေလား
မောဟနှင်းတွေလား
လောကတွင်းမှာ မှုန်ရီဝဲလေမှ
(သူ့ကိုလေ) ယုံကြည်ရဲစွာ နားလည်သမျှ အမှားဖြစ်အောင်
ထားရစ်ကာ ကျွမ်းစေခဲ့သူရဲ့
အနမ်းတွေနဲ့ အလွမ်းတွေဖွဲ့ ဖြေမပြေ မင်းစေတဲ့ အကြောင်းပါပဲ
(အချစ်ရယ်...ရင်ထဲမှာတော့)
ပန်းခြွေတဲ့နွေ နှင်းဝေတဲ့ဆောင်း။ ။

"ပန်းခြွေတဲ့နွေ နှင်းဝေတဲ့ဆောင်း" ဆိုတဲ့ ၀တ္ထုထဲကပါ။

ဆရာမောင်စိန်ဝင်း(ပုတီးကုန်း)ရဲ့ ၀တ္ထုတွေကို ကျွန်တော်ဘာလို့ ပြန်မှတ်မိလဲ ဆိုရင် သူ့ကဗျာတွေ ကြောင့်ပါ။ သူ့ကဗျာတွေကို ဘာလို့မှတ်မိလဲ ဆိုရင် အသံ သာတာရယ်၊ သူ့ဝတ္ထုတွေရယ် ကြောင့်ပါ။ ဒီတော့ ပြန်စဉ်းစားကြည့်ရင် အပြန်အလှန် ဆက်စပ်နေတာ သွားတွေ့ရပါတယ်။ ဆရာအောင်သင်း ပြောတဲ့ စကားကို ဖောက်သည် ချရရင် သူ့ကဗျာတွေဟာ သူ့ဝတ္ထုတွေအတွက် ဇာတ်ဝင်သီချင်းတွေပါပဲ။ အဲဒါကြောင့် ကျွန်တော်လည်း အလွတ်ရတဲ့အထိ မှတ်မိနေတာ ဖြစ်ပါလိမ့်မယ်။

ရိုးရိုးသားသား ၀န်ခံရရင် ကျွန်တော့်လက်ထဲမှာ ရေးပြီးသား ကဗျာအပုဒ်ရေ တစ်ထောင်ကျော်ရှိပါတယ်။ ဘယ်နှစ်ပုဒ်များ အလွတ်ရလဲမေးရင် လက်ဆယ်ချောင်းတောင် ပြည့်မှာမဟုတ်ပါဘူး။ ဒါပေမဲ့ ကျွန်တော့်ဘာသာ တစ်ခါတစ်ရံ စိတ်ကူးပေါက်လို့ ကဗျာတွေ တီးတိုးရွတ်ဖြစ်ရင် ကျွန်တော့်ကဗျာကိုတောင် ကျွန်တော် မရွတ်ဖြစ်ပါဘူး။ ဆရာမောင်စိန်ဝင်း(ပုတီးကုန်း)ရဲ့ ကဗျာတွေကိုသာ ရွတ်ဖြစ်ခဲ့ပါတယ်။ အဲဒါကိုက ဆရာမောင်စိန်ဝင်း(ပုတီးကုန်း)ရဲ့ ထူးခြားချက်လား၊ ပါရမီလား ဆိုတာ ကျွန်တော်မသိပါဘူး။

ခုန လုံးချင်းကိစ္စ ပြန်ဆက်ရရင် အဲဒီ "ပန်းခြွေတဲ့နွေ နှင်းဝေတဲ့ဆောင်း" ဆိုတဲ့ ၀တ္ထုဟာ ရုပ်ရှင်မင်းသမီး ဖြစ်သွားတဲ့ ချစ်သူ အမျိုးသမီးကိုတော့ စွပ်စွဲချင်ရာစွပ်စွဲ၊ ထင်ချင်ရာထင်ခဲ့ပြီးမှ ကိုယ်တိုင်အောင်မြင်တဲ့ စာရေးဆရာ ဖြစ်လာတဲ့အခါကျတော့ အောင်မြင်မှုကို ယစ်မူးသွားတဲ့ လူတစ်ယောက် အကြောင်းကို ရေးဖွဲ့ထားတာပါ။ နှစ်အုပ်တွဲ ၀တ္ထုပါ။ တကယ်တော့ ၀တ္ထုရှည်ကို နှစ်အုပ်တွဲ ရေးရတာ ခက်တယ်ဆိုတာ အဲဒီအချိန်တွေ ကတည်းက လုံးချင်းတွေ စမ်းပြီး ရေးနေတဲ့ ကျွန်တော် သိခဲ့ပါတယ်။ ဒါပေမဲ့ ဆရာမောင်စိန်ဝင်း (ပုတီးကုန်း) ရေးထားတဲ့ နှစ်အုပ်တွဲတွေကျတော့ တော်တော် ဖတ်လို့ကောင်းပါတယ်။ "ပန်းခြွေတဲ့နွေ နှင်းဝေတဲ့ဆောင်း" ဆိုရင် ပထမအုပ်မှာကိုက ဇာတ်လမ်းဆုံးခါနီးမှာ နောက်တစ်အုပ်ကို ဆက်ဖတ်ချင်လောက်အောင် ဆွဲခေါ်သွားခဲ့ပါတယ်။ ကျွန်တော်ဆို နောက်တစ်အုပ်ဖတ်ချင်လွန်းလို့ မနည်းအောင့်အည်း သည်းခံခဲ့ရဖူးတယ်။

နောက်ထပ် ကျွန်တော်ကြိုက်တဲ့ နှစ်အုပ်တွဲဝတ္ထုကတော့ " နှလုံးသားတောင်ထိပ်က အလွမ်းမိုးရိပ်တွေပါညို" နဲ့" မျက်ဝန်းထဲမှာ မိုးရွာပြီညို " ဆိုတဲ့ ခေါင်းစဉ်ပါ နှစ်မျိုးပေးထားတဲ့ ၀တ္ထုပါ။ ရုပ်ရှင်ရိုက်ခဲ့ပါတယ်။ မောင်၊ ညို နဲ့ တိုက်ဒ်ဆိုတဲ့ ဇာတ်ကောင်သုံးယောက်ကို လှလှပပဖွဲ့ပေးထားတာပါ။

စာရေးဆရာတွေမှာ ရာသီနဲ့ပတ်သက်ပြီး အစွဲရှိတယ်ဆိုရင် ကျွန်တော့်အမြင် ပြောရရင် ဆရာမောင်စိန်ဝင်း (ပုတီးကုန်း) ဟာ မိုးကို တော်တော်စွဲလမ်းပုံရတယ်လို့ ကျွန်တော်ထင်မိပါတယ်။ သူတပ်ထားတဲ့ အဲဒီဝတ္ထုခေါင်းစဉ်သာမက နောက်ထပ် ၀တ္ထုတစ်အုပ်ရဲ့ ခေါင်းစဉ်တစ်ခုမှာလည်း မိုးကိုတွေ့ရပါသေးတယ်။ အဲဒါကတော့ " ပြိုမယောင် ဟိုတောင်ကမိုး" ပါ။

ညို..ညို..ညို့၍
ဟို့မှာမှောင်ရီ၊ ရွာတော့မည်လား
ထင်မှတ်မှားအောင်
ပြိုမယောင်နှင့်၊ ဟိုတောင်ကမိုး...။

ဆရာမောင်စိန်ဝင်း(ပုတီးကုန်း) ဖွဲ့ထားတာက တော်တော်လှပါတယ်။ နောက်ထပ် "ကလောမိုး" ဆိုတဲ့ ကဗျာမျိုးလည်း သူရေးခဲ့ပါသေးတယ်။ အဲဒီကဗျာကိုတော့ ကျွန်တော်အလွတ်မရပါဘူး။

ဆရာမောင်စိန်ဝင်း(ပုတီးကုန်း) နဲ့ပတ်သက်လို့ နောက်တစ်ခု ပြောစရာရှိတာက ကဗျာဆရာမို့လို့လား မသိပါဘူး။ စကားပြေမှာ ကဗျာဆန်တဲ့၊ လှတဲ့ အဖွဲ့လေးတွေ သူ့ဝတ္ထုတွေထဲမှာ တွေ့ရပါတယ်။ ကျွန်တော်မကျက်ဘဲ မှတ်မိနေတဲ့ စာသားလေးတစ်ဖွဲ့က ဒီလိုဆိုပါတယ်။

ဘယ်သူမသိသိ၊ သူသိရင် ကျေနပ်တယ်။
ဘယ်သူမရှိရှိ၊ သူရှိရင် ပြည့်စုံတယ်။
ဘယ်သူတွေ ဘယ်လောက်ပဲ မေ့ထား၊ မေ့ထား၊ သူမေ့သွားမှာပဲ တွေးပူတယ်။
အဲဒီလို သမုဒယစကား၊ အခုဘ၀မှာ သူကြားမှကြားနိုင်ပါတော့မလားလေ.....။

အဲဒီလို စာသားလေးတွေဟာ သူ့ဝတ္ထုရဲ့ အစမှာ ပါတတ်ပါတယ်။ သီးခြားဖော်ပြထားတာပါ။ တကယ်တော့ အဲဒီစာသားဟာ ဇာတ်ရဲ့ အလယ်မှာ၊ ဒါမှမဟုတ် ဇာတ်ရဲ့အဆုံးမှာ ဖြစ်ချင်ဖြစ်ပါလိမ့်မယ်။ ဒါပေမဲ့ အဲဒီစာသားတွေကို စာအုပ်အစမှာ ဖတ်မိတဲ့ ကျွန်တော်တို့ကတော့ စာအုပ်ကို မဖတ်ဘဲ မနေနိုင်အောင် ဖြစ်ခဲ့ မိတာကတော့ အသေအချာပါပဲ။

ဒီလိုစာသား၊ ဒီလိုကာရန်တွေနဲ့ကြောင့်ပဲ ထင်ပါရဲ့။ ဆရာမောင်စိန်ဝင်း(ပုတီးကုန်း)ရဲ့ကဗျာတချို့ဟာ သီချင်းတွေ ဖြစ်လာခဲ့ပါတယ်။ အဲဒီ သီချင်းတွေကိုလည်း ကျွန်တော် ကြိုက်ခဲ့ပါတယ်။ နဂိုကတည်းက ကဗျာက နားမှာ စွဲပြီးသားကိုး။ မျက်သွယ်၊ ရတနာသူ၊ ချစ်သူသိလေ၊ အချစ်ဦး စတဲ့ သီချင်းတွေဟာ ကဗျာမှာ ကတည်းက လူတိုင်းနီးပါး သိခဲ့ကြတာပါ။ ကျွန်တော်တို့က ကိုတိုးကြီးလို့ ချစ်စနိုးနဲ့ ခေါ်တဲ့ ခင်မောင်တိုးကပဲ ဆရာမောင်စိန်ဝင်း(ပုတီးကုန်း)ရဲ့ ကဗျာတွေကို သံစဉ်ဖွဲ့ပြီးရင် အမြဲ ဆိုခဲ့တာပါ။ တစ်ကျောင်းတည်းက သူငယ်ချင်းတွေ မို့လို့လားတော့ မသိပါဘူး။ ဒါပေမဲ့ အဲဒီသီချင်းတွေကလည်း ကိုတိုးကြီး ဆိုတာက ကျွန်တော်တို့ အတွက် ပိုနားဝင်ကောင်းနေပါတယ်။ ကဗျာတွေကို ခံစားပြီးသား ဖြစ်နေလို့ပဲ ထင်ပါရဲ့။

နောက်ထပ်မှတ်မိနေတာက ဆရာမောင်စိန်ဝင်း(ပုတီးကုန်း)ရဲ့ လုံးချင်းတွေ ရုပ်ရှင်ရိုက်ရတာကိုပါ။

သံယောဇဉ် အမျှင်တန်းကို
ရှင်ခန်း ဘယ်သူဖြတ်နိုင်ပါ့
ပူတတ်သူ တစ်သက်နွမ်းရော့လို့
လက်ကမ်းကာ ဝေဒနာမမျှချင်လည်း
ဘ၀နွေ အနုသယတောမှာ
သမုဒယအမောတွေ တစ်ဇာတ်သိမ်းအောင်
( အချစ်ရယ်....)
ခပ်စိမ်းစိမ်းပဲ နေပါ့မယ်။ ။

အပေါ်တုန်းက ကျွန်တော်ပြောခဲ့တဲ့ မို့မို့မြင့်အောင် သူ့ကိုယ်သူ ဘာသာ၊ ဘာသာ လို့တွင်တွင်သုံးခဲ့တဲ့ "ခပ်စိမ်းစိမ်းပဲ နေပါ့မယ် " ဆိုတဲ့ ၀တ္ထု ထဲက ကဗျာပါ။ မဝေကလေ လို့ ပြောရင် လေသံကအစနွဲ့တဲ့ အပျိုကြီး အဖြစ် သရုပ်ဆောင်ရတဲ့ မို့မို့မြင့်အောင် အဲဒီကားမှာ အကယ်ဒမီရခဲ့ပါတယ်။ ဇာတ်ကားနာမည်နဲ့ ၀တ္ထုနာမည် အတူတူပါပဲ။ ရုပ်ရှင်ကို ကြိုက်ပါတယ်။ ၀တ္ထုနဲ့ အနီးဆုံးတူအောင် ရိုက်နိုင်လို့ပါ။ ရဲအောင်လည်း လူလားမြောက်သွားခဲ့တဲ့ ဇာတ်လမ်းလို့ ပြောလို့ရပါတယ်။

နောက်တစ်ကားက " အရိန္ဒမာ သိပါသည်" ကို ပြန်ရိုက်ထားတဲ့ "မပြောလည်း သိပါတယ်" ဆိုတဲ့ ဇာတ်ကားပါ။ မကြိုက်ပါဘူး။ မေဆွိက ဇာတ်ကောင် မင်းသမီးနေရာက သရုပ်ဆောင်ထားပါတယ်။ ဆရာမောင်စိန်ဝင်း (ပုတီးကုန်း)ရဲ့ ဇာတ်ကောင် မင်းသမီးတွေဟာ များသောအားဖြင့် တည်ငြိမ်တဲ့ဇာတ်ရုပ် ရှိသူများပါတယ်။ မေဆွိနဲ့ လုံးဝမလိုက်ပါဘူး။ ၀တ္ထုကို လုံးဝမမီပါဘူး။

"အကြွေပန်းပေမယ့် ရွှေနန်းတော့ ထိုက်ချင်တယ်" ဆိုတဲ့ ဇာတ်ကားနဲ့ ၀တ္ထုနာမည်တူတဲ့ ရုပ်ရှင်ကတော့ ကျော်သူနဲ့ မို့မို့မြင့်အောင် အတွဲမို့ ကျွန်တော်ကြည့်ရတာ အားရခဲ့ပါတယ်။ နှစ်အုပ်တွဲကို ရိုက်ထားတဲ့ "မျက်ဝန်းထဲမှာ မိုးရွာပြီညို" ကတော့ စိုးသူ၊ ရဲအောင်၊ မေသန်းနု အတွဲပါ။ စိုးသူဟာ မောင် ဇာတ်ကောင်နေရာမှာ မဖြစ်ခဲ့ပါဘူး။ ကျန်တဲ့နှစ်ယောက်ကတော့ ဇာတ်ကောင်စရိုက်ကို နိုင်သွားတယ်လို့ ထင်ပါတယ်။

ကျန်တဲ့ရုပ်ရှင်၊ ဗွီဒီယို ဖြစ်သွားတဲ့ကားတွေ ရှိပါသေးတယ်။ နှင်းဆွတ်တောင်ပြန်လေ၊ မေ့မှာစိုးတယ် စတဲ့ကားတွေပါ။ ကျွန်တော်အားလုံးတော့ မမှတ်မိတော့ပါဘူး။ ဒါပေမဲ့ များသောအားဖြင့် ၀တ္ထုကို မမီတာများပါတယ်။ ကျွန်တော့်အထင် စကားပြေရေးတာသန်တဲ့ လုံးချင်းဝတ္ထုတွေကို ရုပ်ရှင်ရိုက်ရင် အပြအားနည်းတတ်တဲ့ သဘောပဲ ထင်ပါရဲ့။ ကျွန်တော်ကတော့ ၀တ္ထုတွေကိုပဲ ပိုကြိုက်မိပါတယ်။

ဆရာမောင်စိန်ဝင်း(ပုတီးကုန်း)ရဲ့ ၀တ္ထုတွေမှာ ကျွန်တော်သတိထားမိတာ တစ်ခုရှိပါတယ်။ အဲဒါကတော့ သူပြောချင်တဲ့ ပြင်ပက အကြောင်းအရာ၊ သူဖတ်ထားတဲ့ စာတွေထဲက အကြောင်းအရာတွေကို ၀တ္ထုထဲမှာ ညှပ်ပြီးထည့်တတ်တာပါ။ ဇာတ်ကောင်တွေ စကားပြောခန်းမှာ ထည့်တာပါ။ ဥပမာ ဆရာဇော်ဂျီနဲ့ ဆရာမင်းသုဝဏ်တို့ ကဗျာအကြောင်း ဆွေးနွေးတာမျိုးပါ။ အဲဒီအတွက် ကျွန်တော်တို့ဟာ အချစ်ဝတ္ထုဖတ်ရင်း မှတ်သားစရာတွေလည်း တိုးပါတယ်။ တည့်တည့်ပြောရရင် သူများတွေ ရေးတဲ့ အချစ်ဝတ္ထုတွေ လို ဖေတော့မောင်တော့ မဟုတ်ခဲ့ဘူး ဆိုတာပါပဲ။ အဲဒီလို ဖြစ်အောင်လုပ်နိုင်တာကိုက စာရေးဆရာရဲ့ အတတ်ပညာလို့ ကျွန်တော်ယုံပါတယ်။ စာဖတ်သူကို ကိုယ်ပေးချင်တဲ့ Message တစ်ခုကို စာဖတ်သူ ဖတ်ရင်းပျော်ဝင်နေချိန်မှာ ပေးလိုက်နိုင်တာကိုက ပညာပါပဲ။

နောက်ထပ် ကျွန်တော်နှစ်ခြိုက်မိတာက ဆရာမောင်စိန်ဝင်း(ပုတီးကုန်း)ရဲ့ စာအုပ်အဖုံးက ပန်းချီပါ။ အဲဒီ အချိန်တွေတုန်းက ပန်းချီမျိုးမြင့် ဆွဲပါတယ်။ တော်တော်လေးကို ကြည့်လို့ကောင်းသလို ဆရာမောင်စိန်ဝင်း (ပုတီးကုန်း)ရဲ့ ဇာတ်ကောင်တွေနဲ့ သိပ်လိုက်ပါတယ်။ သစ်ရွက်လေးတွေရဲ့ အကြောလေးတွေက အစ တော်တော် ပီပြင်လွန်းပါတယ်။ နောက်ပိုင်း ပန်းချီမျိုးမြင့် နိုင်ငံခြားထွက်သွားတယ်လို့ ကြားရပါတယ်။ အဲဒီတော့ ပန်းချီမောင်မောင်သိုက် ဆက်ဆွဲပါတယ်။ ကျွန်တော်ကတော့ ပန်းချီမျိုးမြင့် ကို ပိုကြိုက်ပါတယ်။

ဆရာမောင်စိန်ဝင်း(ပုတီးကုန်း)ရဲ့ ကဗျာစာအုပ်တွေမှာတော့ ပန်းချီစံတိုး ဆွဲသလို နောက်ပိုင်း တချို့ စာအုပ်တွေမှာတော့ မမွှေး လည်း ဆွဲပါတယ်။ အားလုံးရဲ့ လက်ရာတွေဟာ စာအုပ်အတွက် တော်တော်လေး ပံ့ပိုးပေးနိုင်လို့ ကျွန်တော် တော်တော်ကြိုက်ခဲ့ပါတယ်။ ကျွန်တော်သာ လုံးချင်းတွေ ထုတ်ဖြစ်ရင် အဲဒီပန်းချီဆရာ၊ ဆရာမတွေ သုံးမယ်လို့တောင် စိတ်ကူးယဉ်ခဲ့မိတာပါ။

ဆရာမောင်စိန်ဝင်း(ပုတီးကုန်း)ရဲ့ ၀တ္ထုတွေ ကြိုက်ရခြင်းထဲက နောက်ထပ် အကြောင်းအရာတစ်ခုကတော့ သူဟာ ရန်ကုန်စက်မှုတက္ကသိုလ် ကျောင်းသား ဖြစ်နေတာလည်း ပါပါတယ်။ သူ့ဝတ္ထုတွေထဲမှာ ကျွန်တော် တက်နေတဲ့ ရန်ကုန်စက်မှုတက္ကသိုလ်အကြောင်းတွေ ပါနေတာကိုး။

တစ်ချိန်က၊ ကျွန်တော်တို့ လူပျိုပေါက်အရွယ်က၊ ရန်ကုန်စက်မှုတက္ကသိုလ် တက်နေစဉ်ကာလက စွဲစွဲလမ်းလမ်း ဖတ်ခဲ့တဲ့ ၀တ္ထုတွေကို ပြောပါဆိုရင် ကျွန်တော်ကတော့ ဆရာမောင်စိန်ဝင်း(ပုတီးကုန်း)ရဲ့ ၀တ္ထုတွေလို့ပဲ ပြောရမှာပါ။

ဘာပဲဖြစ်ဖြစ် လူတစ်ယောက်ရဲ့ ဘ၀မှာ ကိုယ်နှစ်သက်မိတဲ့၊ ၀ါသနာပါတဲ့ အရာတစ်ခုကို လုပ်နေရရင် ကျေနပ်ဖို့ ကောင်းလှပါတယ်။ အဲဒီလိုကျေနပ်ဖို့ ကောင်းတဲ့ကြားက ကိုယ်နှစ်သက်လေးစားတဲ့ အနုပညာရှင်ရဲ့ လက်ရာတွေကို အမြဲထိတွေ့ခွင့် ရနေတာကလည်း ပိုပြီး နေပျော်စရာပါ။

စာပေ၀ါသနာပါတဲ့ ကျွန်တော့်အတွက်တော့ စာတွေဖတ်နေတဲ့အချိန်မှာပဲ ကိုယ်ကြိုက်တဲ့ စာရေးဆရာ တစ်ယောက်ရဲ့ အရသာရှိတဲ့စာတွေကို ဖတ်ပြီးနေခဲ့ရတာကို တော်တော်ကြီးကို ကျေနပ်မိသလို၊ ပြန်တွေးမိ တိုင်းလည်း ဆရာ မောင်စိန်ဝင်း(ပုတီးကုန်း) ကို လေးစားကျေးဇူးတင်နေတုန်းပါပဲ။ ဘာဖြစ်လို့လဲ ဆိုတော့ ကျွန်တော်တို့ ရှာဖွေမရရှိနိုင်တဲ့ အနုပညာရဲ့ အသီးအပွင့်တွေကို ခံစားခွင့်ပေးခဲ့လို့ပါ။ ။

ဆူးသစ်

၂၁:၁၃ နာရီ

၂၀.၂.၂၀၁၂

" ဖေဖော်ဝါရီ ဆယ့်သုံးဖွား "

မြန်မာတွေအတွက်
ကမ္ဘာမြေက မွေးဖွားပေးခဲ့တယ်
မြင့်မြတ်တဲ့ သွေးတွေနဲ့ လူတစ်ယောက်ကို။

အကြောက်တရားမသိဘူး
နောက်ထပ်-တစ်ယောက်ဖွားဖို့မရှိဘူး
သူ့လိုလူသားတစ်ယောက်
(မြန်မာရာဇ၀င်မှာတော့...)
တစ်ခေါက်တည်းသိရုံနဲ့ မှတ်သားလောက်တယ်။

ရိုးသားတယ် နိုးကြားတယ်
ပြီးတော့ ကြိုးစားတယ်။
မျှတတယ် သမာသမတ်ကျတယ်
ပြီးတော့ တည်ကြည်တယ်။
ရဲရင့်တယ် သတ္တိရှိတယ်
ပြီးတော့ လုပ်ရဲတယ်။
ထက်မြက်တယ် အစွမ်းရှိတယ်
ပြီးတော့ ဦးဆောင်တယ်။
မွေးဖွားတယ် ရှင်သန်တယ်
ပြီးတော့ သေရဲတယ်။


သူမွေးဖွားတာ တိုင်းပြည်အတွက်
သူရှင်သန်တာ တိုင်းပြည်အတွက်
သူသေဆုံးတာ တိုင်းပြည်အတွက်။

'ဆယ့်သုံး ဖေဖော်ဝါရီ' တဲ့
တကယ့်အဆုံး မြေမဟာပထ၀ီမှာ
ဝေဆာစွာ မြည်တင်ရိုက်ဟည်း
အာဇာနည်တို့ရဲ့ စံကိုက်ကြီးကြီးနဲ့
အချိန်မှန်ကိုက်ပြီး ပေါ်ထွက်လာသူ။

မြန်မာပြည်သူတွေ မျှော်လျက်ရှိတုန်း
ဖုံးနေတဲ့ တိမ်အခင်းကို နှိမ်ခွင်း
ပြီးမှ-နေရောင်လို 'ထိန်လင်း' လာသူ။

မြန်မာပြည် အမှောင်လမ်းကနေ
လွတ်လပ်ရေး အရောင်သမ်းဖို့
'အောင်ဆန်း' ဆိုပြီး ထွန်းတောက်လာသူ။

လွတ်လပ်ရေးရဲ့ ဗိသုကာ
ကျွန်တော်တို့ရဲ့ ပိတု မဟာ
သူသာ ကျွန်တော်တို့ရဲ့ အလင်း
သူသာ ကျွန်တော်တို့ရဲ့ သခင်
သူ့ကို မမြင်ရတော့ပေမယ့်
(ဖေဖော်ဝါရီ ဆယ့်သုံးရောက်ရင်...)
သူဟာ ကျွန်တော်တို့ရင်မှာ အစဉ်ပြန်မွေးဖွားတယ်။ ။

သားလတ်
၁၉:၀၀ နာရီ
၁၂.၂.၁၂

" အရောင်တူများ "

ဟောဒီ နတ်သမီးလက်ထဲမှာ

ပန်းပွင့် ဆယ့်လေးခု အမြဲတမ်း။

သူတို့ကို ရောင်စုံပန်းတဲ့
( ဒါပေမဲ့...)
တစ်သွေးတည်း လန်းနေတဲ့ အလှလို့ဆိုကြ
ကဲ-သူတို့မှသိမယ်။

လွန်ခဲ့တဲ့ ရာသီတွေ ငဲ့ကြည့်ပါ
သက္ကရာဇ်ကို ပြန်ရစ်ပါ
ပြတိုက်များကို သန့်စင်ပါ
သွေးဆေးကန်မှာ ခိုလှုံပါ
ကျုံးရေပြင်ကို ငုံ့ကြည့်ပါ
တောင်တန်းတွေကို စကားပြောပါ
မြစ်ကြီးများကို တံခါးခေါက်ပါ
စာအုပ်စင်များကို စားသုံးပါ
သံစဉ်များကို တူးဖော်ပါ
ကျောက်တိုင်များကို ဖတ်ကြည့်ပါ
(အဲဒီမှာ....)
အရောင်တူ အလှတွေ
ခြေဖျားထောက်နေတဲ့ နတ်သမီးလက်ထဲ
ဟိုးကတည်းက ရင်ငွေ့ခြုံခဲ့မှ
ကဲ-ဘယ်က လက် အနုအကြမ်းတွေက ခြွေနိုင်တော့မှာလဲ။ ။

သားလတ်

၂၂:၅၁ နာရီ

၁၀.၂.၁၉၉၇

[ ( ၅၀) ပြည့်နှစ် ရွှေရတုပြည်ထောင်စုနေ့ အတွက် ရေးခဲ့သော ကဗျာဖြစ်ပါသည်။]

"ကျွန်တော့်မှတ်စု" ( ၁၀ )

"ရန်ကုန်စက်မှုတက္ကသိုလ် သီးသန့်မှတ်စုများ"

+ စက်မှုတက္ကသိုလ်တွင် အဆောင်နေကျောင်းသူကျောင်းသားများအား တစ်နှစ်တစ်ခါ အထူးညစာ ကျွေးပြီး ယင်းညတွင် နှစ်လည်ညစာစားပွဲ အထိမ်းအမှတ် အဖြစ် နေ့ကျောင်းသား၊ ကျောင်းသူကော၊ အဆောင်နေကျောင်းသား၊ ကျောင်းသူများပါ ပါဝင်တင်ဆက်ကြသည့် ခမ်းနားသိုက်မြိုက်လှသော အနုပညာတင်ဆက်ပွဲ တစ်ခု ကျင်းပလေ့ရှိသည်။ ( ယခုနောက်ပိုင်းတွင် ယင်းတင်ဆက်မှု အစဉ်အလာ ကျန်သေးသလား၊ မကျန်တော့ဘူးလား မသိရပါ။ )

[ '၀တ္ထုရေးသော မမြင့်ခိုင်' ဆောင်းပါးမှ- မမြင့်ခိုင်၊ ရင်ခွင်သစ်မဂ္ဂဇင်း၊ မတ်လ၊ ၁၉၉၄ခုနှစ်]

+ သူတို့ကျောင်း၌ သောကြာနေ့တိုင်း ထုတ်ဝေသည့် စာကူးစက်နှင့် လှိမ့်ထားသော ' စက်မှုသတင်းစဉ်' စာစောင်ရှိသည်။
၁၉၇၀ခုနှစ်ဝန်းကျင်- သဇင်က စဥ့်ကူနှင့်ပေါင်း၊ ၄ နာရီမှ ၆ နာရီအထိ မုန့်လုံးရေပေါ်ကျွေး။ [တန်ဆောင်တိုင်ည]။ မြသီရိက ပေါင်မုန့်အုန်းနို့ဆမ်းကျွေး။ ဒီ၊ အီး၊ အက်ဖ်နဲ့ မြသီရိက ပေါင်းတယ်။
အေ၊ဘီ၊စီက ဂျီဟောနဲ့ပေါင်းတယ်။ ညနေပိုင်း ကြာဆံဟင်းခါးနဲ့ ရှောက်သီးသုပ်၊ ညပိုင်းမှာ အဆိုအက၊ မြသီရိက ဂျီဟောမှာလာပေါင်း။ ည ၉ နာရီအထိ။ မနက် ၆ နာရီမှာ ဒူးယားဆောင်က ကထိန်သင်္ကန်းကပ်ပြီး မုန့်ဟင်းခါးကျွေး။

+ ရွှေရတု - Chemical က ယိုးဒယားမုန့်ဟင်းခါး။ Textile က လွယ်အိတ်၊ Mining က လက်ဖက်ရည်ဆိုင်မှာ ဒူးယားရောင်း။ လာဝယ်ပြီး သောက်တဲ့သူတွေကို ရုပ်ရှင်မင်းသမီးတွေက မီးညှိပေး။ Mech: ကလက်ဖက်ရည်။ တက္ကသိုလ် ဓမ္မာရုံရှေ့မှာ ရဟတ်လှည့်။

+ ရွှေရတုနားနီးလေလေ အလုပ်ရှုပ်လေ ဖြစ်လာသည်။ စက်မှုအသင်းက ဆိုင်ခန်းကိစ္စ၊ ရောင်းချရေး အစီအစဉ်များ၊ ဒါတွေအတွက် အစည်းအဝေး ခဏခဏလုပ်သည်။

+ စက်မှုသတင်းစဉ်ကလည်း ရွှေရတုအတွက် အထူးထုတ်ပြုလုပ်ပြီး တက္ကသိုလ်၊ ကောလိပ်ပေါင်းစုံသို့ သွားရောင်းရန် စီစဉ်ထားသည်။ တစ်စောင်- ၅၀ါး

+ မဂ္ဂဇင်းစာအုပ်များထုတ်ပေးသောအခါ ကျောင်းသားကတ်ပြပြီး ထုတ်ရသည်။ မဂ္ဂဇင်းစာအုပ်များ ဖြန့်ချိဖို့ အစည်းအဝေး လုပ်ရသည်။

[ 'ကံ့ကော်တန်းက လွမ်းချင်းရှည်' လုံးချင်း ၀တ္ထုမှ - မောင်စိန်ဝင်း(ပုတီးကုန်း)]

" ကျွန်တော်တို့ အလုပ်ထဲမှာ "

လွန်ခဲ့တဲ့ နှစ်နှစ်လောက်က ကျွန်တော်ဘူကုန်းကျွန်းမှာ ပရောဂျက်တစ်ခု လုပ်ခဲ့ဖူးပါတယ်။ အဲဒီတုန်းက မလေး တရုတ် ကြီးကြပ်ရေးမှူး တစ်ယောက်နဲ့ မြန်မာ တရုတ်ကြီးကြပ်ရေးမှူး တစ်ယောက်တို့ရှိပြီး သူတို့ဟာ အလုပ်ထဲမှာ တည့်မလိုလိုနဲ့ လုံးဝ မတည့် ကြပါဘူး။ ကျွန်တော်က တခြားပရောဂျက်မှာ လုပ်နေရာကနေ လူလိုလို့ ခဏ သွားလုပ်ပေးတာပါ။ အဲဒီတော့ သူတို့အကြောင်းကို လုံးဝသိမထားပါဘူး။

ဒါပေမဲ့ ကျွန်တော်အလုပ်လုပ်နေရင်း တစ်ပတ်နှစ်ပတ်လောက်လည်း ကြာရော သူတို့တစ်တွေရဲ့ ကျိတ်ပြီးခုတ်နေတာတွေ မြင်လာရပါရော။ ဥပမာ- မြန်မာတရုတ်ကြီးကြပ်ရေးမှူးက ပြောပါတယ်။ ကျွန်တော်တို့ ကုမ္ပဏီဟာ အဲဒီဘူကုန်းကျွန်းမှာ တစ်ခါမျှ မလုပ်ခဲ့ဖူးပါဘူးတဲ့။ သူက အရင်က လေးငါးနှစ်လောက် အဲဒီဘူကုန်းကျွန်းမှာ တခြားကုမ္ပဏီနဲ့ လုပ်လာခဲ့တာပါ။ အဲဒါကို သူသိတယ်ဆိုတဲ့ ပုံစံနဲ့ အလုပ်သမားတွေကို မနက်မိုးလင်း အလုပ်ထဲမ၀င်ခင် ပြောတဲ့ အစည်းအဝေးမှာ ထည့်ပြောပါတယ်။ သူဆိုလိုချင်တာကို ကျွန်တော်ရိပ်မိပါတယ်။ အဓိက သူပြောချင်တာက ဒီကျွန်းနဲ့ အံမ၀င်သေးဘူး။ ကျွန်တော်တို့ အလုပ်သမားလေးတွေ စည်းမျဉ်းစည်းကမ်းတွေ မရင်းနှီးသေးဘူး။ ဒီတော့ ဂရုစိုက်လုပ်သင့်တယ်ပေါ့။

ဒီမှာပဲ မလေးတရုတ်ကြီးကြပ်ရေးမှူးက သူပြောရမယ့် အလှည့်လည်း ရောက်ရော ထပြီးအော်ကြီး ဟစ်ကျယ်တွေ ပြောပါလေရော။ ဒီကုမ္ပဏီက ဒီကျွန်းမှာ မလုပ်ဖူးသေးဘူးလို့ ဘယ်သူပြောလဲတဲ့။ အမှန်က ပြောတဲ့သူက သူ့ဘေးနားမှာ။ အလုပ်သမားတွေကို ဘေးကင်းရေး၊ အလုပ်ကိစ္စစတာတွေ မှာတဲ့ အစည်းအဝေးမှာ မန်နေဂျာ၊ ကြီးကြပ်ရေးမှူးတွေက အလုပ်သမားတွေရှေ့မှာ ရပ်ပြီးပြောရတာ။ အားလုံးက ဘေးတိုက်ယှဉ်ပြီး ရပ်နေတာလေ။ ဒီတော့ တစ်ယောက်ပြောပြီးရင် တစ်ယောက်ကဘေးမှာ ရပ်ပြီးနားထောင်နေတာ။ အဲဒီနေ့က ကျွန်တော်က စောစောပြောပြီး ပြီးသွားတော့ သူတို့ကို ကြည့်ရင်း ပရိသတ်ဖြစ်နေတာ။

အဲဒီမလေးတရုတ်က ဆက်ပြောတယ်။ လွန်ခဲ့တဲ့ ဆယ်နှစ်လောက်က ဘူကုန်းမှာ ငါတို့လုပ်ဖူးတယ်။ မသိရင် လျှောက်မပြောနဲ့တဲ့။ မြန်မာတရုတ်လည်း ဘာမျှမပြောတော့ပါဘူး။ ဒီတော့ ကျွန်တော်လည်း သူတို့နှစ်ယောက်ရဲ့ အနေအထားကို နည်းနည်းနားလည်သွားတယ်။

နောက်တစ်ကြိမ်ကတော့ တော်တော်သဘောကျဖို့ကောင်းပါတယ်။ အဲဒီလို မနက်ခင်းလုပ်တဲ့ အလုပ်သမားတွေနဲ့ အစည်းအဝေးမှာပါပဲ။

အဲဒီနေ့က မလေးတရုတ်ကြီးကြပ်ရေးမှူးက အရင်နေ့က ကုလား အလုပ်သမားတစ်ယောက် လုပ်တာ ဘေး မကင်းလို့ ပစ္စည်းတွေနဲ့ ကျကျနန ရှင်းပြနေပါတယ်။ တကယ်တော့ အဲဒီအလုပ်သမားဟာ မြန်မာတရုတ် ကြီးကြပ်ရေးမှူးလက်အောက်က အလုပ်သမားပါ။ အဲဒီအလုပ်သမားဟာ Drill Machine နဲ့ အပေါက်ဖောက်တဲ့ အခါ သူဖောက်ချင်တဲ့ ပစ္စည်းကို ခြေထောက်နဲ့နင်းပြီး ဖောက်လို့ မလေးတရုတ်ကြီးကြပ်ရေးမှူးက တွေ့ပြီး Drill က ချော်ပြီး မတော်တဆ ခြေထောက်ကို ထိုးမိမှာစိုးလို့ အရင်နေ့ကတည်းက ရှင်းပြခဲ့တာပါ။ နောက်နေ့ကျတော့ သူက အလုပ်သမားအားလုံးသိသင့်တယ်ဆိုပြီး အလုပ်မလုပ်ခင် အစည်းအဝေးမှာ ရှင်းနေတာပါ။ သူရှင်းတာ ပစ္စည်းနမူနာပါ ပြပြီးရှင်းနေတာပါ။ Drill တော့မပါပါဘူး။

အဲဒီအချိန်မှာ မြန်မာတရုတ်ကြီးကြပ်ရေးမှူး ရောက်လာပါတယ်။ သူက ပါမစ်လျှောက်သူဖြစ်လို့ ပါမစ်သွားယူပြီး ပြန်လာတာပါ။ ဒီတော့ ရှေ့ကဘာတွေ ပြောနေမှန်း သူမသိပါဘူး။ ဒါပေမဲ့ ဒီလူက လူရိပ်လူကဲ သိပ်မသိပါဘူး။ သူက ရောက်လာပြီး အလုပ်သမားတွေ ရှေ့မှာ စကားပြောနေတဲ့ မလေးတရုတ်ကိုလည်း မြင်တယ်။ ပြီးတော့ အဲဒီလူနဲ့ အလုပ်သမားတွေကြားက ကွက်လပ်မှာ ချထားတဲ့ ပစ္စည်းတချို့လည်း မြင်တယ်။ ဒီတော့ သူ့စိတ်ထဲ ဘာထင်လဲမသိပါဘူး။ အားလုံးရဲ့ရှေ့ကို ခပ်တည်တည်ပဲ ထွက်လာပြီး အဲဒီချထားတဲ့ ပစ္စည်းတွေကို ခြေထောက်နဲ့ အလုပ်သမားတွေ လွတ်ရာဘက်ကို ကန်ထုတ်ပြီး မတ်တတ်ရပ်နေပါတယ်။ ကျွန်တော်လည်း တွေးပါတယ်။ သူကတော့ သူ့ဘာသာ လူလယ်ခေါင် ပစ္စည်းတွေရှုပ်နေတယ်လို့ ထင်ပြီး လုပ်တာနေပါလိမ့်မယ်။

စဉ်းစားသာကြည့်ပါတော့။ အဲဒီပစ္စည်းတွေ ချပြီး ရှင်းပြနေတာက သူနဲ့မတည့်တဲ့ ကြီးကြပ်ရေးမှူး။ အဲဒီအလုပ်ကို လုပ်ခဲ့တာက သူခိုင်းတဲ့ အလုပ်သမား။ အဲဒီပစ္စည်းတွေကို ကန်ထုတ်တာက သူ။ တကယ်ဆို သူက ကျွန်တော်နဲ့ တခြားတစ်ယောက်ယောက်ကို မေးသင့်တာပါ။ သူက မေးလည်းမမေး၊ အပြင်က ၀င်ဝင်လာချင်း ကောက်ခါ ငင်ခါ လုပ်ချလိုက်တာက ခပ်ဝေးဝေးကို ကန်ထုတ်လိုက်တာ။ အဲဒီတော့ အားလုံးကို အစအဆုံး သိနေတဲ့ ကျွန်တော်ရယ်၊ အလုပ်သမားတွေရယ်က အဲဒါကို ကြည့်ပြီး ရယ်မိပါလေရော။

အလုပ်သမားတွေကတော့ ကျိတ်ပြီး ရယ်တာပေါ့။ သူတို့ကို မလေးတရုတ်က ရှင်းနေတုန်းရှိသေးတော့ ခပ်ဟဟတောင် မရယ်ရဲကြဘူး။ ကျွန်တော်ကတော့ ရှေ့မှာရပ်နေတဲ့ Safety Supervisor ဆိုတော့ ဟိုဘက်လှည့်ပြီး အားရပါးရ ရယ်တာပေါ့။ ကျွန်တော်ရယ်တာတွေ့တော့ အလုပ်သမားတချို့လည်း ထိန်းမရတော့ပါဘူး။ ဒါကို အဲဒီမြန်မာတရုတ် ကြီးကြပ်ရေးမှူးက သိပုံမရပါဘူး။ အဲဒီလောက်အထိ လူကဲခတ်က တော်ချက်။

အဲဒီမှာ မလေးတရုတ်က နည်းနည်းတော့ တင်းသွားတယ်ထင်ပါတယ်။ ဒါပေမဲ့ မန်နေဂျာတွေကလည်း ရှိနေ၊ ကျွန်တော်လည်း ရှိနေတော့ သူ့ခမျာ ဟိုလူကို တင်းတင်းနဲ့ပဲ ပြောသင့်တာကို ခပ်တည်တည်နဲ့ ဆက်ပြောရင်း ရပ်လိုက်ရတော့တယ်။ အဲဒီ အစည်းအဝေးပြီးတော့ ကျွန်တော်နဲ့ အလုပ်သမားတွေ အဲဒီအကြောင်းကို ပြောပြောပြီး ရယ်မိကြတာ။ ဒီတုန်းက လူတစ်ယောက်နဲ့ တစ်ယောက်မတည့်ရင် သူများရယ်စရာဖြစ်သလို ကြည့်လို့ မကောင်းဘူးဆိုတာကို ကျွန်တော်နားလည်ခဲ့ပါတယ်။

တကယ်တော့ ကျွန်တော်တို့က နိုင်ငံပေါင်းစုံက လာတာဆိုတော့ လူပေါင်းစုံပါပဲ။ ကျွန်တော်ပြောတဲ့ မြန်မာ တရုတ် ဆိုတာ အဓိပ္ပါယ်က ဒီလိုပါ။ အဲဒီလူက မြန်မာပြည်နဲ့ တရုတ်နယ်စပ်မှာ နေတယ်။ လူကလည်း တရုတ်စပ်တယ်။ နောက်တော့ တရုတ်ပြည်ထဲမှာလည်း လေးငါးနှစ်လောက် အလုပ်လုပ်ဖူးတယ်ပြောတယ်။ တရုတ်စကား ကို ကောင်းကောင်းပြောတတ်တယ်။ မြန်မာစကားကို ရေလည်အောင် မပြောတတ်ဘူး။ ဒါကြောင့် မြန်မာပြည်ထဲက တရုတ်မို့ မြန်မာတရုတ်လို့ ပြောတာပါ။

ဟိုလူကတော့ မလေးရှားကလူ။ တရုတ်ပဲ။ ဒါကြောင့် သူ့ကိုတော့ မလေးတရုတ်လို့ ပြောတာ။ ဘယ်သူဘာပဲ ဖြစ်ဖြစ် ကျွန်တော်တို့က အလုပ်အတူတူ လုပ်နေကြတာဆိုတော့ အားလုံးတည့်အောင် နေကြတာ အကောင်းဆုံးလို့ ထင်ပါတယ်။ ဒါပေမဲ့ပေါ့ဗျာ။ အဲဒီလို တည့်နေရင် လူဘယ်ပီသပါတော့မလဲ။

ပြီးခဲ့တဲ့နှစ်ထဲမှာ ဘူကုန်းမှာ နောက်ပရောဂျက်တစ်ခု ထပ်ရလို့ ကျွန်တော်တို့ ရောက်ခဲ့ရပြန်ပါတယ်။ ဒီတစ်ခါတော့ မလေးတရုတ်က ထွက်သွားပါပြီ။ မြန်မာတရုတ်နဲ့ မြန်မာစစ်စစ် ကျွန်တော်နဲ့ ကျန်ခဲ့ပါတယ်။ ကျန်တာက တရုတ်မန်နေဂျာနဲ့ တရုတ်အင်ဂျင်နီယာ ချည်းပါပဲ။ သူတို့ကတော့ ပြည်ကြီး တရုတ်တွေပါ။ ပြောရရင် ကျွန်တော်တို့ရဲ့ မြန်မာတရုတ်နဲ့တော့ တော်တော် အဆင်ပြေပါတယ်။ ကျွန်တော်ကလည်း နဂိုကတည်းက သူနဲ့ ခင်မင်ထားတာရယ်၊ ကိုယ့်ပြည်ထဲက မြန်မာတစ်ယောက်က တရုတ်များတဲ့ အလုပ်ထဲမှာ တရုတ်လို ကောင်းကောင်းပြောတတ်တာရယ်ကြောင့် သူရှိနေတာ နည်းနည်းတော့ အဆင်ပြေမယ်လို့ ထင်မိပါတယ်။

ဒါပေမဲ့ပေါ့ဗျာ။ စောစောက ကျွန်တော်ပြောခဲ့သလိုပါပဲ။ လူတွေ ဆိုတော့ အားလုံးဟာ တည့်ချင်မှတည့်မှာကိုး။ ဒီတစ်ခါကတော့ တခြားသူနဲ့ မဟုတ်တော့ပါဘူး။ ကျွန်တော်နဲ့ပါ။

ဖြစ်ပုံက ဒီလိုပါ။ နေ့လယ်ဆို ကျွန်တော်က ရုံးမှာ အီးမေးလ်တွေပြန်စစ်ရင်း ထမင်းစားပြီး ခဏမှေးပါတယ်။ ခုံပေါ်မှာ မှီပြီး ငိုက်တာမို့ အိပ်တယ်လို့ မသုံးတာပါ။ နေ့တိုင်း ကျွန်တော် နေ့လယ်ဆို ရုံးကိုပြန်ပါတယ်။ အလုပ်သမားတွေက လုပ်ကွက်ထဲက နားနေဆောင်တွေမှာ ထမင်းစားပြီး အိပ်ပါတယ်။

တစ်ရက်ကျတော့ ကျွန်တော်တို့လုပ်ကွက်ထဲက Emergency Alarm ကထမြည်ပါတယ်။ ကျွန်တော်က ထမင်းစားဖို့ လုပ်ကွက်ကနေ ရုံးကို ပြန်ရောက်နေပါပြီ။ ကျွန်တော့်ရဲ့ စကားပြောစက်ကို Main Contractor Safety ဆီက သတင်းက ၀င်နေပါတယ်။ Gas leakage ဖြစ်လို့ အလုပ်သမားတွေကို လွတ်ရာခေါ်သွားဖို့ပါ။ ပြီးရင် လုပ်ကွက်ထဲက Emergency Protocol အတိုင်း ဆက်လုပ်ဖို့ပါ။

အဲဒီအချိန် ကျွန်တော်က ရုံးမှာပြန်ရောက်နေတော့ သူတို့ပြောသလို လုပ်ဖို့အတွက်က တော်တော်ခက်ပါတယ်။ အမှန်က ကျွန်တော့်လို Safety နောက်တစ်ယောက်ရှိရင် တစ်ယောက်က လုပ်ကွက်ထဲမှာ အိပ်ရင် ဒီပြဿနာက အဆင်ပြေမှာပါ။ ဒါပေမဲ့ လူနည်းနေသေးလို့ ကျွန်တော်တစ်ယောက်ပဲ ထားသေးတဲ့ ကုမ္ပဏီမှာ အားလုံးဖြစ်လာရင် ကျွန်တော်ပဲဆိုတော့ ကျွန်တော့် ပရောဂျက် မန်နေဂျာနဲ့ အင်ဂျင်နီယာက ဘာဖြစ်လဲမေးရင်း စိတ်ပူနေကြပါတယ်။ ကျွန်တော့် စကားပြောစက်က ရုံးမှာပါ ဆက်ဖွင့်ထားရတာကိုး။ ဒီတော့ သူတို့လည်း ကြားနေရပါတယ်။

သူတို့ စိတ်မပူရင် ခံနိုင်ရိုးလား။ လုပ်ကွက်က Live Plant လို့ခေါ်တဲ့ လက်ရှိ လုပ်ငန်းလည်နေတဲ့ နေရာနဲ့ ကပ်လျက်။ ပြီးတော့ ဖြစ်ချင်တော့ အဲဒီနေ့က နားနေဆောင်မှာ ကျန်ခဲ့တာ တကယ့်အလုပ်သမားချည်းပဲ။ ကြီးကြပ်ရေးမှူးအဆင့်တွေက နေ့လယ်မှာ ကျွန်တော်တို့ကုမ္ပဏီရဲ့ အစည်းအဝေးအတွက် ပြန်လာခဲ့ကြပြီ။ အရင်ကဆိုရင်တော့ ကြီးကြပ်ရေးမှူးဖြစ်လာမယ့် အလုပ်သမား ဖိုမင်လေးတစ်ယောက်ရှိတော့ တော်သေးတယ်။ သူက Emergency Protocol ကို ကျွန်တော်ရှင်းပြထားတော့ နားလည်တယ်။ နားနေဆောင်မှာ ကျန်တဲ့သူတွေထဲမှာ ဖိုမင်တစ်ယောက်လည်း နားလည်ပါတယ်။ ဒါပေမဲ့ ကျွန်တော်အပါအ၀င် အားလုံးက စိတ်ပူနေကြတာပါ။ တစ်ခုခု ဖြစ်မှာစိုးလို့ပါ။

ဒါနဲ့ ကျွန်တော့်ကို ပရောဂျက်မန်နေဂျာနဲ့ အင်ဂျင်နီယာက လုပ်ကွက်ထဲ အမြန်သွားဖို့ ပြောပါတယ်။ ကားကိုတော့ ခုန ကျွန်တော်ပြောတဲ့ မြန်မာတရုတ်က မောင်းဖို့ အင်ဂျင်နီယာလေးက သွားပြောပါတယ်။ အဲဒီအထိ အဆင်ပြေပါတယ်။ ဒါနဲ့လုပ်ကွက်ထဲရောက်တော့ ကျွန်တော့်အလုပ်သမားလေးတွေကို ကျွန်တော် လူရေပါတယ်။ ကျွန်တော်ရောက်တဲ့အချိန်မှာ အခြေအနေက ကောင်းနေပါပြီ။ သူတို့လည်း ဘေးလွတ် ရာကို ရောက်နေပါပြီ။ ဒါပေမဲ့ ကျွန်တော်တို့ရဲ့ လုပ်ငန်း လုပ်ထုံးလုပ်နည်းအရ Main Contractor Safety ကို သတင်းပို့ရပါတယ်။

ဒါနဲ့ ကျွန်တော်သတင်းပို့ပါတယ်။ ပြီးတော့ အားလုံးအေးဆေးပြီ ဆိုမှ ရုံးမှာ ထမင်းစားပြီး အစည်းအဝေးတက်ဖို့ သူ့ကားနဲ့ပြန်ဖို့ ကားပေါ်ပြန်တက်ပါတယ်။ အဲဒီမှာ စဖောက်တော့တာပါပဲ။ သူက ပြီးပြီလားတဲ့။ ပြီးပြီဆိုတော့ ဒါဆို ဘာလုပ်ဖို့ ဒီကိုလာတာလဲတဲ့။ ကျွန်တော့်ကို ဒေါကန်ပြီးမေးတာပါ။ ကျွန်တော်လည်း စိတ်ထဲက ထောင်းခနဲ ဖြစ်သွားပါတယ်။ ဘာဖြစ်လို့လဲလို့။

သူပြောတာက သတင်းလာပို့တာ အတွက်နဲ့ဆို ဒီကို မလာဘဲ ရုံးကနေ ပို့လို့မရဘူးလားတဲ့။ လွယ်လိုက်တာ။ ကျွန်တော် တွေးတာက ကိုယ်တကယ်လိုအပ်လို့ လုပ်ကွက်ထဲလာတာတောင် မြန်မာချင်းကို မကူညီချင်ဘူး ဆိုတာပါပဲ။ ကျွန်တော် သူ့အကြောင်းကို သိပါတယ်။ ကားကို တစ်ခေါက်ကနေ နှစ်ခေါက်ဖြစ်လာရင် သူမမောင်းချင်တော့ပါဘူး။ အရင်က တခြားလူတွေ အကူအညီတောင်းရင် အဲဒီလို သူပြောဖူးပါတယ်။ ကုမ္ပဏီကား၊ ကုမ္ပဏီက ဆီနဲ့ မောင်းရတာကို သူခဏမောင်းပို့ရတာကို အလုပ်ပိုလို့ သူထင်ပုံရပါတယ်။ သူ့အနေနဲ့တော့ သူဟာ ကြီးကြပ်ရေးမှူး တစ်ယောက် ဖြစ်လို့ ဒရိုင်ဘာလို မမောင်းနိုင်ဘူးလို့ ထင်ပုံရပါတယ်။

ဒါပေမဲ့ ကျွန်တော်တို့ဆီမှာ ဒရိုင်ဘာမရောက်သေးတာရယ်၊ ကားက တစ်စီးပဲ ရှိသေးတာရယ်ကြောင့် အရေးအကြောင်းဆို သူ့ကားကိုပဲ အားကိုးနေရတာပါ။ ဒီတော့ ကျွန်တော်က သူ့ကို ရှင်းပြပါတယ်။ ကျွန်တော်က အလုပ်သမားဘယ်နှစ်ယောက် ဘေးကင်းရာရောက်ပါပြီ ဆိုတာ ဘယ်သူ့ကို လှမ်းမေးရ မလဲလို့။ သူပြောတာ လွယ်ပါတယ်။ တခြား ကုမ္ပဏီက ကျွန်တော့်လို ဘေးကင်းရေး ၀န်ထမ်းတွေ လှမ်းမေးပေါ့တဲ့။ သူတို့တောင် ကိုယ့်လူကိုယ် ရေလို့မလွယ်နိုင်တာ သူများကုမ္ပဏီက လူကို လိုက်ပြီး ရေနိုင်ပါ့မလားလို့။ သူတိတ်သွားပါတယ်။

ပြီးတော့ တစ်လမ်းလုံး ပွစိပွစိနဲ့ ကျွန်တော်က Communication မလုပ်တတ်သေးဘူး။ ဘယ်လို ဆက်သွယ်ရမယ်ဆိုတာ မသိဘူး၊ ဘာညာနဲ့ လုပ်နေပါတယ်။ ကျွန်တော်ထပ်မေးပါတယ်။ ဒါဆို ကျွန်တော် ဘယ်လို ဆက်သွယ်ရမလဲ ပြောဆိုတော့ ပြန်ငြိမ်သွားပါတယ်။

ဒါနဲ့ မပြီးသေးပါဘူး။ သူက ရုံးကို ရောက်ရောက်ချင်း ကျွန်တော်တို့ ပရောဂျက်မန်နေဂျာကို တရုတ်လိုသွားပြီး ပြောပါတယ်။ ကျွန်တော်တရုတ်လို နားမလည်ပါဘူး။ ဒါပေမဲ့ သူပြောတာကို ကျွန်တော်သဘောပေါက်တာက ကျွန်တော်က နားမလည်ဘဲ တစ်ခေါက်သွားလို့ ဘာမျှမထူးဘဲ ပြန်လာခဲ့ ရတယ် ဆိုတာမျိုးပါ။ သူလမ်းမှာ ကျွန်တော့်ကို ပြောခဲ့သလို ကျွန်တော်က Communication ကောင်းကောင်း မလုပ်တတ်သေးဘူးဆိုတဲ့ သဘောပါ။ အဲဒါကတော့ ကျွန်တော့်အလုပ်နဲ့ ကျင့်ဝတ်ကို စော်ကားရာ ရောက်သွား ပါပြီ။ ကျွန်တော့်ဒေါသက ထောင်းခနဲထွက်သွားပါတယ်။

အဓိကက သူပြောတာကို ဒေါသထွက်တယ် ဆိုတာထက် မြန်မာတရုတ်တစ်ယောက်က ကျွန်တော်နဲ့ ပတ်သက်တဲ့ ကိစ္စတစ်ခုကို ကျွန်တော့် ပရောဂျက်မန်နေဂျာကို ပြောတာ ကျွန်တော့်ရှေ့မှာ အင်္ဂလိပ်လို မပြောဘဲ တရုတ်လို ပြောတာကိုပါ။ ဒါနဲ့ ကျွန်တော်အားလုံးရဲ့ ရှေ့မှာ သူ့ကို အင်္ဂလိပ်လိုပဲ ထပ်မေးပါတယ်။ ငါဘယ်သူ့ကို ဒီနေရာကနေ ဆက်သွယ်ရမလဲလို့။ ဆက်သွယ်ဖို့ လူမရှိဘဲ ငါ့အလုပ်သမားတွေ ဘေးကင်းပြီ ဆိုပြီး သတင်းဘယ်လိုပို့မလဲလို့။ သူထပ်ပြီး ငြိမ်သွားပါတယ်။

ကျွန်တော့် ပရောဂျက်မန်နေဂျာက ကျွန်တော့်ကို လှမ်းကြည့်ပါတယ်။ ကျွန်တော့်စိတ်ကို နည်းနည်းလျှော့လိုက် ရတယ်။ ဖြစ်ချင်ရာဖြစ် ဆိုပြီး ကျွန်တော် ထပ်ပြောတော့မှာပါ။ ဘာဖြစ်လို့လဲ ဆိုတော့ မြန်မာပြည်ထဲမှာနေတဲ့ တရုတ်စပ် မြန်မာတစ်ယောက်က စလုံးရောက်မှ ပြည်ကြီးတရုတ်တွေနဲ့ တွဲလုပ်ပြီး ပြည်ကြီးတရုတ်ကို ဖားသလိုလုပ်ပြီး မြန်မာစစ်စစ် ကျွန်တော့်ကို အချွန်နဲ့မတာမျိုးကို ကျွန်တော် လုံးဝ မခံစားနိုင်လို့ပါ။

ဒီလိုနဲ့ ကျွန်တော်အဲဒီနေ့က စပြီး အလုပ်ကိစ္စကလွဲရင် အဲဒီလူကို စကားကို မပြောတော့ပါဘူး။ သူ့ကားကိုလည်း လုံးဝမစီးတော့ပါဘူး။ ကျွန်တော်တို့လုပ်ကွက်ထဲသွားတဲ့ ဘတ်စ်ကားတွေပဲ ကျွန်တော် စီးပါတယ်။ သူမေးရင် အလုပ်ကိစ္စဆို ကျွန်တော်ရှင်းပြတယ်။ ဒီလောက်ပါပဲ။ ဒီထက်မပိုတော့ပါဘူး။ ကျွန်တော့်စိတ်ထဲမှာ သူ့ကို မြန်မာတစ်ယောက်လိုကို ယုံကြည်လို့ မရတော့တာပါ။ နေ့လယ်လည်း လုပ်ကွက်က နားနေဆောင်မှာ အလုပ်သမားတွေနဲ့ ရောပြီးအိပ်ပါတယ်။ ရုံးက မေးလ်ကိုတော့ အင်ဂျင်နီယာတွေကပဲ စစ်ပေးပါတယ်။ မေးလ်အားလုံးက ကျွန်တော့်ကိုယ်ရေးကိုယ်တာ မပါဘဲ အလုပ်ကိစ္စချည်းမို့ သူတို့စစ်ပြီး တော်တော်အရေးကြီးရင် ကျွန်တော့်ကို လှမ်းအကြောင်းကြားခိုင်းပါတယ်။ ကျွန်တော့်အတွက်တော့ ဒီလိုလူတွေ ရှိနေရင် ဒီလိုဖြတ်သန်းရတာ ပိုကောင်းတယ်လို့ ထင်ပါတယ်။

နောက်တော့ ပြန်စဉ်းစားပါတယ်။ ကျွန်တော်တို့ ရာဇ၀င်ထဲမှာ အရင် အင်္ဂလိပ်ခေတ်တို့၊ ဂျပန်ခေတ်တို့တုန်းက အလိုတော်ရိတို့၊ သစ္စာဖောက်တို့ ရှိခဲ့တယ်ဆိုတာကိုပါ။ ဟုတ်မှာပါပဲလို့။ တချို့လူတွေက ကိုယ်နေရာရဖို့ဆို ဘာပဲဖြစ်ဖြစ် လုပ်မှာပဲဆိုတာ ကျွန်တော့်အတွက် ဒီကိစ္စက ပိုသေချာသွားစေပါတယ်။

ကျွန်တော့်သဘောကတော့ အရင်က အလုပ်ထဲမှာ လုပ်ခဲ့သလို ပျော်ပျော်ရွှင်ရွှင်နဲ့နေချင်၊ ပြောချင်၊ လုပ်ချင်၊ စားချင်တာပါ။ ဒါပေမဲ့ မရနိုင်တော့ဘူးပေါ့။ လူတစ်ယောက် သဘောဘယ်လောက် ကောင်းကောင်း ကိုယ့်အကျိုးစီးပွား ပျက်လောက်အောက်တော့ ကျွန်တော်မကောင်းနိုင်တာတော့ အသေအချာပါ။

ဘာပဲဖြစ်ဖြစ် ဒီဖြစ်စဉ်လေးတွေဟာ ကျွန်တော်တို့ အလုပ်ထဲမှာ တကယ်ဖြစ်ခဲ့တာလေးတွေပါ။ ကျွန်တော့်အတွက်တော့ ဆင်ခြင်စရာတွေ ရနေမိပါတယ်လို့ ပြောချင်တာပါပဲ။ ။

ဆူးသစ်
၁၄:၃၂ နာရီ
၂၉.၁.၂၀၁၂

" ပြန်ခဲ့ရမှာလား "

အခုတလော အလုပ်ပိတ်ရက်ကလေးရတာနဲ့ အင်တာနက်မှာ မကြည့်ရသေးတဲ့ သတင်းတွေ၊ ရုပ်ရှင်တွေရှာကြည့်၊ ဘလော့တွေလည်နဲ့နေလာလိုက်တာ အရင်ကတည်းက မျိုသိပ်ထားတဲ့ အရာတွေ ကနေ ပြောချင်စရာတွေ ပိုများလာလို့ ပြောလိုက်ပါဦးမယ်။

ကျွန်တော်တို့နိုင်ငံက အခုတော့ စပြီးပြုပြင်ပြောင်းလဲရေးတွေ လုပ်နေပြီလို့ ယူဆရတဲ့အချိန်မှာ တချို့လူတွေကလည်း ကျွန်တော်တို့လို အဝေးမှာ အလုပ်လုပ်နေတဲ့ လူတွေကို ပြန်လာဖို့ခေါ်နေတာတွေ ကြားရပါတယ်။ တိုင်းပြည်ပြန်လည် တည်ဆောက်ရေးမှာ ကျွန်တော်တို့လို အဝေးကလူတွေ ပြန်လည်ပါဝင် သင့်တယ်ပေါ့။ ကျွန်တော်တို့လို အလုပ်လုပ်နေသူတွေ ပြန်သွားသင့်သလားဆိုတာကိုတော့ ကျွန်တော်တို့လည်း စဉ်းစားကြည့်မိပါတယ်။

ကျွန်တော့်လုပ်ကွက်ထဲက လူတွေကလည်း အဲဒါကို တော်တော်လေး သိချင်နေကြတယ်။ ကျွန်တော့်ကို တွေ့တိုင်းလည်း မေးကြပါတယ်။ အဓိကက အားလုံးဟာ ကိုယ့်ပြည်ကိုယ့်ရွာ ဘယ်အချိန်ပြန်နိုင်မလဲ ဆိုတာကို စိတ်ဝင်စားကြတာပါ။ ကျွန်တော်တို့ရဲ့ မျှော်လင့်ချက်က ကျွန်တော်တို့ တိုင်းပြည် တိုးတက်လာတဲ့ တစ်နေ့ကျရင် ပြန်ကိုပြန်မယ် ဆိုတာပါပဲ။ ဟုတ်တယ်။ ကျွန်တော်တို့ပြန်ရမယ်။ ကိုယ့်ပြည်ကိုယ့်ရွာလောက် နေချင်စရာ ကောင်းတဲ့အရပ် ရှိမလား။ ဒါပေမဲ့ လောလောဆယ် ကတော့ စောင့်ကြည့်ရဦးမယ်လို့ ကျွန်တော်တို့ ထင်မိတယ်။ ဘာဖြစ်လို့လဲ။

ပထမတစ်ချက်က ကျွန်တော်တို့ ပြန်ရင် အခုလောလောဆယ် ကျွန်တော်တို့ ရနိုင်မယ့်လစာမျိုး မရနိုင်တော့ဘူး။ ဒါကတော့ ကျိန်းသေတယ်။ ဘယ်လောက်ကြီးပဲ ရာထူးကြီးပါစေ။ စလုံးက လစာမျိုးတော့ ဘယ်သူပေးနိုင်မလဲ။ ဒါပေမဲ့ ကျွန်တော်တို့ပြန်ရနိုင်မယ့် အချိန်တွေ၊ မိသားစုနဲ့နေရမှာတွေ၊ ကျန်တဲ့ ကိုယ့်ပြည်ကိုယ့်ရွာဆိုတဲ့ ခံစားမှုတွေကတော့ နှိုင်းယှဉ်လို့ ရကောင်းတဲ့ အရာတွေ မဟုတ်တာကိုတော့ အားလုံးသိကြပါတယ်။

ဒုတိယတစ်ချက်က ဘယ်လိုအလုပ်မျိုးတွေ ကျွန်တော်တို့အတွက် ဖြစ်လာမှာလဲ။ နိုင်ငံခြားကပြန်တိုင်းရော တကယ်ထိုက်တန်တဲ့ တစ်နေရာရှိနေမလား။ တတ်အပ်ပြောလို့မရပါဘူး။ အလုပ်တော့ ပေါ်လာမယ်။ ကျွန်တော်တို့နဲ့ သင့်တော်တဲ့ အလုပ်လို့ ကံသေကံမ မပြောနိုင်ပါဘူး။ အဲဒီအခါ အာမခံချက်ဆိုတာကလည်း စဉ်းစားရပါတော့မယ်။ ဒီအလုပ်မကောင်းလို့ နောက်အလုပ်ပြောင်းဆိုတာမျိုးကလည်း ခဏခဏ လုပ်လို့ကောင်းတာမျိုး မဟုတ်ဘူးမဟုတ်လား။ ကျွန်တော့်သူငယ်ချင်း တစ်ယောက်ပြောဖူးတာကို လက်ဆင့်ကမ်းရရင် သူရထားတဲ့ Ph.D ကြီးနဲ့ သူ့ကို အရှေ့တောင်အာရှမှာတောင် အလုပ်ခန့်ပေးဖို့ မလွယ်ပါဘူး ဆိုတာပါပဲ။ တော်ရုံပညာတတ်၊ ဘွဲ့ရတွေနဲ့ ဘွဲ့မရဘဲ အဆင်ပြေသလို ထွက်လုပ်နေတဲ့လူတွေ အတွက်ကတော့ အလုပ်တွေဖြစ်လာမယ်လို့ ကျွန်တော်တို့ ယုံပါတယ်။

အဲဒီတော့ ကျွန်တော်တို့တိုင်းပြည် တကယ်တိုးတက်လာမယ့် အချိန်မှာတော့ တော်တော် များများ ပြန်လာနိုင်မယ်လို့ ယူဆရပါတယ်။ ကျွန်တော်ဒီလိုပြောနေတော့ ဒီကောင် တိုင်းပြည်မချစ်တဲ့ကောင်ပဲ လို့တော့ မထင်လိုက်ပါနဲ့။ ချစ်လွန်းလို့ ဘယ်သူမျှ မခိုင်းဘဲ ပြည်သူ့ဝန်ထမ်း ဘ၀နဲ့ ခြောက်နှစ်ကျော်တောင် နေခဲ့ ပြီးပါပြီ။ နိုင်ငံခြားရောက်နေတဲ့ သူတွေဟာ တိုင်းပြည် မချစ်လို့ ပြည်ပရောက်နေတာ မဟုတ်ပါဘူး။ ကျွန်တော်ဆိုလိုချင်တာက တိုင်းပြည်ချစ်တာရယ်၊ ကျွန်တော်တို့ရဲ့ ဘ၀ရပ်တည်မှုရယ် ဆိုတာတွေက အတူယှဉ်တွဲ စဉ်းစားနေရတဲ့ ကိစ္စတွေဆိုတာ သိစေချင်တာပါ။ ခဏခဏ ပြန်လာခဲ့ပါလို့ချည်း အော်နေပေမယ့် နိုင်ငံခြားကလူတွေ ပြန်လာနိုင်လောက်တဲ့ အနေအထားကို မရောက်သေးရင် ဘယ်သူတွေက ပြန်လာနိုင်ပါ့မလဲဗျာ။ ဒီလိုပြောလို့ ပြည်တွင်းက လူတွေက ပြန်လာမယ့်လူတွေကို စောင့်ပြီး အလုပ်လုပ်နေတာ မဟုတ်ဘူးလို့ ဆရာ လူထုစိန်ဝင်း ပြောသလို ပြောချင်ပြောနိုင်ပါတယ်။ ဘယ်သူတွေ ဘာပဲပြောပြော ကျွန်တော်တစ်ဦးတည်း သဘောထားကတော့ တစ်နေ့ပြန်လာခဲ့မှာပါ။ အချိန်တစ်ခုအထိ ရောက်ခဲ့ရင်ပေါ့ဗျာ။ ကျွန်တော့်မှာလည်း ကိုယ့်ရည်ရွယ်ချက်နဲ့ ကိုယ်ကိုး။

ဒီလိုနဲ့ တိုင်းပြည် တိုးတက်လာဖို့ မျက်စိဖွင့်ထားရင်းမှာပဲ ခုတလော ကျွန်တော့် မျက်စိထဲ တော်တော်ထော်လော် ကန့်လန့်နိုင်တဲ့ ကိစ္စတွေ မြင်လာရပါတယ်။ ဒီကိစ္စတွေက ကျွန်တော်တို့လို အပြင်မှာ နေတဲ့လူတွေ ပြန်တာ၊ မပြန်တာနဲ့ ဘာဆိုင်လို့လဲလို့ မေးလာရင် ဆိုင်သလိုလို ရှိလို့ ကျွန်တော်ထည့်ပြောတာပါလို့ပဲ ဖြေပါရစေ။ ပြန်ရင် ဘာလုပ်ရမှန်း မသိတဲ့သူများ ရှိခဲ့ရင် နည်းလမ်းလေး၊ဘာလေး နည်းနည်းပါးပါး ပေးချင်လို့ပါ။ တည့်တော့လည်းယူ၊ မတည့်တော့လည်း ဗဟုသုတဖြစ်မယ် ထင်ပါတယ်။

ဒီဆောင်းပါးရဲ့ ပထမပိုဒ်မှာ ဆိုခဲ့ပါတယ်။ ကျွန်တော် အချိန်နည်းနည်းရလို့ အင်တာနက်ကနေ မြင်ရ တာတွေ လျှောက်ကြည့်နေပါတယ်လို့။ အထူးသဖြင့် ကျွန်တော်တို့နိုင်ငံနဲ့ ပတ်သက်လို့ လိုက်ကြည့်တာပေါ့ဗျာ။ ကြည့်မိတော့ မြင်ရပါတယ်။ ဘာတွေမြင်ရလဲဆိုတော့ ကျွန်တော်တို့မြန်မာပြည်မှာ တော်တော်ကို တိုနေကြတဲ့ ကိစ္စပါ။

ဘာတွေတိုတာလဲဆို ဘောင်းဘီလည်းတို၊ အင်္ကျီလည်းတို အကုန်ကို တိုတာဗျာ။ စလုံးက တရုတ်မ ကောင်မလေးတွေကို တုပြီး မြန်မာမလေးတွေ ဘောင်းဘီတို လိုက်ဝတ်တာကို တော်တော်တိုတယ် ထင်ထားတဲ့ ကျွန်တော့်မှာ နောင်တတောင်ရမိမလိုပါ။

ကျွန်တော့်အထင် စတိတ်ရှိုးမှာ ဆိုတဲ့ အဆိုတော်မလေးများက စတယ်ထင်တာ ပါပဲ။ နောက်တော့ မြန်မာပြည်မော်ဒယ်လောကရဲ့ အထင်ကရ ပြိုင်ပွဲကြီး များမှာလည်း မော်ဒယ်တွေက တိုသထက်တိုတာတွေ ၀တ်ပြပြီး ပြိုင်ကြတယ်ဗျ။ တစ်ခါတစ်ခါများဆို အင်္ကျီက ဘယ်လိုဟာမျိုးလဲလို့ မသိရအောင် တစ်ကိုယ်လုံးဖော်လို့ရတာတွေကို ဖော်ပြီးပြိုင်တယ်ဗျ။ မှတ်သားရပါတယ်။ ပြီးတော့ မေးတဲ့မေးခွန်းကို ဖြေချင်တာဖြေပြီး ဆုတွေ ဘာတွေရသွားသေးသဗျ။ လေးစားတယ်ဗျာ။ တစ်ခါများဆို စင်ပေါ်မှာ လမ်းလျှောက်ရင်း ချော်လဲသွားတဲ့ မော်ဒယ်မလေးခမျာ ကျွန်တော်တို့ကတော့ မရတော့ဘူး ထင်တာပဲဗျာ။ သူ့ကိုတောင် သနားမိသေးတယ်။ ဒါပေမဲ့ ပွဲပြီးတော့ သူက ပထမဗျာ။ ကောင်းရော။

အခုနောက်ဆုံး တော်တော်ဆိုးတာ တစ်ခုကတော့ စင်ပေါ်မှာ သီချင်း တက်ဆိုတဲ့ ကောင်မလေးနှစ်ယောက်က Rapper ယောကျာ်းလေးတွေတောင် မဆိုရဲတဲ့ စာသားမျိုးတွေကို တက်ဆို သွားတာခင်ဗျ။ ဥပမာပြောရရင်ဗျာ-အမေပေးထားတဲ့ လယ်တစ်ကွက်တို့၊ ပြည့်တန်ဆာမကို အရပ်သားခေါ်တဲ့ စကားလုံးမျိုးတို့ကို တွင်တွင်သုံးပြီး ဆိုသွားတာ။ အမယ်-နောက်ဆုံးကျတော့ သူတို့က ပြောသွားသေးတယ်။ သူတို့ဆိုတာ ရိုင်းချင်ရိုင်းပါမယ်တဲ့။ ဒါပေမဲ့ အဲဒါတွေက အမှန်တွေပါတဲ့။

ဒါဖြင့် လူရှေ့သူရှေ့ ပြောဟောနေတဲ့သူတွေလည်း ရိုင်းချင်သလောက်ရိုင်း။ ပြီးမှ အဲဒါတွေက အမှန်တွေပါလို့ ပြောရင် အဆင်ပြေတဲ့ခေတ်ကို ရောက်နေပြီလားမသိဘူးလို့ ကျွန်တော်တော့ စဉ်းစားနေမိတာပါပဲ။ ဒီတော့ ကျွန်တော်အကြံပြုချင်တာက တကယ်လို့ပေါ့ဗျာ။ နိုင်ငံခြားက မိန်းကလေးတွေများ မြန်မာပြည်ပြန်ပြီး အထိုင်ချတော့မယ်ဆိုရင် တော်တော် တိုနိုင်မှရယ်၊ တော်တော် ဆိုနိုင်မှရယ်(ရိုင်းချင်တာရိုင်းလို့ရတယ်။ ပြီးမှ အမှန်တွေလို့ ပြောပေါ့) အဲဒီနှစ်ခု အကြောင်းညီညွတ်ရင် မြန်မာပြည်မှာ ဘောင်းဘီဝတ်ပြီး အောင်မြင်စွာဖြတ်သန်းနိုင်ပြီလို့ တွေးလို့ရပါပြီ။

နောက်တစ်ပိုင်းကတော့ ယောက်ျားလေးများပါ။ ဘာမျှမပူပါနဲ့။ ဒီဘက်ခေတ်မှာ လူရွှင်တော်တွေ လည်း တော်တော်အခြေအနေကောင်းပါတယ်။ သူ့ဘာသာသူ ပညာနဲ့လုပ်စားနေကြသူတွေပါ။ ဒါပေမဲ့ပေါ့ဗျာ။ ဆွမ်းဆန်ထဲ ကြွက်ချေးရောတယ်ပဲ ပြောရမလားမသိပါဘူး။ တချို့ကလည်း အောက်လုံးတွေပျက်ပြီး ပရိသတ်ကို မြှူဆွယ်လို့ အဲဒါကို ဟာသတစ်ခုလို လုပ်နေကြတယ်ဗျ။ တကယ်တော့ ဒါကကြာပြီလို့တောင် ပြောလို့ရပါတယ်။

ဒါပေမဲ့ အဲဒါကိုပဲ တကယ့်လူရွှင်တော်တွေရဲ့ ပညာလို့ထင်ပြီး ပြောနေသူတွေကလည်း ရှိသေးတယ်ဗျ။ ဒီတော့ ကျွန်တော်တို့ကပဲ သူတို့ အဲဒီလို အောက်လုံးပျက်တာကို ကြိုက်လို့ကြည့်နေသူတွေလိုလို ဖြစ်ဖြစ် သွားရတာပေါ့ဗျာ။ လူရွှင်တော်တစ်ယောက်ကဆို ဒီဘက်ခေတ်မှာ လူရွှင်တော် လုပ်ရင် အောက်လုံးခွင် ပျက်ရင်ပျက်၊ မပျက်ရင် နိုင်ငံရေးခွင်ကို ပျက်မှတဲ့။ လူရွှင်တော်လုပ်ချင်ရင် ဒီနှစ်မျိုး တတ်ရမလိုတောင် ဖြစ်နေပြီဗျာ။ စဉ်းစားသာကြည့်ပါတော့။ သူပြောတဲ့အထဲမှာ ဟာသတွေ ဘယ်လိုရှာရမယ် ဆိုတာကိုတောင် မပါတော့တာ။ တကယ့်ဟာသကို ရှာပြီး လူရွှင်တော် လုပ်နေသူတွေကတော့ ရှိတော့ရှိတယ်။ ဒါပေမဲ့ ရှားသွားပါပြီ။

အဲဒီတော့ ဒီနေ့ခေတ် ပြဇာတ်တို့၊ အငြိမ့်တို့ ကြည့်နေရတဲ့ ပရိသတ်ခမျာ နို်င်ငံရေး ပျက်လုံးနဲ့ အောက်လုံးလို့ခေါ်တဲ့ လူရှေ့သူရှေ့ မပြောသင့်၊ မပြောအပ်တဲ့ စကားတွေပြောတဲ့လူတွေကိုပဲ လူရွှင်တော်လို့မြင်ရင်း တကယ့်ဟာသတွေ ပျက်မယ့် လူရွှင်တော်စစ်စစ်တွေကို ကြည့်ဖို့ခဲယဉ်းသွားကြပါပြီ။

ဒီတော့ နိုင်ငံရပ်ခြားကနေ မြန်မာပြည်ပြန်ချင်တဲ့ ယောကျာ်းလေးများအဖို့ကတော့ အောက်လုံးနဲ့နိုင်ငံရေး
ပြောတတ်ရင် ကိုပဲ လူရွှင်တော် အဖြစ် မြန်မာပြည်မှာ ပြန်လုပ်လို့ရပြီလို့ ကျွန်တော်တော့ ထင်မိကြောင်းပါ။

တိုက်တိုက်ဆိုင်ဆိုင်လို့ပဲ ပြောရမလား။ စကားမစပ်ပဲ ပြောရမလား။ အခုဒီဆောင်းပါး ရေးနေတဲ့ အချိန်မှာပဲ ကော်ဖီဆိုင်က ပြန်အလာမှာ တရုတ်နှစ်ကူး တစ်ခါကူးတိုင်း ဈေးတက်လေ့ရှိတဲ့ ကော်ဖီ ဖိုးဟာ နောက်ထပ်ဆယ်ပြားထပ်တက်သွားလို့ တစ်ခွက်ကို တစ်ကျပ်ဆယ်ပြားပေးခဲ့ရတဲ့အတွက် လူနေမှုစရိတ်မြင့်တက်နေတဲ့ စင်ကာပူကနေ မြန်မြန်ပြန်စေချင်တဲ့ တွန်းအားတွေများလားလို့လည်း ကျွန်တော်တွေးနေပါတယ်။ အရင်နှစ်က ပြားကိုးဆယ်ကနေ တစ်ကျပ်ဖြစ်၊ ဒီနှစ်မှာ တစ်ကျပ်ကနေ တစ်ကျပ်ဆယ်ပြားဖြစ်ဆိုတော့ ရှေ့ရေးက ရင်လေးစရာတွေလည်း ဖြစ်ဖြစ်လာနေပြီလို့ ထင်ပါတယ်။

ဒီတော့ ပြန်ဖို့ခေါ်သူတွေကလည်း ခေါ်နေပြီဆိုပေမယ့် ပြန်ရမယ့်လူတွေ ခမျာလည်း စူးစမ်းရင်းနဲ့ လေ့လာနေပါကြောင်းနဲ့ ပြန်ပြီးရင် ဘယ်လိုရပ်တည်မလဲ ဆိုတဲ့ကိစ္စမှာတော့ နည်းနည်းထည့်စဉ်းစားသင့်တဲ့ကိစ္စတွေကို အမြင်အတိုင်း ခင်းပြလိုက်ရကြောင်းပါ။ ။

သားလတ်
၁၀:၅၁ နာရီ
၂၄.၁.၂၀၁၂

" မဟတ္တမဂန္ဒီ၊ ကျွန်တော် နှင့် ဗိုလ်ချုပ်အောင်ဆန်း "

ကျွန်တော့်ဘ၀မှာ လေးလေးနက်နက် လေးစားရတဲ့ ပုဂ္ဂိုလ်နှစ်ယောက်ရှိပါတယ်။ တစ်ယောက်က ကျွန်တော့်အဖေပါ။ နောက်တစ်ယောက်ကတော့ ဗိုလ်ချုပ်အောင်ဆန်းပါ။ အခု ဗိုလ်ချုပ်အောင်ဆန်း နှစ်( ၁၀၀) ပြည့်ကို ရုပ်ရှင်ရိုက်ဖို့ စီစဉ်နေတယ် ကြားရတော့ ကျွန်တော် တော်တော်ဝမ်းသာမိပါတယ်။

အကြောင်းကရှိပါတယ်။ ကျွန်တော်ငယ်ငယ်က စာစီစာကုံးကို အာဇာနည်နေ့ဆို အမြဲလို ၀င်ပြိုင်ရတော့ စာနည်းနည်းဖတ်ရပါတယ်။ ဗိုလ်ချုပ်နဲ့ အာဇာနည်ကြီးတွေရဲ့ အကြောင်းတွေပေါ့။ အဖေရှာပေးခဲ့တာပါ။ အဲဒါတွေဖတ်ပြီး ဗိုလ်ချုပ်အကြောင်း နည်းနည်း သိလာပါတယ်။ တကယ့်ကို နည်းနည်းလေးပါ။ နောက်တော့ ကျောင်းမှာ ကျွန်တော့်ကို စာစီစာကုံးဝင်ပြိုင်တဲ့သူမို့ အတန်းရှေ့ စကားထွက်ပြောခိုင်းပါတယ်။ အာဇာနည်နေ့အကြောင်း သိတဲ့သူမို့ပါ။ ကျွန်တော်လည်း တတ်သလောက်၊ မှတ်သလောက် ထွက်ပြောပါတယ်။

ဒါနဲ့ ဆယ်တန်းအထိကို အဲဒီအကြောင်းတွေ ပြောခဲ့ရတုန်းပါ။ နောက်တော့ အပြင်မှာ ဗိုလ်ချုပ်အောင်ဆန်း အကြောင်းတွေတွေ့ရင် စာအုပ်တွေကနေ ရသလောက်ဖတ်ခဲ့ပါတယ်။ ကျွန်တော်ကိုယ်တိုင် စိတ်ဝင်စားလို့ပါ။ ကျွန်တော်က ငယ်ငယ်ကတည်းက အာဇာနည်နေ့နဲ့ ပတ်သက်ပြီး ဗိုလ်ချုပ်အကြောင်းကို သိခဲ့ရတော့ ပိုပြီးစိတ်ဝင်တစား ရှိခဲ့တာတော့ အမှန်ပါပဲ။

ကျွန်တော်ကံကောင်းတာတစ်ခုက ကျွန်တော့်အဖေက စာပေနယ်ကဖြစ်တဲ့အပြင် ဆရာကြီး တက္ကသိုလ်နေ၀င်း နဲ့ကျွန်တော်တို့နဲ့ တစ်မြို့နယ်ထဲမှာ အတူနေတာဆိုတော့ တော်တော်လေး ရင်းနှီးပါတယ်။ ဒီတော့ သူ့စာအုပ်တွေကို ကျွန်တော်တို့ရလေ့ရှိပါတယ်။ သိကြတဲ့အတိုင်း ဆရာကြီးတက္ကသိုလ်နေ၀င်းဟာ ဗိုလ်ချုပ်အောင်ဆန်းရဲ့ အနားမှာအမြဲလို ရှိနေသူဆိုတော့ သူရေးတာတွေ ဖတ်ရတဲ့အခါ ကျွန်တော်ဖြင့် အံ့ဩလို့မဆုံးအောင် ဗိုလ်ချုပ်အောင်ဆန်းကို လေးစားမိပါတယ်။ သူ့ရဲ့ ရဲဘော်ရဲဘက်စိတ်၊ ရာထူးဂုဏ်ရှိန်ကို မမက်မောတဲ့စိတ်၊ တိုင်းပြည်ကို ချစ်တဲ့စိတ်၊ နိုင်ငံရေး အသိအမြင် ကြွယ်ဝတဲ့စိတ်၊ တိုင်းပြည်လွတ်လပ်ရေးသာ အဓိကထားတဲ့စိတ် စတဲ့ပြောမကုန်တဲ့ အကြောင်းတွေ အများကြီးကို သိခွင့်ရခဲ့ပါတယ်။

နောက်ပိုင်းမှာ တခြားလူတစ်ယောက်(ဆရာတက္ကသိုလ်စိန်တင်လို့ထင်ပါတယ်။ ကျွန်တော်မေ့နေလို့ အတိအကျ မပြောနိုင်တော့ပါဘူး)ရေးထားတဲ့ တရုတ်ပြည် အမွိုင်ကို သွားတဲ့ခရီး ဖတ်ရတော့လည်း ဗိုလ်ချုပ်အောင်ဆန်းရဲ့ ပုထုဇဉ်စိတ်ကလေး တချို့ကို ကျွန်တော်သိခွင့်ရပါတယ်။ ဗိုလ်ချုပ်အောင်ဆန်းအစ်ကို ဦးအောင်သန်းရေးထားတဲ့ ဗိုလ်ချုပ်ရဲ့ ငယ်ဘ၀အကြောင်းတွေ ဖတ်ရတော့လည်း လုပ်ယူလို့မရတဲ့ ရိုးဂုဏ်ဆိုတာမျိုး၊ တကယ်တော်တဲ့ လူတစ်ယောက်ရဲ့ ငယ်ဘ၀ကောက်ကြောင်း ဆိုတာမျိုးတွေကို သိခွင့်ရခဲ့ပါတယ်။

ဒီအချိန်မှာ ကျွန်တော့်ကို ဗိုလ်ချုပ်အောင်ဆန်းအကြောင်း မင်းမှတ်မိသလောက် ပြောဆိုရင် မပြောနိုင်ပါဘူး။ ရေးတေးတေးပါ။ ကျွန်တော်ဖတ်ခဲ့တာ ကြာခဲ့ပါပြီ။ တချို့အရာတွေလောက်သာ မှတ်မိတာပါ။ ဒါပေမဲ့ ကျွန်တော်မှတ်မိတာက ဗိုလ်ချုပ်အောင်ဆန်းရဲ့ တိုင်းပြည်ချစ်စိတ်ပါ။ ရိုးသားမှုပါ။ ဦးဆောင်နိုင်မှုပါ။ လွတ်လပ်ရေးကလွဲရင် သူ့ဘ၀မှာ ကျန်တာဘာမှ မရှိဘူးဆိုတဲ့ အသိပါ။ ဂုဏ်ပကာသန မမက်မောတာပါ။ စတဲ့ အရည်အချင်းတွေပါ။ ကျွန်တော်ချရေးမပြဘဲ ကျန်နေတာတွေလည်း အများကြီးပါ။

ကျွန်တော်ဆိုလိုချင်တာက စာအုပ်တွေက ပြောတဲ့ ဗိုလ်ချုပ်အောင်ဆန်းကနေ ကျွန်တော်တို့ ရလိုက်တာတွေ အများကြီးပါ။ ကျွန်တော်တို့ ဂုဏ်ယူခဲ့ရတယ်။ ကျွန်တော်တို့ ကျေနပ်ခဲ့ရတယ်။ ကျွန်တော်တို့ လေးစားခဲ့ရတယ်။ ကျွန်တော်တို့ အားကျခဲ့ရတယ်။ ကျွန်တော်တို့ ဦးညွှတ်ခဲ့ရတယ်။ ကျွန်တော်တို့ မမွေးခင်က ကျဆုံးခဲ့ပေမယ့် ဒီနေ့အထိ ကြေကွဲဝမ်းနည်းနေရအောင် ခံစားတတ်ခဲ့တယ်။ လူငယ်တွေရဲ့ စိတ်မှာ ဗိုလ်ချုပ်လို့ ပြောတာနဲ့ ဗိုလ်ချုပ်အောင်ဆန်းလို့ပဲ တန်းမြင်ခဲ့ရတယ်။ အဲဒီလောက်အထိ ကျွန်တော်တို့နိုင်ငံရဲ့ ဖခင်၊ ကျွန်တော်တို့ နိုင်ငံရဲ့ လွတ်လပ်ရေးဗိသုကာ၊ ကျွန်တော်တို့နိုင်ငံရဲ့ ဦးဆောင်သူတစ်ဦးကို သိမြင်ခွင့်ရခဲ့တယ်။

အခု ဗိုလ်ချုပ်အောင်ဆန်းအကြောင်း ရုပ်ရှင်ရိုက်မယ်တဲ့။ ကျွန်တော်တို့ အများကြီး မျှော်လင့်နေ ပါတယ်။ ဒေါ်အောင်ဆန်းစုကြည်က ပြောပါတယ်။ သူ့အဖေနဲ့ပတ်သက်လို့ ကောင်းတာပဲ ဖြစ်ဖြစ်၊ မကောင်းတာပဲ ဖြစ်ဖြစ် ရိုက်ပါတဲ့။ ဒါကတော့ ဗိုလ်ချုပ်အောင်ဆန်းရဲ့ သမီးရဲ့ ဆန္ဒပါ။ ကျွန်တော့် အမြင်ကတော့ ဗိုလ်ချုပ်အောင်ဆန်း အကြောင်းမှာ မကောင်းတာရှာဖို့တော့ တော်တော်ခက်ပါလိမ့်မယ်။ စာအုပ်တွေမှာ တွေ့ဖို့ ခက်မှာပါ။ ကျွန်တော်ယုံကြည်နေတာက ဗိုလ်ချုပ်အောင်ဆန်းဟာ တကယ်လို့ သူ့ရာဇ၀င်မှာ မကောင်းတာတစ်ခုခု လုပ်ဖြစ်ခဲ့မယ်ဆိုရင်တောင် အဲဒီမကောင်းမှုဟာ တိုင်းပြည်ကောင်းစားဖို့ အတွက်ပဲဖြစ်လိမ့်မယ် ဆိုတာပါပဲ။

အခု အားလုံးဝိုင်းလုပ်မယ့် ရုပ်ရှင်အတွက် စာအုပ်တွေစုနေတယ် ကြားပါတယ်။ ဗိုလ်ချုပ်အကြောင်းစာအုပ်တွေ ရှိတဲ့လူများကလည်း လှူပေးကြပါလို့ မေတ္တာရပ်ခံပါတယ်။ စီစဉ်နေတဲ့အဖွဲ့ကို မေတ္တာရပ်ခံ ချင်တာက ပြည်တွင်းက လူတွေ ရေးတဲ့ စာအုပ်သာမက နိုင်ငံခြားကလူတွေ ရေးတဲ့စာအုပ်တွေပါ စုဆောင်းသင့်ပါတယ်။ အားလုံးက ကျွန်တော့်ထက်တတ်သိတာမို့ မိကျောင်းမင်း ရေခင်းပြတယ်လို့ မထင်စေချင်ပါဘူး။ ပြီးတော့ တချို့နိုင်ငံတွေက တင်ထားတဲ့ ဗိုလ်ချုပ်အောင်ဆန်း အကြောင်းနဲ့ ကျွန်တော်တို့ မြန်မာနိုင်ငံရဲ့ နောက်ခံ အကြောင်းတွေပါ ရှာဖွေကြည့်ရှုသင့်ပါတယ်။

၂၀၁၅ ဆိုတော့ အချိန်တော့ရပါသေးတယ်။ ဒါနဲ့တစ်ဆက်တည်း တွေးမိတာက ခုနှစ်တွေပါ။ ပြီးတော့ သီချင်းတွေပါ။

"တစ်ထောင့်ကိုးရာတစ်ဆယ့်ငါး........ဆောင်းအကုန်နွေအကူးဝယ်.........လေရူးရယ်
တသုန်သုန်ကြွယ်........ဖေဖော်ဝါရီဆယ့်သုံးရက်မယ်......လင်းအရုဏ်ကျင်းတဲ့ အချိန်အခါမယ်.....စနေနေ့ဝယ် မွေးဖွားခဲ့ပါတယ်......"

၁၉၁၅ ခုနှစ်မှာမွေးခဲ့တဲ့ ဗိုလ်ချုပ်အောင်ဆန်း။ ၂၀၁၅ ခုနှစ်ဆိုရင် နှစ်တစ်ရာပြည့်ပါပြီ။ ၁၉၄၇ ခုနှစ်မှာ ကျဆုံးခဲ့ပြီး သူဦးဆောင်ကြိုးပမ်းခဲ့တဲ့ လွတ်လပ်ရေးက သူ့ကို ဆုံးရှုံးပြီးမှ ၁၉၄၈ ခုနှစ်မှာမှ ရခဲ့တယ်။ သူနဲ့ပတ်သက်တဲ့ သီချင်းတွေ မကြားခဲ့ရတာ ကြာလှပေါ့။ သူ့အကြောင်းမသိတဲ့ ကလေးတွေ များလာတာ ကြာခဲ့ပေါ့။ သူ့မွေးနေ့ကို မသိဘဲ ဗလင့်တိုင်းဒေးဆိုတဲ့ ဖေဖော်ဝါရီ ဆယ့်လေးသာ သိတဲ့လူငယ်တွေ များလာခဲ့တာကြာပေါ့။

အခု ကျွန်တော်တို့ မကြားရတာ ကြာတဲ့သီချင်းတွေ ကြားရတော့မယ်။ ကျွန်တော်တို့နောက်က လူတွေ မေ့မလို ဖြစ်နေတဲ့ သူ့အကြောင်းတွေ မြင်ရတော့မယ်။

တစ်ခါက တပ်မတော်က ကျွန်တော်နဲ့ရင်းနှီးတဲ့ ဗိုလ်ကြီးတစ်ယောက်က ပြောဖူးပါတယ်။ သူ့သားကို နေ့တိုင်း ဗိုလ်ချုပ်အောင်ဆန်းပုံ ပြပြီး အလေးပြုခိုင်းတယ်တဲ့။ ကောင်းလိုက်တဲ့ စိတ်ဓာတ်ဗျာ။ ကျွန်တော်ဝမ်းသာမိပါတယ်။ အခုတော့ အဲဒီကလေးလည်း ဗိုလ်ချုပ်အောင်ဆန်း အကြောင်းကို သိခွင့်ရတော့မှာပေါ့လို့ ကျွန်တော်တွေးလိုက်မိပါတယ်။

ကျွန်တော်ရန်ကုန်မှာနေတုန်းက ကျွန်တော့်အခန်းရဲ့ နံရံက ဘောင်မှာ ဓာတ်ပုံနှစ်ပုံကို အမြဲတင်ထားလေ့ရှိပါတယ်။ တစ်ပုံက ဗိုလ်ချုပ်အောင်ဆန်းရဲ့ပုံတွေကို အားလုံးစုပြီး Photoshop နဲ့လုပ်ထားတဲ့ ပုံပါ။ ကျွန်တော့်ညီဝမ်းကွဲလေးတစ်ယောက် ဓာတ်ပုံဆိုင်မှာ ခဏ၀င်လုပ်နေတုန်းက သူတို့ဆိုင်မှာ အဲဒီပုံရှိတယ်။ အစ်ကိုယူမလား ဆိုတာနဲ့ ကျွန်တော်တောင်းထား လိုက်တာပါ။ နောက်တစ်ပုံကတော့ ကျွန်တော့်အကြိုက်ဆုံး အဆိုတော် ကိုငှက်( ထူးအိမ်သင်) ရဲ့ပုံပါ။

အခု ကျွန်တော်စင်ကာပူ လာတဲ့အချိန်မှာ အဲဒီပုံတွေ ရန်ကုန်မှာ ကျန်ခဲ့ပါတယ်။ ဒါပေမဲ့ ကျွန်တော့်နှလုံးသားထဲမှာ သူတို့ရှိနေတုန်းပါပဲ။ မကြာခင်မှာတော့ ကျွန်တော်လေးစားတဲ့ ဗိုလ်ချုပ်အောင်ဆန်းပုံရိပ်တွေကို ရုပ်ရှင်မှာ ပြန်မြင်ရတော့မှာပါလားလို့ တွေးမိတဲ့အခါ ၂၀၁၅ကို အမြန်ရောက်ချင်တဲ့ စိတ်တွေတောင် ပေါက်မိပါတယ်။

ကျွန်တော့်အလုပ်ထဲမှာ စကားစပ်မိရင်း အလုပ်ထဲက မြန်မာအလုပ်သမားလေးတွေနဲ့ ဗိုလ်ချုပ်အောင်ဆန်း ရုပ်ရှင်အကြောင်း ပြောမိပါတယ်။ အလုပ်သမားတွေပေမယ့် သူတို့ကို ကျွန်တော်လျှော့မတွက်ပါဘူး။ သူတို့အထဲမှာ ကျွန်တော့်ထက် စာဖတ်သူတွေ ပါပါတယ်။ သူတို့အထဲက တစ်ယောက်က ပြောပါတယ်။ နိုင်ငံတကာမှာ မာသာထရီဇာ၊ ဂန္ဒီ စတဲ့နိုင်ငံကို အကျိုးပြုသူတွေ၊ မျိုးချစ်ပုဂ္ဂိုလ်တွေနဲ့ ပတ်သက်ပြီး ရုပ်ရှင်ရိုက်ကြတယ်တဲ့။ ကြည့်လို့တော်တော်ကောင်းတယ်တဲ့။ အခု ဗိုလ်ချုပ်အောင်ဆန်းရုပ်ရှင်ကလည်း ဘယ်လိုလာမလဲ မသိဘူးတဲ့။

ကျွန်တော်လက်လှမ်းမီသလောက်တော့ ရှင်းပြခဲ့ပါတယ်။ အကောင်းဆုံးတော့ လုပ်မှာပါလို့။ သူတို့လည်း သတင်းတွေ ဖတ်မိလို့ သိကြပါတယ်။ ဒါပေမဲ့ အားလုံးက ဗိုလ်ချုပ်အောင်ဆန်းကိစ္စမို့ စိတ်ပူတာပါ။ ထပ်ပြောရရင် ကျွန်တော်တို့တော့ အကောင်းဆုံး မျှော်လင့်ထားပါတယ်လို့ ပြောချင်တာပါပဲ။

ကျွန်တော်ငယ်ငယ်က အဖေက သူ့အသိတစ်ယောက်အိမ်မှာ ဗွီဒီယိုကြည့်ဖို့ ကျွန်တော်တို့ကိုပါ ခေါ်လို့ ပါသွားပါတယ်။ တကယ်တော့ အဖေပြောတာက ကျွန်တော်တို့ကို ဘရုစလီကားပြမှာတဲ့။ အဲဒီအချိန်တုန်းက ဗွီဒီယိုဆိုတာ ကျွန်တော်တို့နိုင်ငံမှာ တကယ့်ရှားပါးပစ္စည်းပါ။ ဘရုစလီလို ကားမျိုးကြည့်ရဖို့ ဆိုတာလည်း တော်တော်ကို ခဲယဉ်းပါတယ်။ ပြီးတော့ အဖေက ပြောပါသေးတယ်။ ဘရုစလီက အဲဒီကားရိုက်ပြီး သေသွားတာတဲ့။ ဒါဆို တော်တော်ကို ရှားပါးပြီး ကြည့်ရကောင်းမယ်လို့ ကျွန်တော်တို့ ညီအစ်ကိုတစ်တွေ တွေးမိပါတယ်။

ဒါနဲ့ အဖေ့အသိအိမ်ကို ပါသွားပါတယ်။ ဒါပေမဲ့ ဗွီဒီယိုစပြတော့ စကားတော်တော်များတဲ့ကားက စပြပါတယ်။ ကျွန်တော်တို့နားမလည်ပါဘူး။ ကလေးတွေဆိုတော့ ဖိုက်တင်ပဲ ကြည့်ချင်တာပေါ့ဗျာ။ ဒီကြားထဲ အဲဒီကားထဲက လူကြီးက ပိတ်ဖြူစင်ကြယ်ကြီးဝတ်ပြီး မျက်မှန်ကြီးနဲ့။ လူက အိန္ဒိယလူမျိုး။ တော်တော်ကို ပျင်းဖို့ကောင်းတဲ့ကားဗျာ။ ကျွန်တော်တို့စိတ်ထဲကတော့ ဒီလူကြီးက ချလည်း မချဘူးပေါ့။ တွေးလိုက်၊ စကားပြောလိုက်နဲ့။ ဒီလူကြီးလုပ်သမျှ ငြိမ်ပြီးကြည့်နေရတာ။ အဖေကတော့ သူ့အသိနဲ့ စကားတွေပြောရင်း ကြည့်နေတာပေါ့။

ဒါပေမဲ့ အဖေ့အသိကတော့ ကျွန်တော်တို့ ကလေးတွေ ပျင်းနေမယ်သိလို့ ခေါက်ဆွဲကြော်တွေ ချကျွေးတယ်ဗျ။ ကျွန်တော်တို့လည်း ရုပ်ရှင်က ပျင်းတာနဲ့ ခေါက်ဆွဲကြော်ချည်း လှိမ့်တီးတော့တာ။ အမယ်-ဗိုက်တော်တော် တင်းပြီး အအေးတွေ၊ ဘာတွေသောက်ပြီး ကုန်ခါနီး ကျတော့ သေနတ်ပစ်ခန်း တစ်ခန်းလား ပါလာရော။ အဲဒီပိတ်ဖြူစင်ကြယ်နဲ့ လူကြီးကို လူတစ်ယောက်က သေနတ်နဲ့ပစ်သွားတာ။ အဲဒီလူကြီး သေပါရောလား။ ကျွန်တော်တို့ကတော့ ဟာ-ချပြီဟေ့ ဆိုပြီး ပျော်မလို့ရှိတုန်း သိပ်မကြာဘူး။ ဇာတ်ကားက ပြီးသွားရော။ ဟာ-ဘာကြီးလဲပေါ့။ တစ်ကားလုံး ဖိုက်တင်က ဒီတစ်ခန်းတည်း။ ဒါတောင် တကယ်သူတင်ကိုယ်တင် ချတာမဟုတ်။ တစ်ဖက်သတ်ကြီး ချသွားတာ။

အဲဒီကား ပြီးမှ ကျွန်တော်တို့ ဘရုစလီကားကို ပြတာ။ တော်တော်စောင့်လိုက်ရတယ်ဗျာ။ ဘရုစလီကျတော့ ကောင်းမှကောင်း။ ချသလားမမေးနဲ့။ ရုပ်ရှင်ရိုက်ရင်း သူသေသွားတယ်လည်း ဆိုရော အဲဒီအခန်းတွေပါ ဖြတ်ပြ။

ဒီလိုနဲ့ပေါ့ဗျာ။ အရွယ်လေးနည်းနည်းရလာမှ သိတယ်။ အဲဒီ ကျွန်တော်တို့ကြည့်ခဲ့တဲ့၊ အင်မတန် ပျင်းစရာကောင်းတဲ့ကား ဆိုတာ မဟတ္တမဂန္ဒီရဲ့ ဇာတ်လမ်း။ ပိတ်ဖြူစင်ကြယ်နဲ့၊ မျက်မှန်ကြီးနဲ့လို့ပဲ ကလေးအရွယ်က သိခဲ့တာကိုး။ တကယ့်နိုင်ငံကို ချစ်တဲ့၊ ငြိမ်းချမ်းရေးလိုလားတဲ့ ပုဂ္ဂိုလ်ကြီးရဲ့ ဇာတ်လမ်းက ဘယ်လာ ချမှာတုန်း။ ကျွန်တော်တို့က ကလေးမို့လို့သာ ချခန်း၊ ဖိုက်တင်ခန်းတွေ မျှော်လင့်နေတာ။

အခု ကျွန်တော်တို့ ဗိုလ်ချုပ်အောင်ဆန်းကား ကြည့်ရတော့မယ့် အရွယ်က လူကြီးတစ်ပိုင်းအရွယ်။ ပြီးတော့ ကျွန်တော်တို့ဗိုလ်ချုပ်အောင်ဆန်း ဇာတ်လမ်းက ဖက်ဆစ်ဂျပန်တော်လှန်ရေးတွေပါမယ်။ ကျွန်တော်တို့ သိတဲ့ အကြောင်းတွေပါမယ်။ ကျွန်တော်တို့တိုင်းပြည်ရဲ့ လွတ်လပ်ရေး ကြိုးပမ်းမှုတွေပါမယ်။ စတဲ့ များပြားလှတဲ့ အကြောင်းတွေ ပါလာမယ်လို့ ယုံကြည်တယ်။ သေချာတာက စိတ်ဝင်စားဖို့ကောင်းမယ်။ ကလေးဘ၀က ကြည့်ခဲ့ရလို့ ပျင်းတာမျိုးဆိုတာတွေကို ဗိုလ်ချုပ်အောင်ဆန်းရုပ်ရှင်ကြည့်တဲ့ ကလေးတွေ ခံစားရမှာ မဟုတ်ဘူးလို့ ကျွန်တော်ထင်တယ်။ တခြားသူတွေနဲ့ ဗိုလ်ချုပ်အောင်ဆန်း ဖြတ်သန်းရတဲ့ ခရီးက မတူခဲ့ပါဘူး။ ရဲဘော်သုံးကျိပ် ဂျပန်သွားတာက အစ ပြင်းထန်တဲ့ ခရီးကြမ်းတွေချည်း။ ပြီးတော့ ဖက်ဆစ်ဂျပန်တိုက်ထုတ်။ တိုင်းရင်းသား စည်းလုံးညီညွတ်ရေး အတွက် ပင်လုံခရီး။ အများကြီးပါပဲ။

ဒီတော့ ကျွန်တော်တို့ရဲ့ ဗိုလ်ချုပ်အောင်ဆန်းရုပ်ရှင်မှာ ကျွန်တော်တို့ အများကြီးမျှော်လင့်လို့ ရတယ်လို့ ကျွန်တော်တွေးမိပါတယ်။ ဇာတ်လမ်းအရ ချတာမချတာက အဓိကမကျပေမယ့် ကျွန်တော်တို့နိုင်ငံရဲ့ လူငယ်တွေစိတ်ထဲမှာ ကျွန်တော်တို့နိုင်ငံရဲ့ လွတ်လပ်ရေးဗိသုကာတစ်ယောက်ရဲ့ ပုံရိပ်တွေကို စွဲထင်သွားစေချင်တယ်ဗျာ။ အဲဒါလေး အဓိကပါ။ ကျွန်တော့်လိုပဲ ကျန်တဲ့သူတွေလည်း ထပ်တူ ခံစားမိမှာပါ။ အခု အဲဒီရုပ်ရှင်စီစဉ်နေသူတွေလည်း အဲဒီရည်ရွယ်ချက်ကို အကောင်အထည်ဖော်မှာလို့ ကျွန်တော် ယုံကြည်နေပါတယ်။ ပြီးတော့နိုင်ငံတကာက ကြည့်မယ်ဆိုတော့ ပိုပြီးတော့လည်း အားထည့်ကြမယ်လို့ ထင်ပါတယ်။ အခုတောင် ဂျာမန်ကရုပ်ရှင် ပညာရှင်တွေနဲ့ တွေ့နေတယ်လို့ သတင်းတွေက ပြောနေလို့ ၀မ်းသာပါတယ်။

မင်းက ဘာဖြစ်လို့ အဲဒီလောက်တောင် ဖြစ်နေရတာလဲလို့ မေးခဲ့ရင် ကျွန်တော့်မှာ ဖြေစရာက တစ်ခွန်းပဲ ရှိပါတယ်။ မြန်မာတစ်ပြည်လုံးကလူတွေနဲ့ တူညီတဲ့ ကျွန်တော့်ရင်ထဲက အဖြေကတစ်ခုတည်းပါ။ အဲဒီအဖြေကဘာလဲဆိုတော့ " ကျွန်တော် ဗိုလ်ချုပ်အောင်ဆန်းကို ချစ်လို့ပါ " ဆိုတာပါပဲ။ ။

ဆူးသစ်
၁၃:၀၃ နာရီ
၂၁.၁.၂၀၁၂

(ခေါင်းစဉ်ကိုကြည့်ပြီးတော့ ဒီကောင် မတန်တစ်ရာနဲ့ သူ့ကိုယ်သူ နိုင်ငံခေါင်းဆောင်နှစ်ယောက်ကြားမှာ ခပ်တည်တည်နဲ့ တပ်ထားတယ်လို့ မထင်ကြပါနဲ့ဗျာ။ ကျွန်တော့်ဆောင်းပါး ဖတ်ပြီးရင် ကျွန်တော်ဘာကိုဆိုလိုတယ်ဆိုတာ နားလည်သွားမယ်ထင်ပါတယ်။ တကယ်တော့ အဲဒီလို တစ်တန်းတည်းထားပြီး မနှိုင်းအပ်တဲ့ ပုဂ္ဂိလ်ကြီးတွေပါ။)

" အမှတ်တရ မှတ်တိုင်တစ်တိုင် "

လူတိုင်းမှာ ဘ၀ရဲ့ အမှတ်တရဆိုတာ ရှိကြမှာပါ။ ကျွန်တော်လည်း ကျွန်တော့်ဘ၀ရဲ့ အမှတ်တရတွေ အများကြီး ရှိခဲ့ပါတယ်။ အခုကျွန်တော်ပြောပြမယ့် အကြောင်းကတော့ ကျွန်တော့်ဘ၀မှာ ၂၀၁၁ ခုနှစ် ကုန်ခါနီး ဖြစ်လာတဲ့ အမှတ်တရ တစ်ခုပါ။ တစ်ဘ၀လုံးအတွက်ကို တကယ့် အမှတ်တရပါပဲ။ မှတ်တိုင်တစ်တိုင်လို့ ပြောလည်း ရမယ်ထင်ပါတယ်။

ကျွန်တော်စာပေကို ရူးသွပ်ခဲ့တာ ကြာခဲ့ပါပြီ။ ငယ်ငယ်ကတည်းက စာစီစာကုံးကို ကျောင်းက ဆရာတွေ၊ ဆရာမတွေက ဘုမသိဘမသိ ၀င်ပြိုင်ခိုင်းလို့ ၀င်ပြိုင်ခဲ့ရာက စခဲ့တယ်ပဲ ဆိုရမှာပါပဲ။ ဒါပေမဲ့ စာစီစာကုံးဆိုတာ ဘာမှန်းမသိသေးတဲ့ အရွယ်မှာ အဖေက ကျွန်တော့်ကို Guideline ပေးခဲ့တယ်။ အဲဒီမှာပဲ ကျွန်တော့်ရဲ့ စာပေ၀ါသနာက စခဲ့တယ်ထင်ပါရဲ့။ မြို့နယ်မှာ ပြိုင်တယ်။ တိုင်းမှာ ပြိုင်တယ်။ နောက်ပိုင်းမှာ ကဗျာကိုပါ ကျွန်တော့်ကို ကျောင်းက ၀င်ပြိုင်ခိုင်းပြန်ပါရော။ အဖေကလည်း မနေနိုင်တော့ ကျွန်တော့်ကို ကဗျာရေးတာ သင်ပေးပြန်ပါတယ်။

ရှစ်တန်းလောက်မှာတော့ ကျွန်တော့်နှလုံးသားက ကိုယ့်ဘာသာ ကဗျာရေးတတ်ဖို့ ဖန်တီးတတ်လာပါပြီ။ ဒါပေမဲ့ အဖေက စနစ်တကျတတ်အောင် ဆိုပြီး ဖျာပုံမြို့၊ နိုင်ငံတော် တန်းမြင့်ကျောင်း အထက်တန်း မြန်မာစာပြ ဆရာကြီး ဦးဘိုးငွေ ရေးတဲ့ တန်းမြင့် ကဗျာဖွဲ့နည်းကျမ်းကို ပေးဖတ်ပါတယ်။ ပြီးတော့ စာရေးနည်း လမ်းညွှန်စာအုပ်မျိုးတွေ ကျွန်တော့်စားပွဲပေါ်ကို အဖေက အရောက်ပို့ခဲ့ပါတယ်။

ကိုးတန်း၊ ဆယ်တန်းလောက်မှာတော့ ကျွန်တော်စာတိုပေစတွေ၊ ကဗျာတွေ စရေးပါပြီ။ ကိုယ့်ဘာသာ ရေးရုံရေးထားတာပါ။ ဘယ်သူမျှလည်း မပြမိပါဘူး။ ၀တ္ထုတိုမကျ၊ အရှည်မကျတွေရော ရေးပါတယ်။ ဘယ်မှလည်း မပို့ပါဘူး။ ဒါပေမဲ့ နောက်ပိုင်းတော့ အဖေ့ကိုတော့ ပြဦးမှပါပဲလို့ တွေးပြီး အဖေ့ကို စပြပါတယ်။ အဖေက ကျွန်တော့်ဝါသနာကို သိလို့ သေသေချာချာ ဖတ်ပေး၊ ပြောပေးပါတယ်။ အဖေ့ကြောင့် စာရေးတာ ပိုချောခဲ့ပါတယ်။

ဒီနေရာမှာ ကျွန်တော့်အဖေ အကြောင်းနည်းနည်း ပြောချင်ပါတယ်။ အဖေက နယ်ကပါ။ သူတို့တုန်းက အထက်တန်းကျောင်းမှာ မြန်မာစာသင်တဲ့ ဆရာကြီး ဦးရွှေဝိုင်းဆိုတာ ရွှေငယ်ဝိုင်း ( ကြို့ပင်ကောက်) ဆိုတဲ့ နာမည်နဲ့ ကဗျာတွေ၊ စာတွေရေးပါတယ်။ ကျွန်တော်တို့ ပညာရေးလောကမှာ ထင်ရှားတဲ့ ကဗျာတစ်ပုဒ်ဖြစ်တဲ့၊ ဆရာတွေရဲ့ စေတနာကို ရည်ညွှန်းတဲ့ " တပည့်မရှား၊ တစ်ပြားမရှိ၊ ပီတိကိုစား၊ အားရှိပါ၏ " ဆိုတဲ့ ကဗျာဟာ ဆရာကြီး ဦးရွှေဝိုင်း [ ရွှေငယ်ဝိုင်း (ကြို့ပင်ကောက်)] ရေးခဲ့တာပါ။ ကျောင်းသားတွေကို သူ့လစာထဲက စုပြီး အဲဒီခေတ်က မြန်မာစာ ဂုဏ်ထူးထွက်ရင် ရွှေဒင်္ဂါးပြားဆုချခဲ့တဲ့ တကယ်ကို ပီတိစားတဲ့ ဆရာကြီးပါ။ သူက အဖေတို့ကျောင်းသားတွေကို ကျောင်းစာအပြင် ကဗျာ ရေးနည်းမျိုးတွေ၊ စကားပြေ ရေးဟန်တွေ သင်ပြပြီး မြန်မာစာကို ချစ်တတ်အောင် သင်ပေးခဲ့ပါတယ်။ အဲဒီလို သင်ပေးခဲ့လို့လည်း ကျွန်တော့်အဖေဟာ စာပေလောကထဲကို စာရေးဆရာတစ်ယောက် အဖြစ်ဝင်ရောက်နိုင်ခဲ့ပါတယ်။

ကျွန်တော်စာပေလောကထဲကို ၀င်နိုင်ခဲ့ရာမှာလည်း အဖေ့ကို ဆရာကြီး ဦးရွှေဝိုင်းတို့ မြန်မာစာကို ချစ်တတ်အောင်သင်ပေးခဲ့သလိုမျိုး ကျွန်တော့်ကို မြန်မာစာကို ချစ်တတ်အောင် သင်ပေးခဲ့တဲ့ ဆရာကြီး တစ်ဦးရှိခဲ့ပါတယ်။ သူကတော့ မြန်မာစာဆရာကြီး ဂုဏ်ထူးဦးသိန်းနိုင်ပါ။ ကျွန်တော်ဆယ်တန်းတုန်းက သူ့ဆီမှာ ကျူရှင်တက်ရင်း မြစေတီ တန်းခွဲမှာ စာစီစာကုံး ပြိုင်ပွဲလုပ်ရင် ကျွန်တော်က ဆုတစ်ခု အမြဲလိုရခဲ့ပါတယ်။ နဂိုကတည်းက စာရေးတာ ၀ါသနာပါလို့ စာစီစာကုံး ပြိုင်ရရင် အမြဲလို ပျော်တတ်ခဲ့ပါတယ်။ အဲဒါလည်း ဆရာကြီးက မြန်မာစာ သင်တာကောင်းလို့ရယ်၊ အဖေချပေးတဲ့ လမ်းညွှန်မှုတွေ ကောင်းလို့ရယ် ဆိုတာ ကျွန်တော် ယုံကြည်နေမိပါတယ်။

အဖေကတော့ ဆောင်းပါးတွေ အရေးများပြီး ယခုထက်ထိလည်း စာပေလောကမှာ ကျင်လည်နေတုန်းပါပဲ။ ဆရာကြီး ဦးရွှေဝိုင်းကြောင့် မြန်မာစာပေလောကထဲကို ၀င်သွားကြတဲ့ တပည့်တွေထဲမှာ အဖေတို့ထက် နာမည်ကြီး ထင်ရှားလာခဲ့တာကတော့ အဖေနဲ့သူငယ်ချင်းဖြစ်တဲ့ ကဗျာဆရာ၊ စာရေးဆရာ မောင်စိန်ဝင်း (ပုတီးကုန်း) ပါ။ ဆရာမောင်စိန်ဝင်း (ပုတီးကုန်း) ဟာလည်း ဆရာကြီး ဦးရွှေဝိုင်းရဲ့ တပည့်ဖြစ်ပြီး ဆရာကတော့ ပါရမီရှင်မို့ ယနေ့အထိ သူ့ကဗျာများက လူတွေကြားထဲမှာ စွဲနေတုန်းပါပဲ။

ကျွန်တော်ပြောချင်တာက ကျွန်တော့်ကို အဖေ ဘာကြောင့် Guideline ပေးနိုင်သလဲ ဆိုတာပါ။ ဒီလို ဆရာကြီးရဲ့ သွန်သင်မှုနဲ့ စာပေလောကထဲ ၀င်ခဲ့တဲ့ အဖေက ကျွန်တော်ရေးတာတွေ လိုနေရင် ထောက်ပြနိုင်ခဲ့ပါတယ်။ ဒီလိုနဲ့ ကျွန်တော်ကဗျာတွေ စရေးပြီး မဂ္ဂဇင်းတွေ စပို့ပါတယ်။ ၁၉၉၄ ခုနှစ်မှာတော့ ကျွန်တော့်ကဗျာ တစ်ပုဒ် မဂ္ဂဇင်းမှာ စပါပါတယ်။ အရွေးခံရပြီလို့ သိတာက ၁၉၉၂ ခုနှစ်မှာပါ။ ကဗျာ အရွေးခံရတယ်လို့ ရွေးစာရင်း သိသိချင်း မဂ္ဂဇင်းမှာတွေ့တော့ အိမ်ပေါ်ထပ်ကနေ လှေကားကို အဆင်းမို့် ကျွန်တော် အပျော်လွန်ရင်း ချော်ပြီး ပြုတ်ကျခဲ့ပါတယ်။ အဲဒီကဗျာ တကယ်ပါတော့ နောက်နှစ်နှစ်မှာပါ။ အဲဒီကတည်းက စာပေ၀ါသနာပါရင် စိတ်ရှည်ရမယ်၊ ဇွဲကြီးရမယ် ဆိုတာ ကျွန်တော်တွေးခဲ့မိပြီးသားပါ။

အဲဒီအချိန်တုန်းက ကျွန်တော့်ရဲ့ ကဗျာ အရွေးခံရမှုမှာ ကျွန်တော် လိပ်ပြာသန့်သန့်နဲ့ ပျော်နိုင်ခဲ့ပါတယ်။ ဘာဖြစ်လို့လဲဆိုတော့ ကျွန်တော့်ကဗျာ အရွေးခံရတဲ့ ကိစ္စမှာ ကျွန်တော့်အဖေက မဂ္ဂဇင်းတိုက်နဲ့ ရင်းနှီးလို့ ဆိုတာမျိုး မရှိသလို အဖေ့သူငယ်ချင်း အရင်းခေါက်ခေါက် ဆရာမောင်စိန်ဝင်း ( ပုတီးကုန်း) ကဗျာ အယ်ဒီတာ အဖြစ် ကိုင်နေတဲ့ ရွှေသမင် မဂ္ဂဇင်း မှာ ပါတာ မဟုတ်ခဲ့လို့ပါပဲ။ ကျွန်တော်အရွေးခံခဲ့ရတာ မဟေသီ မဂ္ဂဇင်းမှာပါ။ တကယ်ဖော်ပြတော့ မဟေသီ အယ်ဒီတာအဖွဲ့ ပါတဲ့ ရတနာသစ် မဂ္ဂဇင်းပါ။

ဒီလိုနဲ့ ကျွန်တော့်ရဲ့ စာပေခရီးအစဟာ သူများလိုတော့ မဟုတ်ခဲ့ဘူးလို့ပဲ ဆိုပါရစေ။ ကျွန်တော်ကလည်း လူတစ်မျိုးပါ။ အဲဒီအချိန် အဖေ့ကို ပြောပြီး ရွှေသမင်မှာ ကဗျာတစ်ပုဒ်လောက် ထည့်ပေးပါလို့ ဆရာမောင်စိန်ဝင်း( ပုတီးကုန်း) ကို လုံးဝ မပြောခိုင်းခဲ့ပါဘူး။ ကျွန်တော့်ဘာသာ မဂ္ဂဇင်းတိုက်တွေကို စာတိုက်ကနေ ပို့ခဲ့တာပါ။ ကျွန်တော့်ကဗျာ စပါတော့ အဖေက မဟေသီကို မင်းကဗျာပို့ထားလား လို့တောင် မေးခဲ့ပါသေးတယ်။ ဆရာမောင်စိန်ဝင်း (ပုတီးကုန်း) ကလည်း သူ့သူငယ်ချင်းသား ဆိုပြီး ကျွန်တော့်ကဗျာကို လုံးဝ ထည့်မပေးပါဘူး။ ပိုဆိုးတာက အဖေက အဲဒီအချိန်မှာ ရွှေသမင်မဂ္ဂဇင်းရဲ့ အမှုဆောင်အယ်ဒီတာ တစ်ဦးဖြစ်နေပါပြီ။ အဲဒါလည်း သူက ကျွန်တော့်ကဗျာကို လုံးဝမရွေးပါဘူး။ ဒါဟာ သူ့ရဲ့ ကိုယ်ကျင့်သိက္ခာကို စောင့်ထ်ိန်းမှုလို့ ကျွန်တော်ယုံပါတယ်။ ကျွန်တော်သူ့ကဗျာတွေကို ကြိုက်သလို သူ့ကိုလည်း လေးစားပါတယ်။ ကျွန်တော့်ကဗျာကို သူမကြိုက်လို့ မရွေးတဲ့ကိစ္စမှာ သူ့ကို ပိုလေးစားမိပါတယ်။ ကျွန်တော်ကလည်း တစ်ခါမျှ အဖေ့ကို ပြောပေးဖို့ မတောင်းဆိုခဲ့ပါဘူး။ ကျွန်တော့်ကြောင့် သူတို့ လုပ်ရကိုင်ရခက်မှာ စိုးလို့ပါ။ နောက်တစ်ခုက ကျွန်တော့်မာနပဲ ထင်ပါရဲ့။ အယ်ဒီတာ ကြိုက်လို့ရွေးတဲ့ကဗျာကြောင့်ပဲ ကျွန်တော်က ပျော်ချင်သူပါ။ ကျွန်တော့်ကဗျာတွေကို မဂ္ဂဇင်းတိုက်ကို ပို့ရင် စာတိုက်ကပဲ ပို့ခဲ့တာပါ။ အိမ်မှာ စာအိတ်နဲ့ တံဆိပ်ခေါင်းကို အများကြီး ၀ယ်ထားခဲ့ဖူးပါတယ်။

ဒီလိုနဲ့ 'သားလတ်' ဆိုတဲ့ ကလောင်နာမည်နဲ့ ကျွန်တော် အချစ်ကဗျာ၊ အချစ် ၀တ္ထုတွေ၊ ဘ၀သရုပ်ဖော် ၀တ္ထုတွေ ရေးရင်း စာပေလောကထဲကို မသိမသာ ၀င်ခဲ့ပါတယ်။ ဆရာမောင်စိန်ဝင်း (ပုတီးကုန်း) က သူကြိုက်တဲ့၊ ကျွန်တော်ရေးတဲ့ တက္ကသိုလ်စိန်ရတု ကဗျာကိုတော့ သူ့ရဲ့ အရိန္ဒမာမဂ္ဂဇင်းမှာ ယူပြီး ဖော်ပြခဲ့ပါတယ်။ တကယ်တော့ ကျွန်တော်ပို့ခဲ့တာ ရွှေသမင်အတွက်ပါ။ ဒီလိုနဲ့ လူအများကြီး မသိပေမယ့် စာပေလောကထဲက လူတချို့သိလောက်တဲ့ အထိတော့ ကျွန်တော့်စာပေခရီးလေး တွင်ခဲ့တယ် ဆိုပါတော့။

တစ်ပြိုင်တည်းမှာပဲ ကျွန်တော်ဟာ ရန်ကုန်စက်မှုတက္ကသိုလ် စတက်နေပါပြီ။ ကျွန်တော့်ရဲ့ ပထမဆုံး ကဗျာ အရွေးခံရတော့ ဒုတိယနှစ်(စက်မှုတက္ကသိုလ်) ရောက်နေပါပြီ။ အဲဒီမှာ တတိယနှစ်ရောက်တော့ ကျွန်တော်လိုချင်တဲ့ Mechanical မေဂျာကို ရလည်း ရရော ကျွန်တော့် စိတ်မှာ အတွေးတစ်ခု ဖြစ်လာပါတယ်။ အဲဒါက တစ်နေ့ကျရင် ကျွန်တော်ဟာ စက်မှုအင်ဂျင်နီယာတစ်ယောက်တော့ ကျိန်းသေ ဖြစ်ပြီ။ ဒါကြောင့် ဖြစ်ချင်တိုင်း ဖြစ်ခွင့်မရနိုင်တဲ့ စာရေးဆရာဘ၀ကိုတော့ မဖြစ်ဖြစ်အောင် အားထုတ်မယ်လို့ စိတ်ထဲက ကြံစည်မိတာပါပဲ။ တည့်တည့်ပြောရရင်တော့ ကျောင်းစာကို လိုမှလုပ်မယ်။ ကျန်တာက ကျွန်တော် စာရေးဆရာ ဖြစ်ဖို့လုပ်မယ် ဆိုတာပါပဲ။ အဲဒီအချိန်တုန်းက ကျွန်တော်ဟာ အင်ဂျင်နီယာ တစ်ယောက် ဖြစ်ဖို့ထက် စာရေးဆရာ တစ်ယောက်ဖြစ်ဖို့ကို ပိုပြီး လိုလားနေသူပါ။

ဒီတော့ ကျွန်တော့်ခုံနံပါတ်တွေ အောက်နားကကို မတက်ခဲ့ပါဘူး။ အမှတ်နဲ့ ခုံနံပါတ်ခွဲတဲ့ အတန်းမှာ ကျွန်တော့်ခုံနံပါတ်က လူ ၂၀၀ ကျော်မှာ အမြဲတမ်း ၁၀၀ ကျော်မှာပါပဲ။ ဒါပေမဲ့ ကျွန်တော်ကျေနပ်ခဲ့ပါတယ်။ အဲဒီအချိန်တုန်းက ကျွန်တော်က ကျောင်းစာထက် အပြင်စာကို ပိုတပ်မက်နေခဲ့တာကိုး။

အဲဒီအတွက် ကျွန်တော့်ရဲ့ အရင်းနှီးဆုံး သူငယ်ချင်းတွေက ကျွန်တော့်ကို ကူညီပါတယ်။ ကျွန်တော့်ငယ်သူငယ်ချင်း တစ်ယောက်က ဆေးကျောင်းမှာ။ သူက ကျွန်တော်နဲ့ ကဗျာစာအုပ် တွဲထုတ်ဖို့ ကူညီတယ်။ သူပဲ ပိုက်ဆံစိုက်တာ။ စတုတ္ထနှစ်မှာ ကျွန်တော်တို့ Mechanical ကသူငယ်ချင်းတစ်ယောက်ကပဲ ကျွန်တော့်ကဗျာစာအုပ် တစ်အုပ်ထုတ်ဖို့ သူက ပိုက်ဆံစိုက်ပြီး လုပ်ခဲ့ကြပါတယ်။ အားလုံး လက်ကမ်းစာစောင် သဘောပေမယ့် ကျောင်းတွေမှာ လှည့်ပတ်ရောင်းရင်း ကျွန်တော့်ဝါသနာ ပျိုးထောင်ခွင့်လေး ရလိုက်ပါတယ်။ ပြီးတော့ စက်မှုတက္ကသိုလ်က ကျွန်တော်နဲ့ မေဂျာတူ၊ မေဂျာ မတူသူတွေက ကျွန်တော် စာတွေ ပိုဖတ်ချင်မှန်းသိလို့ သူတို့ အိမ်က စာကြည့်ဗီရိုထဲက စာအုပ်တွေတောင် ယူလာပေးခဲ့ကြပါသေးတယ်။

တဖြည်းဖြည်းနဲ့ လုံးချင်းဝတ္ထုတွေလည်း ကျွန်တော့်ဘာသာ တော်တော်ရေးပြီး သိမ်းထားခဲ့ပါတယ်။ တစ်နေ့ကျရင် ထုတ်မယ်ပေါ့။ တစ်ခါတော့ ကျွန်တော် စာအုပ်တိုက်တစ်တိုက်ကို သွားပြီး စပ်ကြည့်ပါတယ်။ ဖတ်ပေးမယ်။ ထားခဲ့ပါတဲ့။ ပြီးတော့ ဖတ်ပြီးတဲ့အခါ ပြန်လာယူဖို့ ပြောတော့ ကျွန်တော့်ကို မှတ်ချက်တွေ ရေးပေးလိုက်တယ်။ အချစ်ဝတ္ထုကို ပေးလိုက်တဲ့ မှတ်ချက်က ရည်ရွယ်ချက် မရှိဘူး ဆိုတဲ့ ပုံစံမျိုး ရေးလိုက်တော့ ကျွန်တော်တောင် မျက်စိလည်သွားခဲ့တယ်။ သူတို့တိုက်က ထုတ်နေတဲ့ အချစ်ဝတ္ထုစာအုပ်တွေက နိုင်ငံ တည်ဆောက်ရေးတို့၊ အမျိုးသားရေးတို့ ပါသလား ဆိုတာ ကျွန်တော့် အိမ်အပြန်လမ်းမှာ စဉ်းစားခဲ့မိတယ်။ နောက်ဆုံးတော့ ကိုယ့်ဘာသာ ငါစာရေးတာ ညံ့လို့လို့ပဲ တွေးပါတယ်။

ဒီလိုနဲ့ ကျွန်တော့်ရဲ့ နည်းနည်းကြမ်းတဲ့ စာပေခရီးလမ်းမှာ ပေတေပြီး လျှောက်ခဲ့ရင်း ဟိုပြိုင်ပွဲ၊ ဒီပြိုင်ပွဲက ဆုလေးတွေလည်း နည်းနည်းပါးပါး ရခဲ့ပါတယ်။ ဒီမှာပဲ ၁၉၉၇ ခုနှစ်လောက်မှာ ဘောလုံးဆောင်းပါး ၀င်ပြိုင်ချင်တာနဲ့ ကလောင်တစ်ချောင်း စစဉ်းစားခဲ့ပါတယ်။ တကယ်တော့ သားသုံးယောက်မှာ အလတ်ဖြစ်တဲ့ ကျွန်တော်က စာစရေးကတည်းက ' သားလတ် ' ဆိုပြီး ရေးခဲ့တာ။ အဲဒီကလောင်က အချစ်ဝတ္ထုတို့၊ ကဗျာတို့၊ ဘ၀သရုပ်ဖော်တို့ ရေးခဲ့တာ ကြာပြီမို့ တခြား လိုင်းတစ်ခု ပြောင်းရင် ကလောင်ပြောင်းသင့်တယ် ထင်လို့ပါ။ တိုတိုပြောရရင် ' ဆူးသစ် ' ဆိုတဲ့ ကလောင်ကို ရွေးပြီး ၀င်ပြိုင်တာ နှစ်သိမ့်ဆု ရခဲ့ပါတယ်။

နောက်တော့ ကျွန်တော်ကျောင်းပြီးတဲ့အချိန်မှာ ကျွန်တော့်ထက်ငယ်တဲ့ လူငယ်လေးတွေ၊ ကျွန်တော့် ညီလေး အရွယ်တွေကို ပြောစရာတွေ များများလာလို့ မနေနိုင်တော့ဘဲ လူငယ်ဆောင်းပါးလို အတွေး အခေါ် မြှင့်ပေးနိုင်တာမျိုးတွေကို ၂၀၀၀ခုနှစ်မှာ ' ဆူးသစ်' ဆိုတဲ့ကလောင်နဲ့ စရေးခဲ့ပါတော့တယ်။ ဒီနေရာမှာ ကျွန်တော့်ရဲ့ ဦးတည်ချက်က ဆရာကြီးလုပ်ဖို့ မဟုတ်ဘဲ ကျွန်တော်သိထားတာကို ဗဟုသုတ မျှဝေတဲ့ ပုံစံမျိုး ( Knowledge Share) လုပ်တာပါ။ အဲဒီအတွက် ကျွန်တော့်ဆောင်းပါးတွေမှာ ဘယ်လိုလုပ်ရင် ဘယ်လိုချမ်းသာသွားမယ်တို့ ဘာတို့ မပါခဲ့ပါဘူး။ ဘာဖြစ်လို့လဲ ဆိုတော့ ကျွန်တော်တောင် မချမ်းသာသေးလို့ ငွေရှာနေရတာ မဟုတ်လား။ တက်ကျမ်းလို့ သူများတွေ နာမည်ပေးပေမယ့် ကျွန်တော့်သဘောထားကတော့ အကြံပြုတဲ့စာ၊ ဗဟုသုတ မျှဝေတဲ့စာ ဆိုတဲ့ သဘောလောက် သတ်မှတ်ချင်တာပါ။

အဲဒီဆောင်းပါးတွေကိုတော့ အဖေက သူတာဝန်ယူနေတဲ့ မှုခင်းရှုထောင့်မဂ္ဂဇင်းမှာ လစဉ်ဖော်ပြပေး ခဲ့ပါတယ်။ ဒီနေရာမှာ အဖေ့ကို ကျွန်တော်က အဖေကြိုက်ရင် ထည့်ပေးပါလို့ ပြောခဲ့တော့ အဖေက ဖတ်ကြည့်ပြီး မဂ္ဂဇင်းထုတ်ဝေသူကလည်း ကြိုက်လို့ ထည့်ပေးခဲ့တာပါ။ ဒါနဲ့ ၂၀၀၀ခုနှစ်ကနေ ယနေ့အထိ ကျွန်တော်ဟာ အဲဒီမဂ္ဂဇင်းမှာ လစဉ်ရေးသားခွင့် ရခဲ့ပါတယ်။ ရံဖန်ရံခါ တခြားမဂ္ဂဇင်းများကိုလည်း ကျွန်တော့်ဆောင်းပါးတွေ ပို့ဖြစ်ခဲ့ပြီး ဖော်ပြခံခဲ့ရပါတယ်။

၂၀၀၅ ခုနှစ်၊ ဇူလိုင်လမှာတော့ စကားပြေရေးဟန်ကနေ စကားပြောပုံစံကို ပြောင်းခဲ့ပါတယ်။ အကြောင်းက စကားပြေနဲ့ ရေးရတာ ကျဉ်းနေတဲ့ ဆောင်းပါးမျိုးတွေ ကျွန်တော့်မှာ ရှိလာလို့ပါ။ ပြီးတော့ ကျွန်တော့်ညီလေးကို ပြောချင်တဲ့ အကြောင်းတွေလည်း ရှိလာလို့ ' ညီလေးဖတ်ဖို့ရေးတဲ့စာ ' ဆိုတဲ့ ခေါင်းစဉ်နဲ့ ကျွန်တော့်ဆောင်းပါးတွေကို ယနေ့အထိ ဆက်ရေးဖြစ်ခဲ့ပါတယ်။

၂၀၁၁ခုနှစ်မှာ ကျွန်တော်အိမ်ခဏပြန်တော့ အဖေက ကျွန်တော့်ကို ပြောပါတယ်။ သူကိုယ်တိုင် သူများတွေ စာအုပ်ထုတ်တာကို စီစဉ်ပေးနေရတယ်တဲ့။ အဲဒီလူတွေရဲ့ စာတွေက ကျွန်တော့်လောက် မများသေးပါဘူး။ သူတို့တစ်တွေ စာအုပ်တွေ ထုတ်နေကြတော့ ကျွန်တော့် ဆောင်းပါးတွေစုပြီး စာအုပ်ထုတ်ဖို့ သူလုပ်မယ်တဲ့။ ကျွန်တော်အမှန်အတိုင်းပြောရရင် ကျွန်တော့်ရဲ့ အဓိက ရည်ရွယ်ချက်က လုံးချင်းဝတ္ထုတွေ ထုတ်ဖို့ပါ။ ဒါပေမဲ့ လောလောဆယ် ကျွန်တော့်မှာ လုံးချင်းထုတ်နိုင်တဲ့ ၀တ္ထုအရေအတွက်က နည်းနေသေးတော့ မဖြစ်နိုင်ခင်စပ်ကြားမှာ ဒီဆောင်းပါးတွေ ထုတ်တာ ကောင်းပါတယ်လို့ တွေးပြီး သဘောတူခဲ့ပါတယ်။ ဒါနဲ့ ကျွန်တော့်စိတ်ကြိုက် ဆောင်းပါးတွေ ပြန်ရွေးပြီး အဖေ့လက်မှာ ထားခဲ့ပါတယ်။

ကျွန်တော် စင်ကာပူမှာ ပြန်လာပြီး အလုပ်လုပ်နေတုန်းမှာပဲ အဖေ သူ့ဘာသာ အားလုံးစီစဉ်ပြီး အခု ၂၀၁၁ခုနှစ် ဒီဇင်ဘာလလယ်မှာ စာအုပ်ထွက်လို့ ဖြန့်ခဲ့ပါပြီ။ ကျွန်တော့်ကလောင်နာမည် ' ဆူးသစ် ' နဲ့ ဖြစ်ပြီး "'အဝေးရောက် ထွန်းတောက်မြန်မာ' နှင့် ညီလေးဖတ်ဖို့ရေးတဲ့စာ" ဆိုတဲ့ ခေါင်းစဉ်နဲ့ပါ။ ဆရာ ဒေါက်တာချစ်စံဝင်း နဲ့ ဆရာ မောင်စိန်ဝင်း(ပုတီးကုန်း) ရယ်၊ ကျွန်တော့်အဖေရယ် အမှာစာရေးပေးထားပါတယ်။ ဆောင်းပါး (၂၃)ပုဒ်ပါပါတယ်။ နိုင်ငံ့ဂုဏ်ရည်စာပေတိုက်က ထုတ်ဝေ ခဲ့တာဖြစ်ပြီး တစ်အုပ် ၂၀၀၀ ကျပ်နဲ့ပါ။

ဆရာဒေါက်တာချစ်စံဝင်းကတော့ သူ့အမှာစာထဲမှာ ဒီလို ဆိုထားပါတယ်။

" 'စာကလေးပြတဲ့ မိဘမေတ္တာ' နှင့် ' အဖေပေးလိုက်သော အံသွားတစ်ချောင်း' ဆောင်းပါးနှစ်ပုဒ်မှာ ဂန္ထ၀င်ဆောင်းပါးနှစ်ပုဒ် ဖြစ်ပါသည်။"

" ထို့အပြင် ခေါင်းစီးပေးထားသော 'အဝေးရောက် ထွန်းတောက်မြန်မာ' နှင့် 'သူငယ်ချင်းပြောတဲ့ တက္ကသိုလ်ပုံပြင်' ဆောင်းပါးနှစ်ပုဒ်ကလည်း ယနေ့လူငယ်တွေ အားကျ အတုယူဖွယ်ကောင်းလှပါသည်။ ပုံပြင်မဟုတ်၊ ၀တ္ထုမဟုတ်၊ စိတ်ကူးယဉ်မဟုတ်၊ လက်တွေ့ဘ၀ သရုပ်မှန်မို့ လူငယ်တွေ စံနမူနာ ယူကြစေချင်ပါသည်။ " လို့ ဆိုထားပါတယ်။

ဆရာ မောင်စိန်ဝင်း ( ပုတီးကုန်း) ကတော့-

" သည်စာစုသည် " ဆူးသစ်" ဆိုသော လူငယ်တစ်ဦး၏ ဘ၀တစ်စိတ်တစ်ပိုင်း ဖြတ်သန်းမှုပုံရိပ်ဟု ဆိုလိုက ဆိုနိုင်ပေမည်။

ဆူးသစ်ဆိုသော မြန်မာလူငယ်တစ်ဦး၏ 'သမိုင်း' တစ်ပိုင်းတစ်စ ဖြစ်ပါလိမ့်မည်။

ကျွန်တော့်ကဗျာလေးတစ်ပုဒ်ဖြင့် သူ့ကို အမှတ်တရ ဖြစ်စေချင်ပါသည်။

"သမိုင်း"

လူငယ်သွေးသစ်
ရေကြည်ဖြစ်လျှင်........

'ဧရာဝတီ'
မြန်မာပြည်တည့်
ရေကြည် 'လှိုင်းသစ်'
တိုက်စားရစ်
ခေတ်ကမ်းပါးကို ထုဆစ်စေ။ ။"

လို့ ကျွန်တော့်ကို သူ့ရဲ့ကဗျာတစ်ပုဒ်နဲ့ ရည်ညွှန်းခဲ့ပါတယ်။

အမှာစာရေးပေးတဲ့ စာရေးဆရာများကို ကျွန်တော်ကျေးဇူးတင်မိပါတယ်။ ပြီးတော့ ကျွန်တော့်ရဲ့ အဖေပါ။ သူမရှိရင် ဒီစာအုပ်ဖြစ်လာစရာ အကြောင်းကို မရှိပါဘူး။ ပြီးတော့ ကျွန်တော်ဘာလုပ်လုပ် နောက်ကနေ အမြဲယုံကြည်နေတတ်တဲ့ ကျွန်တော့်အမေ။ ကျွန်တော့်အနုပညာကို တန်ဖိုးထားတဲ့၊ ကျွန်တော်ဘာလုပ်လုပ် အမြဲအကောင်းမြင်တဲ့ ကျွန်တော့်ချစ်ဇနီး ပါရမီဖြည့်ဖက်လေး။ ကျွန်တော့်ကို အားပေးနေကြတဲ့ ကျွန်တော့်ရဲ့ အစ်ကိုကြီး မိသားစုနဲ့ ကျွန်တော့်ညီလေး။ ဒီညီလေးကြောင့်ပဲ ဒီစာစုတွေ ဖြစ်လာခဲ့ ရတာပါ။ နောက်ဆုံးကတော့ ကျွန်တော့်ဘ၀ရဲ့ စာပေရူးသွပ်မှုကို ၀ိုင်းပြီး ပံ့ပိုးအားပေးခဲ့ကြတဲ့ ကျွန်တော့်ငယ်သူငယ်ချင်းတွေနဲ့ ရန်ကုန်စက်မှုတက္ကသိုလ်က သူငယ်ချင်းတွေ။ အားလုံးကို ကျွန်တော့်နှလုံးသားထဲက လှိုက်လှိုက်လှဲလှဲနဲ့ ကျေးဇူး တင်နေမိပါတယ်။

တကယ်တော့ ဒီစာအုပ်ဟာ ကျွန်တော့်ဘ၀ရဲ့ ပထမဆုံး စာအုပ်မို့ အမှတ်တရ မှတ်တိုင်တစ်တိုင် ဖြစ်သွား ခဲ့ပါပြီ။ အခြေအနေပေးရင် နောက်ထပ်စာအုပ်ပေါင်းများစွာ ကျွန်တော်ထပ်လုပ်ချင်ပါသေးတယ်။ ၀ါသနာကို အရင်းခံထားခဲ့တဲ့ ကျွန်တော့်ဘ၀ရဲ့ ဖြတ်သန်းမှုတွေထဲမှာ ကျွန်တော်ပေးချင်တာတွေကို မျှဝေရင်း မသေမချင်း စာရေးနေတဲ့သူ အဖြစ်တော့ ကျွန်တော်ရှင်သန် နေချင်ပါသေးတယ်ဆိုရင် ကျွန်တော့်ကို နားလည်ပေးနိုင်မယ်လို့ ထင်မိပါတယ်။ ။

ဆူးသစ်
၁၃:၄၁ နာရီ
၂.၁.၂၀၁၂