Sunday, October 10, 2010

"အရသာ"

ဘ၀မှာငန်တူးနေတာချည်းပဲ
အမြဲတမ်းမျိုချခဲ့ရ
ချိုမြိန်တဲ့ရသဆိုတာဘာလဲလို့မေးရမယောင်
ဘောင်တွေစည်းတွေကမွေးကတည်းကပါလာခဲ့
ဒီလိုနဲ့မသိဥာဏ်ခရီးထဲပဲလျှောက်ခဲ့တယ်။

အရသာရှိရှိနဲ့ဗဟုသုတဟင်းအိုးထဲခုန်ချချင်လဲ
'စည်းစနစ်စာပေ'ဆိုတာတွေနဲ့မတွေ့ရင်မနေရအောင်
ဦးနှောက်ရဲ့အကျဉ်းထောင်ထဲရိုက်သွင်းခံခဲ့ရ
ပြီးတော့မှတစ်နှစ်ကိုတစ်ခါလောက်ပြန်ထုတ်ကြပေါ့။

မိုးလင်းခါနီးရောင်နီတွေကိုပဲ
ညနေဆည်းဆာလိုစားသုံးရင်းနေ့သစ်ကိုဖွင့်လှစ်ခဲ့
သိပ်ချစ်စရာကောင်းတဲ့ရှုခင်းဆိုတာ
ရာဇ၀င်မှာရှားပါးခဲ့တယ်လေ။

ငတ်ငတ်မွတ်မွတ်နဲ့
ပြင်းပြင်းထန်ထန်လွှတ်ပြီးတောင့်တတဲ့အခါကျတော့
ပမ်းလျပျော့ခွေစေတဲ့အထိ
နာမည်တစ်လုံးချိနွမ်းသွားမှာစိုး
သမိုင်းကြောင်းအရိပ်မည်းထိုးမှာကြောက်ရင်း
သက်ပြင်းတွေပဲရုန်းကန်ပွေ့ဖက်ခဲ့ရပြန်တယ်။

အဲဒီလိုနဲ့.....................
ဘ၀ရဲ့အရသာတွေဟာ
ငန်, ချဉ်, စပ် တာတွေချည်းဖြစ်နေရင်း
သေတွင်းနှုတ်ခမ်းကအချိုရည်ကိုသောက်ရမယ့်နေ့
ခပ်မေ့မေ့တောင်ဖြစ်ဖြစ်သွားတယ် ။ ။

သားလတ်



(သူငယ်တန်းမှစ၍စတုတ္ထနှစ်(စက်မှု)ရန်ကုန်စက်မှုတက္ကသိုလ်ရောက်သည်အထိကျောင်းစာများနှင့်အမြဲ ထိတွေ့ နေခဲ့ရသောသူငယ်ချင်းများနှင့်မိမိ၏ဘ၀များစွာသို့)

( ' သင်းကွဲငှက်တစ်ကောင်ရဲ့ဒိုင်ယာရီ ' ကဗျာစာအုပ်မှ )

0 comments:

Related Posts Plugin for WordPress, Blogger...