Friday, January 27, 2017

" အစဉ်ထာဝရ " ( ၅ )


" လာကွာ။ ကျောင်းထဲကိုလျှောက်မကြည့်ခင်ငါတို့Section B မှာ ဘယ်သူတွေပါလဲသွားကြည့်ထားရအောင်။ကိုယ့်အခန်းကသူငယ်ချင်းတွေဆိုတော့ နာမည်ကြိုသိထားတော့ကောင်းတာပေါ့"

သန့်စင်အောင်စကားအဆုံးကောင်းသားပဲ၊သွားကြည့်တာပေါ့ဟုပြော ၍ကျောင်းသူကျောင်းသားများ၏အတန်းခွဲများကပ်ထားရာBoardများရှိရာကို လှမ်းသည်။ပြီးတော့ပထမနှစ်တန်းခွဲဘီရှိရာမှာနှစ်ယောက်သားနာမည်များကို
ဖတ်လိုက်ကြ၏။

"ဟာ-ဟေ့ကောင်။ဒီမှာကြည့်ဦး။နာမည်တွေနောက်မှာပေါက်ကရတွေရေးထားတာ။
ရယ်တော့ရယ်ရတယ်ကွ။ဘာတဲ့။ခင်နှင်းယုဆိုတဲ့နာမည်နောက်ကစာရေးဆရာမကြီးတဲ့။
တိန့်ရှောင်လျန်ဆိုတဲ့တရုတ်နာမည်ကိုကျတော့နောက်ဆုံးကလျန်ကိုဖျက်ပြီး
ဖိန်လို့ရေးထားတယ်။တိန့်ရှောင်ဖိန်ဆိုတဲ့နောက် မှာရေးထားတာကြည့်ဦး။တရုတ်ခေါင်းဆောင်ကြီးတဲ့။ဟား....ဟား။ငါ့ ထက်စောင်းတဲ့ကောင်တွေနဲ့လာတွေ့နေတယ်။မင်းဆက်ဖတ်ကြည့်မင်းထင်။
ငါပြောတာကနည်းနေသေးတယ်။"

သန့်စင်အောင်စကားကြောင့်ပေါက်ကရရေးထားသောနာမည်များကို ဖတ်ကြည့်ရင်းပြုံးနေမိသည်။ဟုတ်တော့ဟုတ်သည်။ကြည့်ဦးလေ။ရေးလို့ရသမျှ
နာမည်များကိုအကုန်ပေါက်ကရလျှောက်ရေးထားသည်။

စမ်းစမ်းတိုး၊မျက်စိမှုန်သူတဲ့။ကြံကြံဖန်ဖန်တွေးလည်းတွေးတတ် တဲ့ကောင်တွေ။စမ်းစမ်းပြီးတိုးလို့မျက်စိမှုန်သူလို့ရေးထားတာလေ။သန့်စင်ဆိုတာ
ကျတော့ငါးရက်တစ်ခါတောင်ရေမချိုးတဲ့ကောင်တဲ့။အေးရင်ဖြူ ကိုပူရင်မည်းတဲ့။ငယ်ကျိုးငယ်နာတွေဖော်ထားတာလည်းပါသေးသည်။

တချို့မသိသောသူတွေကျတော့ဘာမျှရေးမထား။အရေးခံထားရသောသူများကတော့
ဘယ်လိုနေမည်မသိ။သူတို့ကတော့ဖတ်ရင်းပြုံးနေရသည်။

မွှေးမွှေးစံကိုပေါ်ဆန်းမွှေးတဲ့။တင်နုဆိုတာကျတော့ထိုင်ခုံမှာထိုင်လျှင် အနာဖြစ်မည်၊သတိထားဆိုတာမျိုး။ဟော-သူနှင့်ခုလေးတင်ခင်သော သန့်စင်အောင်ကျတော့သန့်စင်အောင်-ရေချိုးပါတဲ့။နာမည်နောက်က
ကပ်ရေးထားသောစာအတွေးကိုသူတို့သဘောကျနေကြသည်။သူတို့တင်
မဟုတ်။ဘေးလူတွေပါတော်တော်များများဖတ်ရင်းပြုံးနေကြ၏။

" လူတွေကိုမသိသေးလို့ပါကွာ။ဒါမှမဟုတ်ရင်မှတ်ထားပြီးစလို့ကောင်းပြီ"

သန့်စင်အောင်ကပျော်ပျော်နေတတ်ပုံရသည်။ခုကတည်းကစဖို့၊နောက်ဖို့ စဉ်းစားနေ၏။သန့်စင်အောင်စကားကိုနားထောင်ပြီးဆက်ဖတ်နေခိုက်
သန့်စင်အောင်နှင့်သိနေသောသူငယ်ချင်းတချို့ရောက်လာ၍သူတို့စကား လှည့်ပြောနေတာတွေ့သည်။ကိုယ့်ဘာသာဆက်ဖတ်ရင်းသန့်စင်အောင်တို့
စကားအပြတ်ကိုစောင့်နေလိုက်၏။

စိုးမမ၊အရိုးတပြပြနဲ့ကောင်မလေးတဲ့။ကျော်ဝင်းထွဋ်-ဇော်ဝင်းထွဋ်မဟုတ်ပါ။ပုံ-ဟဲဗီးဥက္ကဋ္ဌတဲ့။ခင်ဝါဦး-မြင်တာနဲ့ရူးချင်စိတ်ပေါက်သူတဲ့။ငြိမ်းချမ်း-လေးဖြူ မဟုတ်သော
ဖက်တီးတဲ့။

ကြည့်ရတာတော့တချို့တွေကလူတွေသိပြီးသားမို့နောက်ထားတာ လည်းဖြစ်နိုင်သည်။ဘောလ်ပင်မင်ရာချင်းမတူကြ။
အဲ-ခုမှသေသေချာချာကြည့်မိသည်။သူ့နာမည်ဘေးမှာလည်းနေရာလွတ်မရှိ။ရေးထားသေးသည်။

မင်းထင်၊မင်းထင်ချင်ထင်နိုင်တယ်။ဒီမီမိုးနဲ့ငါနဲ့ညားနေပြီဆိုတာကိုပါတဲ့။ ဘယ်သူရေးမှန်းမသိ။လူမသိလည်းနောက်တာပါပဲဟုတွေးရင်းရင်ထဲမှာစိတ်မဆိုးသည့်
အပြင်ခင်မင်ရင်းနှီးမှုဖြစ်လိုစိတ်၊လူငယ်သဘာဝချစ်ခင် စရာနောက်ပြောင်မှုကိုပျော်ရွှင်နှစ်ခြိုက်စိတ်တို့ဖြစ်လျက်ဝိုင်အိုင်တီကျောင်းသား
ဘ၀အစကိုပျော်ရွှင်ကြည်နူးမိသလိုဖြစ်လာသည်။

စာဖတ်ပြီးရှုပ်ပွနေသောသူ့နာမည်ဘေးမှစာများကိုမင်ဖျက်တံ ( Correction Pen )ထုတ်၍
ဖျက်လိုက်၏။စိတ်ထဲမှာတော့ဘယ်လိုခံစားမှုမျိုးမှ မရှိ။သူ့နာမည်ဘေးမှာရှင်းသွားလိုသောဆန္ဒတစ်ခုသာရှိသည်။Correction Penနှင့်ဖျက်ပြီးအဖုံးပိတ်၍လွယ်အိတ်ထဲပြန်ထည့်စဉ်သူ့ဘေးမှာ လာရပ်သောလူရိပ်တစ်ခုကိုမြင်၏။သန့်စင်အောင်ထင်ပြီးလှည့်ကြည့်မိခိုက်
သူ့ကိုစူးရဲသောမျက်လုံးအစုံနှင့်ကြည့်နေသောသူတို့အရွယ်မိန်းကလေး တစ်ယောက်ကိုမြင်သည်။ရုတ်တရက်တော့အထိတ်တလန့်ဖြစ်ပြီးနာမည်
စာရင်းကပ်ထားသည့်ဘုတ်ကြီးရှိရာပြန်လှည့်လိုက်၏။

" ဒီမှာ-ဒီစာကဘယ်သူရေးထားတာလဲ"

မထင်မှတ်သောအမေးစကား။လှည့်ကြည့်ပြီးကျွန်တော့်ကိုမေးတာလား ဟုပြောလိုက်၏။

"ဟုတ်တယ်။ယူ့ကိုမေးနေတာ။ယူပဲဒီနားမှာတစ်ယောက်တည်းရှိနေတာကြာလှပြီ။ဒီစာကို ဘယ်သူရေးတာလဲ။ယူရေးတာမဟုတ်လား။"

နားမလည်နိုင်စွာဖြင့်သူမလက်ထောက်ပြရာကိုကြည့်လိုက်သည်။

" နှင်းနွယ်နွေး၊နငယ်သုံးလုံး၊နေနှင့်ဦး၊အတန်းထဲမှာလုံးလုံးတွေ့မယ်"တဲ့။

ခက်ပြီ။ရေးသွားသည့်သူကလည်းမဟာက၀ိကဗျာပညာရှိကြီးဖြစ်လိမ့်မည် ။နောက်တာတောင် ကာရန်ပါသောကဗျာအချိုးလေးနှင့်။အဲဒါကအရေးမကြီး။လောလောဆယ်အရေးကြီးတာ
သူ့ကိစ္စ။

"ဘယ်သိမလဲ။ကျွန်တော်ကခင်ဗျားနာမည်သိတာမှမဟုတ်တာ။ဒီဘုတ်ပေါ်မှာလူတကာရေးနေတာပဲ"

"မဖြစ်နိုင်ဘူး။ယူ့ကိုဟိုးအဝေးကြီးကတည်းကလှမ်းမြင်နေရတယ်။ယူ တစ်ယောက်တည်းဒီမှာဖတ်နေတာ။ပြီးတော့ယူခုနဘုတ်ပေါ်မှာတစ်ခုခုရေးလိုက်တယ်
မဟုတ်လား"

ပြဿာနာတော့စပြီ။သူတစ်ယောက်တည်းသည်နာမည်စာရင်းတွေဖတ်မိနေခြင်း
ကပြဿ နာဖြစ်လာပြီ။ဘယ်အချိန်ကတည်းကသူကလည်းတစ်ယောက်တည်း ဖတ်မိနေသည်မသိ။သူ့ကိုရန်တွေ့နေသောသူမကလည်းဘယ်အချိန်ကတည်းက
လှမ်းမြင်နေ သည်မသိ။

Correction Penနှင့်ဖျက်လိုက်ခြင်းကိုပင်တစ်ခုခုရေးလိုက်သည်ဟု သူမထင်နေပြီ။သေသေချာချာကြည့်လိုက်တော့မှသူမနာမည်ကသူ့နာမည် အပေါ်နားမှာ။သူ့ခုံနံပါတ်နှင့်မနီးမဝေးမှာရှိနေသည်။သည်တော့ပိုပြီး ထင်စရာလည်းဖြစ်သွားလိမ့်မည်။သူမနာမည်ရှိသောစာရွက်ပေါ်မှာသူက လက်ထောက်ပြီးမင်များကိုဖျက်လိုက်ခြင်းကအဝေးမှာနေသောသူမအတွက်
နာမည်ကိုနောက်သည်ဟုထင်စရာဖြစ်သွားလိမ့်မည်။သည်လိုပဲ
တွေးမိ၏။

"ကျွန်တော်မရေးမိပါဘူး။ခင်ဗျားထင်လို့ပါ။ကျွန်တော်လည်းနာမည်မှာအရေးခံထားရလို့
ဖျက်နေတာပါ။"

နားလည်အောင်ရှင်းပြနေသော်လည်းသူမလက်မခံချင်။သူ့ကိုမကြည် လင်သောအကြည့်နှင့်ကြည့်နေတာတွေ့သည်။

" ဘာဖြစ်နေတာလဲနွေး"

ဗုဒ္ဓေါ။လူတောင်လန့်သွားသည့်ခေါ်သံ။လှည့်ကြည့်မိတော့ခပ်၀၀ကောင် မလေးတစ်ယောက်နှင့်ခပ်ပိန်ပိန်ကောင်မလေးတစ်ယောက်ကိုတွေ့သည်။
သူစိတ်ညစ်လာ၏။ခုနတုန်းကအပျော်လေးတွေဘယ်ရောက်ကုန်ပြီ
မသိတော့။သောကပဲဟုတွေးသည်။

" ဒီမှာဟယ်။နွေးနာမည်မှာပေါက်ကရတွေရေးထားတယ်။ကြည့်ဦး"

" ဖယ်စမ်း။ဝါဦးဖတ်မယ် "

ပြောပြောဆိုဆိုဝတုတ်မကရှေ့တိုးပြီးပါးစပ်လှုပ်ရုံလှုပ်၍ဖတ်နေသည်။
ပြီးတော့လက်ညှိုးတထောက်ထောက်နှင့်ရှာနေတာလည်းတွေ့၏။

"ဟယ်-သေနာတွေ။ငါ့ကိုရေးထားတာကျတော့ကြည့်ဦး။ခင်ဝါဦး-မြင်တာနဲ့ရူးချင်
စိတ်ပေါက်သူတဲ့။အယ်-စိုးမမနင့်ကိုလည်းရေးထားတယ်။စိုးမမ-အရိုး
တပြပြနဲ့ကောင်မလေးတဲ့"

ဝတုတ်မစကားကြောင့်တစ်ဖက်ကိုလှည့်၍သူရယ်နေမိတော့သည်။
သူမတို့သုံးယောက်ကတော့ဒေါနှင့်မောနှင့်ထိုစာများကိုပြူးပြဲဖတ်နေ၏။

" ဒါဘယ်သူ့လက်ချက်လဲ။နင်ရေးတာလား"

"ဟုတ်မှာပေါ့။ပုံကိုက။အဲဒါကြောင့်အိမ်ကမှာလိုက်တာ။ဝိုင်အိုင်တီ ကကောင်တွေကငပြောင်တွေ။ပေါင်းရင်ကြည့်ပေါင်းတဲ့။"

လာပြီ။မြားဦးကသည်ကောင့်ဆီပဲလှည့်လာပြီ။လွယ်တော့မလွယ်။စိုးမမ ဆိုသောပိန်ပိန်ကောင်မလေးစကားကိုဘယ်လိုတုံ့ပြန်ရမည်လဲမသိ။ တစ်ယောက်တည်းနှင့်ရမည်မထင်တော့။သန့်စင်အောင်ကို
အကူအညီလှမ်းတောင်းမည်စိတ်ကူးပြီးကြည့်စဉ်သန့်စင်အောင်က သူ့သူငယ်ချင်းတွေကိုစကားဖြတ်ပြီးသူ့ဆီလှမ်းလာနေတာတွေ့၍ မခေါ်တော့ဘဲစောင့်နေလိုက်၏။

" ဘာဖြစ်နေတာလဲ မင်းထင်"

အနားကိုရောက်ရောက်ချင်းသူ့ကိုမေးတော့သူကသူမတို့သုံးယောက်ကိုမေးဆတ်ပြ
လိုက်၏။ဝတုတ်မတို့မျက်လုံးများကသန့်စင်အောင်မျက်နှာဆီသို့စူးရှစွာကျရောက်
သွားသည်။ဘာဝင်ရှုပ်တာလဲဆိုသည့်အမေးပုံစံနှင့်။

"ဒီမှာကွာ။မင်းကိုစောင့်ရင်းငါ့ဘာသာနာမည်တွေဖတ်နေတာ။အဲဒါသူတို့
နာမည်တွေနောက်ကစာတွေကိုငါရေးထားပါတယ်တဲ့။လာပြီးစွပ်စွဲနေတယ်"

သူကသန့်စင်အောင်ကိုနားလည်အောင်ရှင်းပြနေမိ၏။ဘာမဟုတ် တာလေးနှင့်ပြဿ နာမဖြစ်ချင်။

"ခင်ဗျားတို့ကလည်းဗျာ။ခင်ဗျားတို့နာမည်ကိုသူကသိမလား။ပြီးတော့
သူရေးတာလည်းမဟုတ်ဘူး။"
 
" ဒါဖြင့်နင်ရေးတာလား "

စိုးမမဆိုသောပိန်ပိန်ကောင်မလေးကမေးသည်။သန့်စင်အောင်မျက်နှာတင်းခနဲဖြစ်သွား
တာတွေ့၏။

"ဘာလို့ငါကရေးရမှာလဲ။နေစမ်းပါဦး။နင်တို့ကဘာလို့အဲဒီလောက်နာနေတာလဲ။
ကိုယ့်ကျောင်းသားကျောင်းသူချင်းချစ်လို့ခင်လို့စတာပဲ"

"ဟ-စတာအဲဒီလိုစရလားဟ။ခုမှကျောင်းတက်ရုံရှိသေးတယ်။ဖတ်ကြည့်စမ်း။
ငါ့ကိုရေးထားတာ။ခင်ဝါဦး-မြင်တာနဲ့ရူးချင်စိတ်ပေါက်သူတဲ့။စိုးမမ-အရိုးတပြပြနဲ့ကောင်မလေးတဲ့။နှင်းနွယ်နွေးကျတော့နငယ်သုံးလုံး၊နေနှင့်ဦး၊
အတန်းထဲမှာလုံးလုံးတွေ့မယ်တဲ့။ဘယ်လောက်စိတ်ဆိုးစရာကောင်းလဲ။"

ဝတုတ်မကပြန်ပြီးရှင်းပြနေတော့သန့်စင်အောင်နားထောင်ရင်းသူ့ဘက်လှည့်ပြုံးသည်။

" ဘာရယ်တာလဲ။နင်က "

" ဪ-ဟုတ်တာတွေရေးထားတာပဲ။နာနေရသေးလားလို့ပါ"

" ဘာ "

သူရော၊သန့်စင်အောင်ပါလန့်သွားသည်။အော်လိုက်တာကသုံးယောက်အသံ။
စလိုက်တာကသန့်စင်အောင်။

"ကဲ-ကဲ။တော်ပါပြီဗျာ။တောင်းပန်ပါတယ်။မော်ကွန်းထိန်းရုံးခန်းကလည်းဒီနားလေးမှာ။
တစ်ခုတော့ကျွန်တော်ပြောပါရစေ။ခင်ဗျားတို့ကိုကျွန်တော်တို့တစ်ခါမှမမြင်ဖူးတဲ့ဟာကို
သိလည်းမသိဘဲနဲ့ကျွန်တော်တို့အဲဒီလိုရေးမလား။စဉ်းစားကြည့်ပါ။ခုဟာက
ခင်ဗျားတို့ကိုသိတဲ့တစ်ယောက်ယောက်ရေးထားတာနေပါလိမ့်မယ်"

သူကကြားထဲကတောင်းပန်ရင်းဖျန်ဖြေစကားပြောတော့ခင်ဝါဦးဆိုသော
ဝတုတ်မတွေဝေသွားသည်။

" သွားမယ်။ဝါဦး။အလကား။ဘာမှအထင်ကြီးစရာမရှိဘူး။"

နှင်းနွယ်နွေးဆိုသောမိန်းကလေးဆီမှထွက်လာသောအသံ။နားစည်
အမြှေးပါးကိုမြည်တင်ရိုက်ခတ်၏။ရုတ်တရက်ဘာမျှပြန်မပြောမိခင်မှာပင်သူတို့ သုံးယောက်လှည့်ထွက်သွားကြတာတွေ့သည်။

"ဟူး၊ငါ့ကောင်ကြီးလည်းရောက်ရောက်ချင်းဆောက်နဲ့ထွင်းဆိုသလိုအကစ်ကို
ခံနေရတာ။အလူးအလဲပါလား။တော်သေးတာပေါ့။ငါရောက်လာလို့"

" အေးကွာ။ဘယ်လိုလဲမသိဘူး။မလွယ်ပါဘူး။"

သန့်စင်အောင်ကသူမတို့သုံးယောက်ကျောခိုင်းပြီးချိန်မှာပြောတော့
သူကပြန်ပြောလိုက်သည်။

"ထားလိုက်ပါကွာ။မလွယ်တာတွေထားပြီးလွယ်တာတွေရှင်းရအောင်။ လာ-ကျောင်းကိုတစ်ပတ်ပတ်မယ်။ပြီးရင်ကင်တင်းန်ထိုင်မယ်။ဒါပဲ။ဆယ့်နှစ်နာရီမှအတန်းကစမှာ"

သန့်စင်အောင်စကားအဆုံးအိုကေဟုဆိုကာနေရာကခွာသည်။
စူပုပ်ပုပ်မျက်နှာတစ်ခုကိုဖျတ်ခနဲမြင်နေမိသေး၏။

x x x x x

( ဆက်လက်ဖော်ပြပါမည် )

[ ဤစာမူသည်ကျွန်တော်ဆူးသစ်၏ မူပိုင်ဖြစ်ပါသည်။]

Wednesday, January 25, 2017

" အစဉ်ထာဝရ " ( ၄ )


အပိုင်း ( ၁ )

စက္ကူတစ်ရွက်
ဆုတ်ဖျက်ဖန်ဆင်း၊အပြစ်ကင်းမဲ့
ချစ်ခြင်းနဲ့အတူ၊ချစ်သူထံပါး
တစ်စင်းမြားလို၊သွား၍ထိုးစိုက်
ခင်မကြိုက်လျှင်၊ယူငင်လွှင့်ပစ်
ခင်နှစ်သက်သလို ပြုနိုင်သည်။

xxxxxxxxxxxxxxxxxxxxxxxxxxxxxxxxxxx

[ ၁ ]

အိမ်ကထွက်ပြီးကားစီးလာကတည်းကကားတွေကကျပ်သိပ်လွန်းသည်ဟုထင်၏။
န၀ဒေးလမ်းဆုံကိုရောက်မှကားပြောင်းစီးရန်ဆင်းလိုက်၍ အသက်ရှူ ချောင်တော့သည်။
လွယ်တော့မလွယ်။

ဟော-ကြည့်ဦး။နောက်ပြောင်းစီးရမည့်၄၄ဒိုင်နာကားတွေကလည်း အတွယ်တွေတိုးလို့တွဲလောင်းနှင့်။ဘယ်လိုစီးရမလဲစဉ်းစားရင်းငါက တက္ကသိုလ်ကျောင်းသားကွ။ကျောင်းသားတောင်ရိုးရိုးကျောင်းသားမဟုတ်ဘူး။
ဝိုင်အိုင်တီလို့ခေါ်တဲ့ရန်ကုန်စက်မှုတက္ကသိုလ်မှာပထမနှစ်စတက်ရ
မယ့်ကျောင်းသားပဲ၊ဒါပထမဆုံးနေ့။ဒီလောက်စိတ်မပျက်စမ်းပါနဲ့ဟုကိုယ့် ကိုယ်ကိုအားပေးရင်းလွယ်အိတ်ကိုစလွယ်သိုင်းလိုက်၏။
ထိုးရပ်လာသော၄၄လိုင်း၊ဒိုင်နာခပ်နိမ့်နိမ့်ကားလေး၏နောက်မြီးကိုအသာ တွယ်ရင်းသက်ပြင်းမောကိုချသည်။စိတ်ထဲမှာတော့အမေသာသိရင်မလွယ်ဟုတွေး၏။

အိမ်ကကားနဲ့မပို့နိုင်တဲ့နေ့မှာရတဲ့ကားစီး။တွယ်မစီးရဘူး။တွယ်စီးတာသိရင်အသေပဲဆိုသော
အမေ့စကားကိုကြားယောင်ရင်းပြုံးမိသေး၏။

ကိုယ့်အပြစ်နှင့်ကိုယ်ပဲဆိုရမည်ထင်သည်။ကျောင်းဖွင့်စနေ့မို့စာသင်ဖြစ်မည်မထင်၍
ရလာမည့်ဘော်ဒါသစ်များနှင့်ပေါင်းသင်းကြည့်မည်။အဆင်ပြေသောသူငယ်ချင်းများ
ရလျှင်ကျောင်းကိုလည်ပတ်လေ့လာမည်။လက်ဖက်ရည်ဆိုင်ထိုင်မည်။

သည်လိုအကြံနှင့်အိမ်ကကားကိုလိုက်ပို့ပြီးမစောင့်ခိုင်းခြင်းဖြစ်သည်။ငယ်စဉ်ကတည်းကစ၍
တက္ကသိုလ်မရောက်ခင်အထိမိဘအုပ်ထိန်းမှုမှမတရားကင်းကွာ၍နေခွင့်ဘယ်တော့မှမရခဲ့သော
သူ့ဘ၀။ခုတော့တက္ကသိုလ်ကျောင်း သားဖြစ်ပြီ။အဖေနှင့်အမေလည်းသူ့ကိုလွတ်လပ်ခွင့်ပေးတန် သလောက်ပေးပြီးခဲ့ပြီ။သည်လိုအချိန်မှာသူစိတ်ကူးယဉ်ခဲ့ရသော တက္ကသိုလ်ကျောင်းသားဘ၀၌အတတ်နိုင်ဆုံးပျော်ရွှင်လွတ်လပ်စွာနေမည်ဟု
စိတ်ပိုင်းဖြတ်ခဲ့၍သည်နေ့အိမ်ကကားကိုလိုက်မပို့ခိုင်းဘဲဘတ်စ်ကားကျပ် ကျပ်သိပ်သိပ်တွေကိုတမင်စီးခဲ့ခြင်းပင်။

ဆယ်တန်းအောင်စကဂုဏ်ထူးလေးခုနှင့်ဆေးတက္ကသိုလ်ရောက်ပြီဟုထင် မှတ်ခဲ့သောစိတ်၊အမှတ်စာရင်းထုတ်တော့ဂုဏ်ထူးမထွက်သည့်ဓာတုဗေဒက၆၁မှတ်နှင့်
အနိမ့်ဆုံးဖြစ်နေခဲ့၍ဆေးကျောင်းအမှတ်ကို၁၃မှတ်လိုပြီးပြုတ်ခဲ့ရသည့်အခါ
ဝမ်းနည်းကြေကွဲခြင်းပြန်ခံစားရသည့်စိတ်၊တစ်ချိန်လုံးမိဘအုပ် ထိန်းမှုအောက်မှာအရိပ်တကြည့်ကြည့်နှင့်နေခဲ့ရသောတစ်ဦးတည်းသောသားမို့
ဘယ်မသွားဘယ်မလာရဟုတားမြစ်ပိတ်ပင်ခြင်းခံခဲ့ရသည့် မွန်းကျပ်လှောင်ပိတ်နေသောစိတ်စသည့်ပင်ပန်းချိနဲ့နေသောစိတ်ကိုရန်ကုန်စက်မှု
တက္ကသိုလ်ဆိုသောကျောင်းတော်ကြီးမှာဆေးကြောခ၀ါချဖို့ကျောင်းမ
တက်ခင်ကတည်းကသူသံန္နိဋ္ဌာန်ချခဲ့သည်။

ထိုစိတ်ကူးနှင့်ပင်ခုလိုကျောင်းဖွင့်သည့်ရက်ကစ၍သူ့ဘ၀၏နွမ်းနယ်ကျဉ်း ကျပ်မှုများအဝေးသို့လွင့်စဉ်ကွယ်ပျောက်ပြီဟုကားကိုတွယ်စီးရင်းယုံကြည်နေခဲ့မိတော့သည်။

x x x x x

ကားပေါ်ကဆင်းတော့ဂိတ်ပေါက်ကိုလှမ်းကြည့်သည်။သူတို့ကျောင်း၏ အထင်ကရ၀င်ပေါက်တစ်ပေါက်ဖြစ်သော ' ပစ္စည်းမဲ့ဂိတ် ' ကိုတွေ့ရ၏။

'ပစ္စည်းမဲ့ဂိတ်'တဲ့။ဘယ်ယူကပေးခဲ့မှန်းမသိ။၁၉၇၀ခုနှစ်တက္ကသိုလ်ရွှေရတု ၀န်းကျင်ကာလကတည်းကရှိခဲ့တာတော့သေချာသည်။ဆရာနွမ်ဂျာ သိုင်းရေးသော'အိပ်မက်ထဲကတက္ကသိုလ်'ဆိုသည့်စာအုပ်မှာတွေ့ခဲ့ဖူးသည်ကိုအမှတ်ရ၏။

'ပစ္စည်းမဲ့ဂိတ်'ကျဉ်းကျဉ်းလေးကိုဖြတ်သန်းရင်းကျောင်းထဲကိုခြေချမိစဉ်မှာပင်စိတ်ထဲမှာ
စတင်လှုပ်ရှားလာချေပြီ။ပတ်ဝန်းကျင်ကိုဟိုဟိုသည်သည်ငေးလျှင်လည်းရင်ထဲက
တည်ငြိမ်မှုမရှိ ။ကျောင်းဖွင့်စနေ့မို့ဖြစ်ပေါ်လာသောကျောင်းသားသစ်တစ်ဦး၏ ရင်ခုန်နှုန်းကအံ့ဩစရာကောင်းသည်။စိတ်ကိုတည်ငြိမ်အောင်ထိန်းရင်းကျောင်း၏
ပင်မဆောင်အောက်ဘက်ရှိကျောင်းသူကျောင်းသားများစုဝေးရာကိုတရွေ့ရွေ့
လှမ်းသည်။

ဝေါခနဲရယ်လိုက်သောရယ်မောသံတချို့၊ဆူဆူညံညံအော်ဟစ်ပြောဆိုမှုများ၊နာမည်ရင်း မခေါ်ဘဲနာမည်ပျက်များကိုခေါ်ရင်းနောက်ပြောင်နေသူများ၏ဆူညံသံများ၊နားစည်ကို လာရောက်ရိုက်ခတ်စဉ်ခုနတုန်းကဖြစ်ပေါ်နေသောစိုးရွံ့စိတ်၊တုန်လှုပ်စိတ်တို့မရှိတော့သလိုခံစားရ၏။

ဒါငါ့ကျောင်းပဲ။ငါတက်ရမယ့်ကျောင်းပဲ။သူတို့လည်းငါ့သူငယ်ချင်းတွေ၊ ငါ့နောင်တော်အစ်မတော်တွေပဲဟုတွေးရင်းအားတက်ပျော်ရွှင်စိတ်လေးဝင်လာသည်။
ဘာလုပ်လုပ်စိတ်မချတတ်သောအမေကသူတို့ရပ်ကွက်နှင့်ကပ်လျက်ရှိသောတခြားရပ်ကွက်မှ
သူ့အသိတစ်ယောက်၏သားစတုတ္ထနှစ်ဝိုင်အိုင်တီကျောင်းသားကိုခေါ်၍သူနှင့်အတူကျောင်းသွား
အပ်စေခဲ့၏။ကျောင်းမဖွင့်မီ တစ်ပတ်လောက်အတွင်းမှာကျောင်းအပ်လက်ခံပြီမို့ကျောင်းကိုတစ်ခါမှ မရောက်ဖူးသောသူ့အဖို့ထိုအစ်ကိုကြီးအကူအညီကြောင့်ကျောင်းအပ်ရာ၌အခက်အခဲမရှိအဆင်ပြေခဲ့၏။

ခုတော့ကျောင်းအပ်စရာလည်းမလို၍ဘာလုပ်ရမှန်းမသိ။သူများတွေ ကြည့်တော့လည်းကျောင်းမအပ်ရသေး၍ပုံစံဝယ်နေသူ၊ပုံစံဖြည့်နေသူ၊ဓါတ်ပုံကပ်နေသူ၊ငွေစာရင်းဋ္ဌာန
မှာငွေသွားသွင်းဖို့ပြင်ဆင်နေသူ၊ကျောင်းသား ကတ်ထုတ်နေသူ၊ ဘာမှမဟုတ်ဘဲရပ်စကားပြောနေသူစသည်ဖြင့်တွေ့နေရ၏။

ဟိုငေးသည်ငေးလုပ်ရင်းကျောင်း၏ပင်မတိုင်လုံးကြီးကိုသွားမှီ၍ငေးမိငေးရာငေးနေလိုက်ပြန်သည်။ သူ့လိုကျောင်းသားသစ်များယောင်လည် လည်ဖြစ်နေတာကြည့်ရင်းစိတ်ထဲကငါလည်းကျောင်းသာစော
မအပ်ထားရင်ခုလောက်ဆိုရွာလည်နေလောက်ပြီဟုတွေး၏။

ဝိုင်အိုင်တီရယ်။ငါကဆေးကိုအမှတ်မမီလို့ဒီကိုရောက်လာတာပါ။ငါ့ဘ၀မှာ လွတ်လပ်တဲ့ပျော်စရာတွေမင်းဆီကရနိုင်ပါ့မလားဟုစိတ်ထဲကရေရွတ်ရင်း အကြည့်ကတစ်နေရာရှိလူများစုအုံနေရာသို့ရောက်သွား၏။

သူလိုကျောင်းသားသစ်တွေချည်းပဲဟုထင်၍အနားကိုသွားကြည့်ဖို့ဆုံးဖြတ် ရင်းခြေလှမ်းကိုရွှေ့သည်။သေသေချာချာကြည့်မိတော့မှအချိန်စာရင်းကူးနေပါလားဟုအသိဝင်သည်။

' ပထမနှစ်စာသင်ချိန် ဇယား ' တဲ့။

လွယ်အိတ်ထဲကဘောလ်ပင်နှင့်စာအုပ်ကိုထုတ်ပြီးသူများတွေကူးသလိုလိုက်ကူးနေမိ၏။

" ဒီကသူငယ်ချင်းတို့ဘာကူးနေတာလဲဟင်"

အချိန်စာရင်းကိုစကူးစဉ်မှာပင်နောက်ကခေါ်သံကြောင့်လှည့်ကြည့်လိုက်၏။သူ့လိုခေတ်ဆန်ဆန်
ဝတ်ဆင်တတ်သောရွယ်တူလူငယ်တစ်ယောက်ကိုတွေ့သည်။

" ဒီမှာပထမနှစ်စာသင်ချိန်တွေကပ်ထားတယ်လေ။အဲဒါကူးနေတာ "

"ဟာ၊အဲဒါဆိုသူငယ်ချင်းကူးပြီးကိုယ်ကူးချင်တယ်။ရမလား။ခုလူများနေတော့လှမ်းကြည့်ရင်
လည်းမြင်မှာမဟုတ်ဘူး"

" ရပါတယ်။ကျွန်တော်ခဏကူးလိုက်ဦးမယ်။ခဏစောင့် "

သူ့စကားအဆုံးပြုံစိစိဖြစ်သွား၍သူပြောတာဘာမှားသွားပါလိမ့်ဟုတွေးသည်။

" သူငယ်ချင်းလည်းဖတ်စ်ရီးယား။ကိုယ်လည်းဖတ်စ်ရီးယား။ ကျွန်တော်တွေဘာတွေလုပ်မနေစမ်းပါနဲ့။ချစမ်းပါ။မင်းတို့၊ငါတို့"

တီရှပ်အကျီင်္အနက်ပေါ်မှအရိုးခေါင်းပုံကိုငေးရင်းခေါင်းညိတ်ပြလိုက်၏။အင်္ကျီကိုဘောင်းဘီပေါ်
ဆွဲဆန့်နေသောပုံကတကယ့်ပေါ့ပါးသွက်လက်သော လူငယ်တစ်ယောက်၏ပုံစံ။ကြည့်ဦး။လွယ်အိတ်ကရိုးရိုးကချင်လွယ် အိတ်ဖြစ်သော်လည်းကြိုးကသေးသေး၊အထုံးတစ်ထုံးကို လည်းသေးသေးလေးဖြစ်အောင်ထုံးထားလိုက်သေးသည်။

သူကဒါမျိုးကိုသဘောကျသည်။အမေကအမြင်မတော်ဘူးထင်၍ငယ်စဉ် ကတည်းကဆိုဆုံးမခဲ့၍သာဘောင်းဘီဝတ်တတ်ခဲ့သော်လည်းသူများ လိုဟော့ဟော့ရမ်းရမ်းမ၀တ်တတ်ခဲ့။ရိုးရိုးရှပ်အကျီင်္၊ဘက်ဂီ
ဘောင်းဘီပွပွ၊စတိုင်လ်ဘောင်းဘီတို့ကိုသာဝတ်တတ်ခဲ့သည်။အဲ-သူ့ရှေ့ကပုဂ္ဂိုလ်လိုကြောင်ကြောင်ကျားကျားတီရှပ်များကိုတော့အမေကခွင့် မပြု။သည်တော့သူ့မှာတီရှပ်သိပ်မရှိ။ရှိသည့်တီရှပ်များကလည်းအများ အားဖြင့်ပုံရိုးရိုး၊စတစ်ကာရိုးရိုးအင်္ကျီများနှင့်ဒယ်လ်ကိုတို့လိုအရောင်
နှင့်ပြောင်အဆင်များသာဖြစ်နေသည်။

ဘာပဲဖြစ်ဖြစ်သူ မ၀တ်ရသော်လည်းတခြားသူတွေအဲဒီလိုဝတ်လျှင် သဘောကျသည်။လူငယ်ဘ၀မှာဝတ်ချင်တာဝတ်၊စားချင်တာစား၊မှန်တာသာလုပ်။
တစ်ခုတော့ရှိသည်။ဘယ်သူ့မှမထိခိုက်စေနှင့်။ဒါသူ့ခံယူချက်။ခုသူ့ရှေ့ကပုဂ္ဂိုလ်ကသည်လို အစားထဲကဖြစ်မည်။မဆိုးဘူး။ခင်ဖို့တော့ကောင်းသည်ဟုတွေး၏။

အချိ်န်စာရင်းဆက်ကူးပြီးပေးလိုက်တော့သူ့ကိုသေသေချာချာကြည့်၏။ ပြီးမှ........

" သူငယ်ချင်းကဘယ်Sectionကလဲ "

ဟုမေးသည်။

" Section B ကလေ။သူငယ်ချင်းကရော "

ဘောလ်ပင်ကိုလွယ်အိတ်ထဲထည့်ပြီးမေးတော့ပြုံးနေသည်။ပြီးတော့လက်ထဲမှာရှိသော
သူ့အချိန်စာရင်းကူးထားသည့်စာအုပ်ကိုဘယ်လက်မှာကိုင်၍ညာလက်ကိုရှေ့ဆန့်ပေးသည်။

" ကိုယ်လည်း B ပဲ။အိုကေပဲကွာ။တစ်ခန်းတည်းသူငယ်ချင်းတွေပဲ။ ကိုယ့်နာမည်ကသန့်စင်အောင်လို့ခေါ်တယ်။သူငယ်ချင်းနာမည်ရော။ "

"ကိုယ့်နာမည်မင်းထင်ပါ။ဒါနဲ့သန့်စင်အောင်ကနယ်ကလား။ရန်ကုန် ကလား "

လက်ဆွဲနှုတ်ဆက်ပြီးပြန်မေးလိုက်၏။

" ကိုယ်ကတိုက်ကြီးကပါ။ခုဇီဝကဆောင်မှာနေတယ်။ခဏလေးနော်။ အချိန်စာရင်းကူးလိုက်ဦးမယ်။မင်းထင်ကအကုန်ကူးထားတော့ပိုကောင်းသွားတယ်။"

အချိန်စာရင်းတွေကိုကြည့်ပြီးပြောတော့သူခေါင်းညိတ်လိုက်သည်။ပထမနှစ်စာသင်သား
ခုနစ်ရာ့ ငါးဆယ်ကျော်နှင့်မန္တလေးစက်မှုတက္ကသိုလ်ပြောင်းများရှိ၍အတန်းလေးခုခွဲသင်ကြရာ
ထိုတန်းခွဲလေးခု၏အချိန်ဇယားကိုသူကအကုန်ကူးထားလိုက်ခြင်းဖြစ်သည်။ဘာရယ်တော့မဟုတ်။
ကူးထားတာကောင်းမည်ထင်ပြီးအကုန်ကူးထားခြင်းပင်။

" ကိုယ့်အခန်းကမကောင်းတော့သူများအခန်းသွားတက်လို့ရတယ်လေ။ ဒါနဲ့အခုငါတို့အချိန်က
Practical အချိန်ကြီးပဲ။အေးအေးဆေးဆေးနားလို့ ရတယ်။ မင်းနဲ့ငါပြီးရင်လျှောက်ကြည့် ရအောင် "

သူထင်သည့်အတိုင်းပင်။ဒါကြောင့်သူကမဆိုးပါဟုတွေးခဲ့ခြင်းဖြစ်သည်။ ခုနလေးတင်ခင်သည်။အခုမင်းတွေ၊ငါတွေဖြစ်ကုန်ပြီလေ။

" ကောင်းသားပဲ။ငါလည်းဘာလုပ်ရမှန်းမသိဖြစ်နေတာ။ဒီကျောင်းကို တစ်ကောင်တည်းဝင်လာတာ။"

" ဟားဟား။ငါ့လိုပဲဘာမှမပူနဲ့။ခုကစပြီးမင်းနဲ့ငါနဲ့ဘော်ဒါတွေဖြစ်သွားပြီ "

သဘောကျနှစ်ခြိုက်စွာရယ်ပြီးအချိန်စာရင်းဆက်ကူးနေတော့သူစောင့် ရင်းပြုံးနေမိတော့သည်။

x x x x x

( ဆက်လက်ဖော်ပြပါမည်။)

[ ဤစာမူသည်ကျွန်တော်ဆူးသစ်၏ မူပိုင်ဖြစ်ပါသည်။]

Tuesday, January 24, 2017

" အစဉ်ထာဝရ " ( ၃ )

တိုင်လုံးကြီးများအောက်အရောက်မှာလက်မှနာရီကိုငုံ့ကြည့်တော့ချိန်းထား သည့်အချိန်ရောက်ဖို့လိုသေး၏။သူကသာစောထွက်လာခဲ့ခြင်းဖြစ်သည်။ ခုလည်းအမှန်ကကျောင်းကိုလွမ်းလို့၊ကျောင်းနှင့်ပတ်သက်သမျှ
ပြန်ပြီးတမ်းတချင်လို့တမင်စောထွက်လာခဲ့ခြင်းပင်။

အတွေးနှင့်ကြောငြာဘုတ်များရှိရာသွားကြည့်ပြီးမော်ကွန်းထိန်းရုံးခန်းကို
လှမ်းကြည့်လိုက်မိသည်။သူမသိသောဝန်ထမ်းအချို့ဝင်လိုက်ထွက်လိုက်နှင့်
အလုပ်ရှုပ်နေတာတွေ့၏။

' ဩဘာလမ်း '

အကြည့်ကရုတ်တရက်ဩဘာလမ်းကိုရောက်သွား၏။စာစစ်ချိန်မို့ကျောင်း
အတွင်းပိုင်းကိုတာဝန်ရှိသူများမှအပမ၀င်ရအောင်ကျောင်းပင်မဆောင်၏ အတွင်းသံတံခါးမကြီးများကိုပိတ်ကာလုံခြုံရေးဝန်ထမ်းများနှင့်
သေသေချာချာထားထားသည်မို့ဩဘာလမ်းကိုလှမ်းကြည့်ရတာအားမရချင်။
ပုဏ္ဍရိက်တန်းညီညီတွေကတော့ဟိုအရင်ကနှယ်ဘာမျှမပြောင်းလဲ။မြက်ခင်း
စိမ်းစိမ်းတွေရောပြောင်းလဲနေပြီလား။သူမသိနိုင်။

" ............. "

ဩဘာလမ်းထိပ်မှာထောင်ထားသောဆိုင်းဘုတ်သေးသေးမှစာများကို
အတွေးနှင့်ရွတ်ရင်းဟိုစဉ်ကအကျွမ်းတ၀င်ဖြစ်ခဲ့သောဩဘာလမ်းမှပုံရိပ်တို့
သူ့ဆီကိုပူးကပ်ခိုတွယ်လာချေပြီ။

ရပ်နေရာမှခြေလှမ်းကိုရွှေ့ရင်း' ရောမတိုင်လုံးကြီးများ'ဟုနောင်တော်ကြီးများခေါ်
ခဲ့သည့်တိုင်လုံးကြီးများအောက်ခြေရှိလှေကားထိပ်မှာသွားထိုင်လိုက်သည်။
ပြီးတော့ဟိုးဝေးဝေးကစာအုပ်ဆိုင်ဆီဘာရယ်မဟုတ်ငေးနေမိ၏။

ဝင်ထွက်နေသောကားတချို့၊ပျံသန်းနေသောငှက်တချို့၊ဘတ်စ်ကားမှတ်
တိုင်နှင့်အနီးဆုံး ' ပစ္စည်းမဲ့ဂိတ် ' မှဝင်ထွက်နေသောလူတွေ။
တစ်ချိန်တုန်းကလည်းသည်ပုံရိပ်တွေပဲ။ ခုလည်းသည်ပုံရိပ်တွေပဲလေ။
အတွေးမှာလွန်ခဲ့သောကိုးဆယ်ခုနှစ်စွန်းကာလများဆီသို့ပြန်လည်
တမ်းတနေမိပြန်သည်။

x x x x x

ရာသီတွေလည်းတရွေ့ရွေ့ကျော်လွန်ခဲ့ပါပြီ နွေး။
သစ်ပင်၊သစ်ရွက်၊ပန်းပွင့်၊ပန်းခက်တွေလည်းဝေလိုက်၊ကြွေလိုက်နဲ့
အချိန်တွေကိုတရွေ့ရွေ့ဖြတ်သန်းခဲ့ကြပြီလေ။

ဘယ်အရာမှမတည်မြဲတဲ့ဟောဒီလောကကြီးထဲမှာလူတွေလည်းဝေလိုက် ၊ကြွေလိုက်နဲ့သစ်ရွက်တွေလိုပြောင်းလဲခဲ့တာပါပဲ နွေး။

တကယ်တော့အချိန်ဆိုတာအရာရာကိုပြောင်းလဲမှုတွေဖန်ဆင်းပေးနိုင်တဲ့ တန်ခိုးရှင်ပဲလို့ကိုယ်ထင်ပါတယ်။

ဒါပေမဲ့နွေးရေ......။အဲဒီအချိန်ဆိုတာကမပြောင်းလဲနိုင်တဲ့အရာတွေလောကမှာ
ရှိနေသေးတယ်လေ။

အဲဒါတွေကဘာတွေလဲဆိုတော့ကိုယ်တို့ရင်ထဲမှာအမြဲတမ်းရှိနေမယ့်ကိုယ် တို့ရဲ့တက္ကသိုလ်ဆိုတဲ့ပညာရှာမှီးရာ၊ပျော်ရွှင်မက်မောဖွယ်ကျာင်းတော်ကြီး ရယ်၊ကိုယ်တို့သူငယ်ချင်းတွေရဲ့ဘယ်တော့မှမကုန်ဆုံး
နိုင်မယ့်ခင်မင်မှုတွေရယ်၊ကိုယ်တို့ရင်ထဲကခံစားမှုတွေရယ်ပေါ့။

အချိန်တွေဘယ်လိုပြောင်းပြောင်း၊ရာသီတွေဘယ်လိုပြောင်းပြောင်း၊
အချိန်ကာလနဲ့အတူရွေ့လျားလို့မပါသွားခဲ့တာအဲဒါတွေပါဆိုရင်ကိုယ်နဲ့
အမြဲဆန့်ကျင်ဘက်လိုနေတတ်တဲ့နွေးကငြင်းဦးမလားမသိပါဘူး။

နွေး ငြင်းလို့မရနိုင်ပါဘူး။ရန်ကုန်စက်မှုတက္ကသိုလ်ဆိုတဲ့ကျောင်းကြီး ကိုမြင်တွေ့ရတာနဲ့နွေးကိုကိုယ်ပြောတာတွေယုံကြည်လက်ခံလာမှာပါ။
ကိုယ်ခံစားရသလိုနွေးပဲဖြစ်ဖြစ်၊ဘယ်သူပဲဖြစ်ဖြစ်ကိုယ့်လိုပဲခံစားရမှာပါ။
ကိုယ့်လိုပဲယုံကြည်လက်ခံလို့ကိုယ့်လိုပဲတမ်းတမိကြဦးမှာပါပဲ။

ဟုတ်တယ်နွေးရေ။ကိုယ်တို့လောကကြီးထဲကပြောင်းလဲမှုတွေကြားမှာ မပြောင်းလဲဘဲအစဉ်ထာဝရတည်ရှိနေနိုင်တာဟောဒီရန်ကုန်စက်မှုတက္က သိုလ်ကြီးရယ်၊နှစ်စဉ်နှစ်တိုင်းကျောင်းကြီးကဖြတ်သန်းထွက်ခွာ ခဲ့တဲ့ကျောင်းတော်သူ၊ကျောင်းတော်သားတွေရဲ့အရယ်၊အပြုံး၊
အလွမ်းလေးတွေပဲမဟုတ်လား။

ခုတည်ရှိနေတဲ့တက္ကသိုလ်နဲ့ကျောင်းသူ၊ကျောင်းသားတွေရဲ့စရိုက်တွေဟာ၊
ကိုယ်တို့တွေရှိခဲ့စဉ်ကတက္ကသိုလ်နဲ့ကျောင်းသူ၊ကျောင်းသားတွေရဲ့ပုံရိပ်တွေနဲ့
ဘာများခြားနားဦးမှာလဲ။

ခုလည်းပျော်စရာတွေ၊လွမ်းစရာတွေရှိနေဦးမယ်လို့ယုံကြည်ထားတယ်လေ။
ဟိုးတုန်းကလည်းပျော်စရာလေးတွေ၊လွမ်းစရာလေးတွေရှိခဲ့ဖူးတာပဲမဟုတ်လား။
အဲဒီတုန်းကကိုယ်တို့ရဲ့တက္ကသိုလ်ကြီးထဲမှာကိုယ်တို့နှစ်ယောက်ရဲ့
ပုံရိပ်တွေလည်းပါဝင်ခဲ့တာနွေးတော့သတိရနေဦးမှာပဲလို့ကိုယ်ထင်မိတယ်လေ။

သတိရတယ်နွေးရယ်.............။

နွေးအပါအ၀င်ကိုယ်တို့နဲ့ကျင်လည်ခဲ့ရတဲ့ကိုယ့်ရဲ့ချစ်သူငယ်ချင်းတွေ၊နွေးရဲ့
ချစ်သူငယ်ချင်းတွေ၊ကိုယ်တို့ရဲ့ရယ်မောသံတွေကိုနှစ်ခြိုက်စွာခုံမင်တတ်ခဲ့တဲ့ဟောဒီ
ရန်ကုန်စက်မှုတက္ကသိုလ်ကြီးရယ်၊ဩဘာလမ်းရယ်၊စာသင်ခန်းတွေရယ်၊
ကိုယ့်သူငယ်ချင်းတွေနဲ့အဆောင်တွေရယ်၊အားလုံးရဲ့အရယ်၊အရွှတ်၊အနောက်
၊အလွမ်းလေးတွေရယ်၊ပြီးတော့ကိုယ်တို့ရန်ကုန်စက်မှုတက္ကသိုလ် ကြီးရဲ့စာသင်ခန်းထဲမှာဝဲပျံနေတဲ့ဘယ်တော့မှမမေ့နိုင်တော့တဲ့ စက္ကူ မြားလေးတွေရယ်ကိုကိုယ်ပြန်ပြီးသတိရနေမိပြီလေ။

ကျဉ်းကျပ်ရှုပ်ထွေးနေတဲ့အလုပ်ခွင်ဘ၀နဲ့နှိုင်းစာရင်ဘာမှမဆိုင်အောင်ပေါ့ပါး
လွတ်လပ်ခဲ့တဲ့ငယ်စဉ်ကျောင်းသားဘ၀ဟာကိုယ်တို့ပြန်မရနိုင်တော့တဲ့ဘ၀တစ်ခုလို့နွေးဆိုမလား။
ကိုယ့်အတွေးထဲမှာတော့အဲဒီကျောင်းသားဘ၀ကိုပြန်ပြီးရယူကြည့်မိပါပြီနွေး။

အစဉ်ထာဝရလှပနေမယ့်ကိုယ်တို့ရဲ့စိတ်ကူးလေးတွေထဲကလွမ်းစရာအဖြစ်အပျက်လေးတွေပါပဲနွေးရေ။
ကိုယ့်ရင်ထဲမှာတစ်ခါပြန်လို့ သက်ဝင်လာခဲ့ပြန်ပါပြီလေ။

x x x x x

( ဆက်လက်ဖော်ပြပါမည်။)

[ ဤစာမူသည်ကျွန်တော်ဆူးသစ်၏ မူပိုင်ဖြစ်ပါသည်။]

Saturday, January 21, 2017

" အစဉ်ထာဝရ " (၂ )

ဟိုးဝေးဝေးမှသစ်ရိပ်ကိုလှမ်းမြင်စဉ်ရင်သည်တုန်ခါချင်သလိုဖြစ်လာ၏။
တရိပ်ရိပ်ကျန်ခဲ့သောမြင်ကွင်းတို့ကိုဥပေက္ခာပြုရင်းကားအရှိန်ကိုလျှော့  သည်။ရှေ့မှာကျောင်းဝင်ပေါက်ကိုလှမ်းမြင်နေပြီပဲ။

" ဦးလူပေါပေါင်းမိုး "

လွန်ခဲ့သောနှစ်များစွာကခေါ်ခဲ့ကြသောနာမည်။နောင်ဘယ်အချိန်ဘယ်ကာလထိ
တည်ရှိနေဦးမည်ဆိုတာမသိ။အရာရာသည်ပြောင်းလဲခြင်း များနှင့်ပြည့်နှက်နေသည်။ခိုင်မာစွာရပ်တည်ခဲ့သောအမိုးခုံးခုံး
သည်ဟိုစဉ်ကနှယ်မပြောင်းလဲ၍တအံတဩဖြစ်ရသေးသည်။

" ရန်ကုန်နည်းပညာတက္ကသိုလ်
YANGON TECHNOLOGICAL UNIVERSITY "

ကျောင်းပြီးခါနီးပြောင်းခဲ့သောနာမည်စာလုံးအသစ်ဖြင့်တောက်ပ လွန်းနေသောဆိုင်းဘုတ်ကိုငေးကြည့်ရင်းခုံးဆင်းမှာလုပ်ထားသော
 Speed လျှော့သည့် Slow Down ( Bump )ကတ္တရာလမ်းခုံးခုံးကို သတိပြုမိသည်။ ကားကိုအရှိန်ပိုလျှော့ရင်းဖြည်းဖြည်းချင်းကျော်လိုက်၏။
သူတို့ကျောင်းပြီးခါနီးမှာလုပ်ခဲ့သောအရာများစွာထဲမှတစ်ခုဖြစ်သည်ကို
မှတ်မိနေသည်။ဤကဲ့သို့ Bump မျိုးနောက်တစ်ခုရှိသေးသည်။ ' ပစ္စည်းမဲ့ဂိတ် ' ဟုခေါ်ကြသောလူအများစုဝင်ရာအပေါက်နားမှာ။
ကျောင်းဆင်းကျောင်းတက်ကားများအရှိန်လျှော့မောင်းစေရန်လုပ်ခဲ့သော
အရာများဟုတွေးသည်။

အတွေးကိုခဏရပ်ရင်း ' ဦးလူပေါပေါင်းမိုး' ဖြူ ဖြူဘက်ကိုကားချိုးချ လိုက်၏။စေ့ထားသောသံတံခါးဘေးမှတာဝန်ကျဂိတ်စောင့်ကလှမ်းကြည့်ပြီး
သူ့ဆီလျှောက်လာတာတွေ့၏။ကားကိုစက်သတ်ပြီးစောင့်နေလိုက်သည်။

" ဘယ်ကိုသွားမလို့ပါလဲခင်ဗျာ "
"မန္တလေးနည်းပညာတက္ကသိုလ်ကရောက်နေတဲ့ဆရာတစ်ယောက်ဆီသွားချင်လို့ပါ"

ခေတ္တတွေဝေသွားသည်။သူ့မျက်နှာကိုအကဲခတ်ပြီးသံတံခါးကိုအသာတွန်း ဖွင့်ပေး၏။

" ဆရာကဆရာဦးကျော်ဝင်းထွဋ်ဧည့်သည်များလားမသိဘူး။ "

သူလာမှာဖုန်းဆက်ထား၍သူ့သူငယ်ချင်းကဂိတ်ကိုကြိုအကြောင်းကြား
ထားတာပဲဟုတွေးသည်။ဂိတ်ကိုအကြောင်းကြားမထားပါကသူ့ကားဝင်ဖို့
လွယ်ပါ့မလားမသိ။လူသာဝင်ခွင့်ရနိုင်သည်ထင်၏။

"ဟုတ်ပါတယ်။ကျွန်တော်သူနဲ့ချိန်းထားလို့ပါ။ကျွန်တော့်မှာကုမ္ပဏီ
ဝန်ထမ်းကတ်ပါပါတယ်။ယူထားလိုက်ပါ။"

ဂိတ်စောင့်ကသူ့ကတ်ကိုခဏဖတ်ကြည့်၍ခေါင်းညိတ်သည်။ပြီးတော့
ကတ်ကိုယူထားလိုက်သည်။

" ရပါပြီဆရာ။ ၀င်သွားပါ။ "

ဂိတ်စောင့်၏စကားအဆုံးဂီယာထိုး၍ကားကိုကျောင်းဝင်းကြီးထဲ
ထိုးဝင်လိုက်သည်။စိတ်ထဲမှာတော့မိခင်ရင်ခွင်ထဲပြန်ရောက်လာသလိုခံစားရ၏။

x x x x x

ချိန်းထားသည်ကကင်တင်းန်မှာမို့ကားကိုကင်တင်းန်ဘက်ချိုးမည်စိတ်ကူးပြီး
ဟိုးဝေးဝေးမှလှမ်းမြင်ရသောတိုင်လုံးကြီးများကိုတစ်ခါပြန်ကြည့်ချင်စိတ်ပေါ်၏။
ကားကိုဘယ်ဘက်သို့ချိုးပြီျးေယာက်ျာ်းလေးဆောင်များရှေ့မှလမ်း အတိုင်းကျောင်း၏အထင်ကရတိုင်လုံးကြီးများဆီကိုမောင်းသည်။

အေမှအက်ဖ်အထိရှိသောယောကျာ်းလေးဆောင်ခြောက်ဆောင်တွင် အက်ဖ်ဆောင်ကနောက်ဖက်ကျ၍အေမှအီးအထိငါးဆောင်ကရှေ့မျက်နှာစာမှာ
ရှိနေသည်။

ရန်ကုန်၊အင်းစိန်လမ်းမကြီးကိုမျက်နှာမူထားသောထိုအဆောင်များ၏ရှေ့တွင်
စိမ်းလဲ့သောမြက်ခင်းနှင့်ပုဏ္ဍရိက်တန်းညီညီများကတော့နဂိုအတိုင်းလှဆဲ၊
 ပဆဲ၊၀င့်ကြွားဆဲ၊ဂုဏ်ယူဆဲ။

ဟိုးဝေးဝေးမှာရှိနေသည့်အနီရောင်အလံတစ်ခုတလူလူလွင့်နေပြီး၊
 ' YANGON TECHNOLOGICAL UNIVERSITY' ဆိုသည့်စာသား ပါရှိသောကျောင်း၏ပင်မအဆောက်အအုံကြီး၏အရိပ်အာဝါသကို
ခိုလှုံကာသူတို့လည်းမော်ကြွားချင်တိုင်းမော်ကြွားနေလေပြီ။

ကားကိုရေပန်းကြီးရှိရာပန်းခြံအ၀ိုင်းနားကကပ်၍ဖြတ်ပြီးကားပတ်ကင်ရှိရာမှာသွားထိုးသည်။
မှန်တွေအလုံပိတ်ပြီးတံခါးသော့ခတ်၍ကားပတ်ကင်ကိုဝေ့ခနဲကြည့်မှ အခြားသောကားများလည်းအနည်းငယ်ရှိနေတာသတိထားဖြစ်သည်။ကျောင်းပိတ်
ရက်ဖြစ်သော်လည်းဆရာ၊ဆရာမတို့အမှတ်ခြစ်ဖို့ရောက်နေနိုင်တာသူသိသည်။
သူ့သူငယ်ချင်းကျော်ဝင်းထွဋ်တောင်အမှတ်ခြစ်ပြီးမကြာခင် ကမှပြန်ရောက်သည်ပဲဟုတွေးမိ၏။
အတွေးနှင့်ပင်ကျောင်း၏ပင်မ၀င်ပေါက်ရှိရာတိုင်လုံးကြီးများဆီခြေစ လှမ်းမိပြန်သည်။

x x x x x

[ ဆက်လက်ဖော်ပြပါမည်။]

[ ဤစာမူသည်ကျွန်တော်ဆူးသစ်၏ မူပိုင်ဖြစ်ပါသည်။]

Friday, January 20, 2017

" အစဉ်ထာဝရ " ( ၁ )

 ဘလော့ချစ်သူများခင်ဗျား.........

ကျွန်တော်ရေးထားခဲ့ဖူးတဲ့လုံးချင်းဝတ္ထုရှည်တစ်ပုဒ်ကိုချပြပါရစေ။ဒီလုံးချင်းဝတ္ထု နာမည်ကို " အစဉ်ထာဝရ " လို့အမည်ပေးထားပါတယ်။ခံစားကြည့်ပါခင်ဗျာ။

ဆူးသစ်
၂၃း၁၈ နာရီ ( စင်ကာပူစံတော်ချိန် )
၂၀.၀၁.၂၀၁၇

XXXXXXXXXXXXXXXXXXXXXXXXXXXXXXXXX

သံယောဇဉ် ရာသီဖွဲ့
နာရီလှည့် မှေးမှိန်အို။
ထိုခဏမှာပေါ့
အိုကြသူ လူတချို့ယွင်းလေလည်း
နှင်းနွေမိုးထဲ မားမားရပ်ပါလို့
အားပြတ်ကာ သူမလဲပေဘု
သာဆဲပါ ခမျာတွေ ရှုလေတော့
အစဉ်အမြဲသာကြော့  ရွက်နုလက်စို
( ဪ-ကျွန်တော်တို့ရဲ့.......)
ရင်ထဲမှာပေါ့ စက်မှုတက္ကသိုလ်။ ။
သားလတ်
[ ၁၉၉၄ခုနှစ်၊ မတ်လ၊ ရွှေသမင်မဂ္ဂဇင်းပါ သားလတ် ၏ ' အစဉ်ထာဝရ '
( အချစ်ဆုံးသို့အိတ်ဖွင့်ပေးစာ ) တွင်ပါဝင်သောကဗျာဖြစ်ပါသည်။ ]

XXXXXXXXXXXXXXXXXXXXXXXXXXXXXXXX

" နွေးဟာ ငါ့ရဲ့အစဉ်ထာဝရပါကွာ။
ငါဟာသူ့အတွက် ဖြစ်ချင်မှဖြစ်မယ်။
သူကတော့ငါ့ရဲ့ အစဉ်ထာဝရပါပဲ သူငယ်ချင်းရာ "
မင်းထင် ( သို့မဟုတ် ) ကင်း

XXXXXXXXXXXXXXXXXXXXXXXXXXXXXXXXXX

" လူတစ်ယောက်နဲ့တကယ့်ဘ၀ထဲကိုနှစ်ဦးတည်းဖြတ်သန်းရမယ့် အချိန်၊ဖြတ်သန်းနိုင်တဲ့အား၊ဘာတွေဖြစ်ဖြစ်၊ဘယ်ဘ၀ရောက်ရောက်၊
ငါကိုယ်တိုင်ကအနစ်နာခံနိုင်မယ့်လူ၊ သူကိုယ်တိုင်ကလည်းငါမှငါလိုဖြစ်ပြီး၊
 ငါကလည်း သူမှသူလို့ပြောရလောက်အောင် စွဲစွဲလမ်းလမ်း ဖြစ်ရတဲ့သူကို
ငါတွေ့သွားပြီ။ ငါသူနဲ့ဆိုအားလုံးကိုရင်ဆိုင်ရဲတယ်။ငါ့အနားမှာသူ
ရှိနေစေချင်တယ်။ခဏ မဟုတ်ဘူး။ အမြဲတမ်းအစဉ်ထာဝရ။
ငါကသူ့ကိုအားကိုးချင်တယ်။ ငါကိုယ်တိုင်လည်းသူနဲ့ဆိုရင်
ဘယ်ဘ၀မျိုးမှာမဆိုဖြတ်သန်းရဲတယ်။သူက ငါနဲ့ပတ်သက်ရင်
အနစ်နာခံနိုင်တယ်လို့ငါထင်တယ်။
ငါကလည်းသူ့လိုပဲခံစားရတယ်။အဲဒီမှာပဲအချစ်ဆိုတာ
ဘာလဲဆိုတဲ့အဓိပ္ပါယ်ရယ်၊ချစ်သူဆိုတာ
ဘယ်လိုလဲဆိုတာရယ်ကိုငါသိလိုက်ရတယ်လေ။ "
နှင်းနွယ်နွေး ( သို့မဟုတ် ) ကွင်း

XXXXXXXXXXXXXXXXXXXXXXXXXXXXXXXXXX

" စိတ်ချ။ နှင်းနွယ်နွေးဆိုတဲ့မိန်းကလေးတစ်ယောက်ရင်ထဲကို
ယူဘယ်တော့မှရောက်မလာစေရဘူး။ "
" အဲဒီလောက်အထိကိုယ့်ကိုနာကြည်းသလား"
" နာကြည်းရုံတင်မကဘူး။သတ်တောင်သတ်ပစ်ချင်တယ်။"
" ဟုတ်လား။ ကိုယ်ကတော့ နွေးအတွက်အသက်ဆက် ရှင်နေမှာသေချာတယ်။"

XXXXXXXXXXXXXXXXXXXXXXXXXXXXXXXXXX

( ကျွန်တော်ဆူးသစ်၏မူပိုင်ဖြစ်ပါသည်။ )

Sunday, January 8, 2017

" တန်ဖိုးရှိတဲ့ မက်ဆေ့ခ်ျ "


ခုတလောမှာ Facebook က Communication Rule အသစ်တစ်ခု ချတယ်ဆိုပြီးလက်ရှိသုံးနေတဲ့အသုံးပြုသူ၂၅ယောက်ကိုသူတို့ပေးထားတဲ့ မက်ဆေ့ခ်ျပို့ပေးရမယ်တဲ့။မဟုတ်ရင်မသုံးဘူးလို့ယူဆပြီးဖျက်တဲ့အထဲ ပါသွားမယ်ဆိုပြီးမက်ဆေ့ခ်ျတွေပို့နေကြတာကျွန်တော်လက်ခံရရှိနေပါတယ်။
Account တစ်သန်းကျော်ဖျက်မယ်လို့ဆိုပါတယ်။

ကျွန်တော် အဲဒီမက်ဆေ့ခ်ျမျိုးတွေဆိုယုံကိုမယုံတာပါ။ဒါနဲ့ဆက်ဖတ်လိုက်တော့ ပိုရှင်းသွားပါတယ်။ဒီနေ့ဇွန်လ၅ရက်တဲ့ဗျာ။ဖျက်မှာကမြန်မာစံတော်ချိန် ဇွန်လ၆ရက်၊နံနက်၉း၃၀နာရီတဲ့ဗျာ။ဒီနေ့လို့တောင်ပါသေး။

အဲဒါထက်ရှင်းတာတောင်အဲဒီလောက်မရှင်းဘူး။အခုဒီနေ့ဘာနေ့လဲ
ဆိုတော့ဇန်န၀ါရီလ၇ရက်နေ့။အဲဒီမက်ဆေ့ခ်ျအရင်ကတည်းကစခဲ့တယ်
ဆိုလည်းကျွန်တော်လုံးဝဘယ်သူ့ဆီကိုမှထပ်မဖြန့်ခဲ့ဘူး။ဟိုးတုန်းက တစ်ခါကြုံဖူးတယ်။အခုလည်းလာပို့တဲ့သူငယ်ချင်းတွေ၊ကျွန်တော်စာ သင်ပေးခဲ့တဲ့ကလေးတွေကိုဘာမှတော့ပြန်မပြောဖြစ်ဘူး။
သူတို့ကကိုယ့်ကိုအရေးတယူရှိတယ်ဆိုတာသိရတဲ့အတွက်ကျေနပ်ပါ တယ်။ပြီးခဲ့တဲ့နှစ်ကူးတုန်းကမက်ဆေ့ခ်ျတွေတော်တော်များများ
ရခဲ့တယ်။နှစ်ကူးဆုတောင်းလေးတွေပါ။အင်မတန်ဝမ်းသာကြည်နူးရပါတယ်။ ကျွန်တော့်မှာဒီလိုမိသားစုဝင်တွေ၊ဆွေမျိုးမိတ်ဆွေ၊သူငယ်ချင်းတွေ၊ ခင်မင်ရသူတွေ၊အနာဂတ်အတွက်ကျွန်တော်ယုံကြည်မျှော်လင့်ထားတဲ့
ကလေးတွေရှိနေပါလားလို့သိရလို့ပါ။သူတို့တစ်တွေကျွန်တော့်အပေါ်
အရေးတယူနဲ့နှစ်သစ်နှုတ်ခွန်းဆက်ဆုတောင်းပါလားလို့ကြည်နူးရတာပါ။
အဲဒီမက်ဆေ့ခ်ျတွေကိုတော့တန်ဖိုးရှိတဲ့မက်ဆေ့ခ်ျလို့မှတ်ယူမိတာပါ။

ခုလိုFacebook Account တစ်သန်းဖျက်မယ်ဆိုတော့လည်း သူတို့အသိပေးတာကျေနပ်ပေမယ့်သူတို့တစ်တွေအောက်ကစာကိုနေ့
စွဲသေသေချာချာမဖတ်ခဲ့မိဘူးလို့ဘဲတွေးလိုက်ပါတယ်။

ကျွန်တော်ပြတ်ပြတ်သားသားတွေးမိတာကတော့အဲဒီ Account
တစ်သန်းထဲကျွန်တော့်Account ပါသွားရင်တောင် သိပ်ဝမ်းနည်း စရာမရှိဘူးဆိုတာပါပဲ။ဘာဖြစ်လို့လဲဆိုတော့ကျွန်တော်တို့
အရင်ကနေခဲ့တာ Facebook မရှိတဲ့ကမ္ဘာပါ။အခုမှဒါကိုအရေးတယူလုပ်
 သုံးနေခဲ့ကြတာကိုး။

အဲဒါကိုခုတုံးလုပ်ပြီးဖုန်းကုမ္ပဏီတွေကလုပ်စားတာလားမသိတဲ့
 မက်ဆေ့ခ်ျများများပို့၊( ဘယ်ကပို့ပို့ပါ။ Facebook Messenger က
ပို့လည်းအင်တာနက်သုံးရတာပါပဲ )ဆိုတာမျိုးတွေက ဒီဘက်ခေတ်မှာ အင်မတန်မှစုတ်ချာလွန်းတဲ့အကွက်တွေလို့ပဲမြင်ပါတယ်။

တစ်ခုရှိတာက Facebook သုံးရင်စာသေသေချာချာဖတ်ရမယ် ဆိုတာကိုတော့မိတ်ဆွေများ၊သူငယ်ချင်းများ၊ကျွန်တော်ယုံကြည်တဲ့ လူငယ်များမမေ့သင့်ဖို့တော့သတိပေးပါရစေ။

အဖိုးတန်တဲ့မက်ဆေ့ခ်ျတွေတော့ကျွန်တော်မျှော်လင့်ပါတယ်။
အကျိုးမရှိတဲ့မက်ဆေ့ခ်ျတွေအတွက်တော့အချိန်ကုန်မခံကြပါနဲ့ခင်ဗျာ။ ။

ဆူးသစ်
၂၂း၁၄ နာရီ ( စင်ကာပူစံတော်ချိန် )
၀၇.၀၁.၂၀၁၇

Saturday, January 7, 2017

" သူ့ကို Credit ပေးတယ်ဆိုတာ ကိုယ့်ကိုလည်း Credit ပေးဖို့ပါ "


ကျွန်တော်Blog Posts တွေရေးနေဆဲကာလမှာ Facebook ပေါ်လာတော့ Blog မှာရေးတာရပ်သလိုဖြစ်သွားပါတယ်။ အဲဒီကာလမှာပဲကျွန်တော့်ကဗျာတစ်ပုဒ်ကို
Facebook User တစ်ဦးက ကဗျာဆရာကိုအမည်မသိလို့ပါဆိုပြီးသူ့အကောင့်မှာ
တင်ထားခဲ့ပါတယ်။ကျွန်တော့်အသိမိန်းကလေးတစ်ဦးကပြန်ရှယ်တော့မှ
ကျွန်တော်ကသိပြီးအဲဒီအကောင့်မှာကျွန်တော့်ကဗျာဖြစ်ကြောင်းနဲ့၊
အဖြူ ရောင်လမ်းကလေးဆိုတဲ့ ဘလော့မှာတင်ထားတာဖြစ်ကြောင်းပြောပြခဲ့ပါတယ်။
အဲဒီကဗျာက ပိန်းရွက်ပေါ်ကရေများ ဆိုတဲ့ကဗျာပါ။

ဒီကတည်းက Facebook မှာသုံးစွဲသူတချို့ဟာသူများစာကိုယူပြီး Copy and Paste လုပ်ကာမသိရင်သူတို့စာတွေလိုလုပ်တတ်ကြတယ် ဆိုတာ သိခဲ့ရပါတယ်။
ပြီးခဲ့တဲ့တစ်ရက်မှာကျွန်တော်နဲ့ခင်တဲ့၊ကျောင်းမှာဆိုလည်းမေဂျာတူစီနီယာ၊
ဘလော့ဂါဆိုရင်လည်းသူကစီိနီယာဖြစ်တဲ့အစ်ကိုတစ်ဦးရဲ့ကဗျာကို
အကောင့်နာမည်ဘာမှန်းမသိသူတစ်ဦးကစာသားတချို့ပြောင်းပြီး
ယူတင်ထားတယ်လို့သိရပါတယ်။ဒါပေမဲ့အဲဒီအစ်ကိုသွားပြောပြီး
သူတင်ထားတာကိုပြန်ရှယ်တဲ့အခါအဲဒီအကောင့်ပိုင်ရှင်က
မတောင်းပန်တဲ့အပြင်သူကတောင်အဲဒီအစ်ကိုအကောင့်ကို
ဖျက်မယ်လုပ်လို့ပြုံးရသေးတယ်။

ဒီနေရာမှာသီချင်းတွေကိုကော်ပီခွေအကူးခံရတဲ့ကိစ္စနဲ့ဒီနေ့Facebook မှာဖြစ်နေတာတွေတူနေတယ်လို့ပြောချင်ပါတယ်။သီချင်းခွေတွေကော်ပီ ကူးတော့မူရင်းခွေပိုင်ရှင်တွေကအသံထွက်လာတဲ့အခါ
လူငယ်တစ်ဦးတင်ထားတဲ့Status တစ်ခုကိုဖတ်ရပါတယ်။
ကော်ပီအကူးမခံချင်ရင်ခွေမထုတ်နဲ့ဆိုတဲ့သဘောမျိုးပါ။ကျွန်တော်တို့ဖတ်ပြီး စုတ်သပ်မိသလိုခုနောက်ပိုင်းဖြစ်နေတဲ့လူငယ်တချို့ရဲ့စိတ်ဓာတ်
နိမ့်ကျလာမှုကိုပါသတိထားမိပါတယ်။နိုင်ငံခြားသီချင်းကိုတော့ယူဆိုပြီး
သူတို့အခွေကျတော့ကော်ပီအကူးမခံချင်ဘူးဆိုတဲ့အပြောမျိုးလည်း
ကြားဖူးပါတယ်။တစ်ပိုင်းမှန်ပါတယ်။ကိုယ်ပိုင်သံစဉ်ရေးဆိုနိုင်ရင်
ပိုကောင်းနိုင်ပေမယ့်ကော်ပီဆိုသူတွေမှာလည်းသီချင်းကိုရေးရတာ
၊အစအဆုံးတီးရတာ၊စတဲ့အားထုတ်မှုတွေရှိပါတယ်။ဘယ်သူမှ
ကာရာအိုကေပြန်ဆိုပြီးခွေမထုတ်တဲ့အတွက်သူတို့မှာလည်းအရင်းအနှီးရှိပါတယ်။

ဒီတော့သီချင်းခွေထုတ်တဲ့သူကအပြစ်ဖြစ်ချင်နေပြီးကော်ပီခွေကူးသူ၊
အွန်လိုင်းတင်သူကအပြစ်မဟုတ်ဘူးလို့ယူဆနေကြတဲ့ခေတ်မှာ
သူများဖန်တီးထားတဲ့ ကိုယ်ပိုင်အနုပညာတွေကျတော့ရောတကယ်တန်ဖိုး
ထားသလားလို့မေးရင်လွယ်လွယ်ယူ၊လွယ်လွယ်ပြန်တင်နေကြ
တာကိုတော်တော်များများတွေ့နေရတာပါပဲ။

Facebook ပေါ်တင်တာပိုက်ဆံမရပေမယ့်ကိုယ့်အတွေး၊ကိုယ့်အနုပညာ
တစ်ခုကိုတင်ဖို့ဆိုရင်အားထုတ်မှုတော့လူတိုင်းလုပ်ကြရတာပါပဲ။
စာတစ်ကြောင်းတင်ရင်လည်းအဲဒါသူ့မူရင်းအတွေးပါ။
မှားတာမှန်တာထား။သူ့မူပိုင်ပါပဲ။ဓာတ်ပုံတစ်ပုံတင်ရင်လည်းအဲဒါ
သူ့အားထုတ်မှုပါ။သူအဲဒီနေရာကိုသွားတယ်။အဲဒီအချိန်မှာအဲဒီလိုပုံ ရဖို့စောင့်တယ်။ဒါတွေကသူငွေမရပေမယ့်အားထုတ် မှုတွေပါ။
သတင်းရေးတင်သူတွေ၊သတင်းဆောင်းပါးရေးသူတွေဆိုပိုဆိုးပါတယ်။ သူတို့တစ်တွေအဲဒီလိုသတင်းရဖို့ဘယ်လိုလိုက်ရတယ်၊ဘာတွေရင်းရတယ် ဆိုတာသူတို့လောက်ဘယ်သူမှမသိနိုင်ပါဘူး။သတင်း အချက်အလက်တွေရဖို့စာတွေလည်းအများကြီးဖတ်ရပါတယ်။နေ့ချင်းညချင်း
သတင်းဆောင်းပါးကောင်း မထွက်ပါဘူး။

ကျွန်တော်တို့လိုစာရေးသူတွေလည်းအတူတူပါပဲ။အတွေးတစ်ခုရတယ်။ ကဗျာဖြစ်မယ်။အတွေးတစ်ခုရတယ်။ဆောင်းပါး၊၀တ္ထု ဖြစ်မယ်။ဒါကိုငွေမရပေ မယ့်ချပြတယ်။ကျန်တဲ့သူတွေခံစားမယ်။ဒါဟာအနုပညာကိုဝါသနာပါလို့ဖြစ် ချင်ဖြစ်မယ်။ဒါမှမဟုတ်ကိုယ်ပေးချင်တဲ့ Message တစ်ခုကို သူများရစေချင်လို့ဖြစ်မယ်။ဘယ်လိုပဲဖြစ်ဖြစ်အဲဒါတွေအားလုံးကိုစာရေးသူ အားထုတ်ထားတာပါ။ပြီးတော့တကယ့်အနုပညာတစ်ခုဖြစ်လာဖို့အနုပညာဓာတ်ခံ၊ ပါရမီရှိသူတွေသာအားထုတ်တတ်ကြတာပါ။

ကျွန်တော်ဆောင်းပါးဖြစ်ဖြစ်၊Facebook Post ဖြစ်ဖြစ်ရေးရင်အကြောင်းအရာ စုံမှရေးပါတယ်။စုထားတတ်ပါတယ်။ပြီးတော့အကြောင်းအရာတစ်ခု တင်ရင်တောင်အဲဒါကကိုယ်ပြောချင်တဲ့အနုပညာနဲ့ရောလို့ရရင်တင်လိုက်ပါ တယ်။ဒါတွေကတခြားသူသိပြီးသားဖြစ်ချင်ဖြစ်ပေမယ့်တခြားသူမသိသေး တာရော၊တင်ပြပုံမတူတာပါဖြစ်နိုင်ပါတယ်။အဲဒါကျွန်တော့်အားထုတ်မှုပါ။ ပြီးတော့အချိန်တစ်ချိန်ပေးခဲ့ရတာပါ။ခံစားမှုများစွာစိုက်ထုတ်ထားတာပါ။
အတွေးများစွာရင်းထားတာပါ။

ဒီလိုပြောလို့ Facebook ကစာတွေ၊သတင်းတွေကိုမရှယ်ရဘူးလား။
 မဟုတ်ပါဘူး။Facebook မှာရှယ်လို့ရလို့တောင် Share ခလုတ်လေး ထည့်ပေးထားတာပေါ့ဗျာ။ဒီတော့ရှယ်တာဆိုရင်ပြဿ     နာ မရှိပါဘူး။မူရင်းရေးသားသူ၊ မူရင်းအကောင့်ပိုင်ရှင်နာမည်ပါပါသွားတာကိုး။

မရှယ်ဘဲကော်ပီယူတယ်။ပြီးတော့ကိုယ့် Wall ပေါ်မှာပြန်
Paste လုပ်တယ်။ အဲဒီအထိရသေးတယ်။ဒါပေမဲ့ Credit ဆိုပြီး
မူရင်းစာပိုင်ရှင်၊ဓာတ်ပုံပိုင်ရှင်ကို နာမည်ပြန်မတင်ပေးဘူး။ရှင်းပါတယ်။ အဲဒီစာ၊အဲဒီပုံဟာသူများရေး၊သူများရိုက်ထားတာကိုသူရေးသလို၊
သူရိုက်ထားသလိုလုပ်တာပါပဲ။

အဲဒါဟာကော်ပီသီချင်းခွေကူးသူလိုသူများဖန်တီးထားတဲ့ပစ္စည်းနဲ့
ကိုယ်အမြတ်ထုတ်တာပါပဲ။အဓိကကတော့ကိုယ့်ဆီမှာမရှိတဲ့ဖန်တီးနိုင်စွမ်း၊
ကိုယ့်ဆီမှာမရှိတဲ့အားထုတ်မှု၊ကိုယ်မရနိုင်တဲ့အစွမ်းအစ၊ကိုယ်လိုချင်တဲ့
အသိအမှတ်ပြုမှုတစ်ခုကိုသူများအားထုတ်မှုနဲ့အချောင်နှိုက်ယူတာပါပဲ။

အဲဒီလိုလူတွေကိုတွေ့နေမြင်နေရတာဟာအဲဒီလူ့အဖွဲ့အစည်းအတွက်
နစ်နာပါတယ်။သဘောကတော့အဲဒီလူ့အဖွဲ့အစည်း၊အဆင့်ရှိပါတယ်လို့ပြချင် ရင်တောင်အဆင့်မရှိသူတွေပါနေတဲ့သဘောပါ။တစ်နည်းအားဖြင့်ပညာရေး အဆင့်နိမ့်ကျတယ်လို့လည်းသုံးသပ်လို့ရပါတယ်။

တွေးကြည့်ပါ။ကိုယ့်ဘာသာသီချင်းဆိုပြီးခွေထုတ်တာတောင်ကော်ပီကူးမခံချင် ရင်၊အွန်လိုင်းအတင်မခံချင်ရင်မထုတ်နဲ့ဆိုတဲ့အတွေးမျိုး၊သူများဖန်တီးပြီးသားကို
ကိုယ့်ဟာလုပ်ချင်တဲ့စိတ်ဓာတ်မျိုးတွေနဲ့ဘယ်ပညာရေးအဆင့်မြင့်ပြီလို့ပြောနိုင်
ပါသလဲ။တကယ့်ပညာရေးကအဲဒါမျိုးလုပ်နိုင်လောက်တဲ့အထိတွေးခေါ်မှု
မပေးပါဘူး။သူများအားထုတ်မှုကိုအသိအမှတ်ပြုခိုင်းပါတယ်။
သူများအနုပညာဖန်တီးမှုကိုတန်ကြေးပေးပြီးဝယ်ခိုင်းပါတယ်။
အဲဒီလိုဝယ်ဖို့လည်းအစိုးရကပါ၊ပါဝင်ပြီး စည်းကြပ်ပါတယ်။
ဆိုလိုတာကအတွေးအခေါ်နိမ့်မနေဘူးဆိုရင်စစ်မှန်တဲ့လူ့အသိုင်းအ၀ိုင်းက
လူတစ်ဦးချင်းစီရဲ့အားထုတ်မှုကိုအသိအမှတ်ပြုခိုင်းပါတယ်။

ကျွန်တော်တို့အဲဒီလိုစစ်မှန်တဲ့အတွေးတွေအားလုံးနဲ့ဝေးကွာနေခဲ့တာဆယ် စုနှစ်ဘယ်နှစ်ခုလောက်ကြာခဲ့ပြီလဲ။အဲဒီလိုကြာခဲ့ရုံတင်မက
အခုခေတ်သစ်မှာလည်းသူများဟာအချောင်ယူနာမည်ကြီးချင်သူတွေ၊
သူများစာ၊သူများပုံနဲ့လုပ်စားချင်သူတွေဘယ်နှစ်ယောက်လောက်
ထပ်မွေးထုတ်ခဲ့ပြီးပြီလဲ။

Credit ပေးတယ်ဆိုတာအဲဒီလူရဲ့ idea ပဲဖြစ်ဖြစ်၊အားထုတ်မှုဖြစ်ဖြစ်၊ အရည်အသွေးကိုပဲဖြစ်ဖြစ်ချီးကျူးမှု၊လေးစားမှု၊အသိအမှတ်ပြုမှုလုပ်လိုက်တာပါ။
Credit ရဲ့နောက်ထပ်အဓိပ္ပါယ်တစ်မျိုးကျတော့ဘာသာရပ်တစ်ခုကိုသေသေ ချာချာအောင်မြင်တတ်မြောက်တယ်လို့အသိအမှတ်ပြုတာမျိုးပါ။

တကယ်လို့သူများအားထုတ်မှုကို Credit မပေးနိုင်ဘဲအလကားနေ သူများဟာပဲယူသုံး၊သူများဟာပဲယူတင်၊ကိုယ့်နာမည်နဲ့သူများဟာကို
ကိုယ့်ဟာလုပ်ချင်သူတွေ၊အောင်မြင်ချင်သူတွေဟာယဉ်ကျေးတဲ့
လူ့အဖွဲ့အစည်းမှာလူမှန်ရင်နားလည်တတ်ကျွမ်းသင့်တဲ့လူမှုရေး
ပညာမှာ Credit တောင် မရသေးသူတွေဖြစ်တယ်လို့ဆိုချင်ပါတယ်။

တကယ်လို့စစ်မှန်တဲ့လူ့အဖွဲ့အစည်းကလူကောင်းအဖြစ်သတ်မှတ်
ခံချင်တယ်ဆိုရင်၊ဒါမှမဟုတ်လူအချင်းချင်းလေးစားမှုကိုလိုချင်တယ်ဆိုရင်၊
သူဖန်တီးထားတဲ့အနုပညာ၊ဒါမှမဟုတ်၊အားထုတ်မှုကနေသူ့လိုပဲ
လူလေးစားခံချင်တယ်ဆိုရင် ကိုယ့်ကိုပါပြန်လေးစားခံရဖို့ကတော့
 Copy and Paste မလုပ်ပါနဲ့။

သူ့စာ၊သူ့ပုံကိုတိုက်ရိုက်ယူရှယ်ရင်ရှယ်ပါ။ဒါမှမဟုတ်သူ့ကို Credit ပေးပါ။
 အဲဒီလို Credit ပေးလိုက်တာဟာသူ့ကိုပဲ Credit ပေးတာမဟုတ်ပါဘူး။ ကိုယ့်ကိုလည်းစစ်မှန်တဲ့လူ့အဖွဲ့အစည်းကလူတစ်ယောက်ရဲ့လိုက်နာသင့်တဲ့
လူ့ကျင့်ဝတ်ကိုကျင့်တယ်ဆိုပြီးလူမှုရေးရာနဲ့ပတ်သက်တဲ့ဘာသာရပ်မှာ Credit ပေးနေတယ်ဆိုတာသိသင့်ကြောင်းပါ။ ။

ဆူးသစ်
၁၂း၁၄ နာရီ ( စင်ကာပူစံတော်ချိန် )
၀၆.၁၁.၂၀၁၆

Monday, January 2, 2017

" အနီးမှုန် "


နောက်ပိတ်ဂဏန်းတစ်လုံးပြောင်းသွားတာ
ခရစ်နှစ်တစ်နှစ်ကိုပြောင်းစေသတဲ့။

ဒီနေ့ဟာလကုန်ဖြစ်ပြီး
နောက်တစ်နေ့ဟာလဆန်းတစ်ရက်ဖြစ်ပေမယ့်
ပြက္ခဒိန်တစ်ခုလုံးကိုတောင်ပြောင်းစေနိုင်ခဲ့တယ်။

ယုံကြည်မှုဟာ
ဆယ့်တစ်နာရီငါးဆယ့်ကိုးနဲ့ဆယ့်နှစ်နာရီကြား
ကြီးကြီးမားမားကိုခြားနားသွားစေသလား
အဲဒီမှာလူတွေအများကြီးရူးသွပ်သွားခဲ့တာ။

ခုနှစ်တစ်နှစ်ရဲ့နောက်ပိတ်ဂဏန်းကိုစိတ်ဝင်စားရင်း
ကိုယ့်ရဲ့ရှေ့ထိပ်စီးနဲ့နောက်ပိတ်ဂဏန်းတွေ
ပြောင်းသွားတာမေ့လောက်အောင်ဖြစ်ခဲ့ကြ
မွေးနေ့ကျမှပြန်သတိရတတ်တာသဘာဝလား
နာရီစားသွားတဲ့နေ့တွေကြားမှာတောင်
ဘ၀အဓိပ္ပါယ်အမှောင်ကျနေတတ်ကြသေးတယ်။

အဝေးကိုတော့မြင်ရတယ်
အနီးကိုတော့မှုန်နေသေးတယ်
သေချာတယ်...
ကျွန်တော်တို့မိုက်မဲနေတုန်းပါပဲ။ ။

ဆူးသစ်
၂၁း၄၇ နာရီ ( စင်ကာပူစံတော်ချိန် )
၃၁.၁၂.၂၀၁၇
Related Posts Plugin for WordPress, Blogger...